GÁLATAS 5 - Mam of Todos Santos -- Guatemala Unicode

Chi weꞌxixa cuma ma chi tzakpeta tjakꞌ ootxa ley

1Key hermano, cuma ma tzꞌel ttzakpiꞌn Cristo ejooꞌ tiꞌ ley tuꞌn kten tzakpiꞌntl, juꞌ tzunj cykꞌoꞌnc cyipena tiꞌj tuꞌn cyweꞌxixa cywitzj xjal cyaj tuꞌn cyocxa juntl maj tjakꞌ ley tuꞌn cycleta, tisen oj toc yugo tiꞌ twiꞌ wacẍ.

2Inayena, Pablo, cxeꞌl nkbaꞌna cyey, ka ma chi cuyana tuꞌn tel keset ttzꞌumel cytzꞌalbila tuꞌn cycleta, miꞌntltzen tzꞌajben Cristo cyey tuꞌn cycleta.

3Bix jax cxeꞌl nkbaꞌna cyey, jaca juun xinak cyxola, ka cyaja tuꞌn tel keset ttzꞌumel cytzꞌalbila tuꞌn cycleta, jax ilxsen tiꞌj tuꞌn tbint cykilcaxsen tley Moisés cyuꞌna tuꞌn cycleta.

4Key xjal ma tzꞌoc cykꞌon cyiiba tiꞌj cynimbila tiꞌ ley tuꞌn cyoca jiquen twitz Dios, matzen chi el txꞌometey tiꞌ colbil cyey tuꞌn Cristo. Ma cyaj cycyeꞌyena t-xtalbil Dios

5ntzaj kꞌoꞌn tuꞌn Espíritu Santo. Ko oquel jiquen twitz Dios nuk oꞌcx tuꞌnj kocslabl tiꞌ Dios tuj kanem, bix nuk oꞌcx tuꞌn tzunj kocslabl baꞌn kayon tiꞌj kchunkꞌlal te junx maj tuya Dios.

6Kxol ocslal tiꞌ Jesucristo, mintiiꞌ il tiꞌj ka ma tzꞌel keset kchuꞌl bix ka min, cuma junx taꞌ cykilca koꞌ. Nuk kocslabl at tajbel, bix tuꞌn kocslabl n-oc cyakꞌ kuya ke.

7Nejl, baꞌn ncheꞌx lpey tiꞌ jaxxix yol. Pero jaꞌlewe, ¿ti ma baj? Ma txiꞌ ttzpetsaꞌn jun xjal ejeeꞌy, tuꞌn tcyaj cycyeꞌyena jaxxix yol.

8Pero jxjal ma cub cyiꞌja tuꞌn, tuꞌn cyoca tjakꞌ ley, yaaꞌn te Dios, cuma ma tzaj ttxcoꞌn Dios ejeeꞌy tuꞌn cytzakpeta tiꞌ tcawbil ley.

9Cycꞌojlanx cyiiba cywitzj cabtl tzpetsal cyxola, cuma cxeꞌl tz̈ꞌiy cyxnakꞌtzabl cyxola, tisen jun cluj kꞌotj te ttxꞌotxꞌel pan njaw punntzꞌaj oj n-ocx levadura te tkꞌanel.

10Cuma ma tcyiwsa Kaaw ncꞌuꞌja, juꞌ tzunj cꞌoquel ke ncꞌuꞌja tiꞌj miꞌn tzꞌel cypaꞌn cyiiba tiꞌj ma txiꞌ nkbaꞌna cyey. Pero jxjal tzpetsal cyxola, amale jawnexet, pero ctzaal tkꞌoꞌn Dios tcastiwa.

11Yajtzen weya, yaaꞌn jax cyuꞌn xjal ka lux kena nchin kꞌumen il tiꞌj qꞌuelel keset kchuꞌl tuꞌn kclet. Nuket txiꞌ nkꞌumena juꞌwa, tisen tzin cykbaꞌn juun xjal, minttzenle ntzaj cykꞌoj xjal judío wiꞌja. Nuket e cyaj ncyeꞌyena jyol ma chi clet xjal nuk tuꞌnj e cyim Cristo twitz cruz, jaxettzele ncyaj cykꞌoꞌn judío tuꞌn cykꞌojl wiꞌja.

12Kej xjal cyaj tuꞌn cycpeta, jaxitle baꞌn tuꞌn tel kesettzen cye cyjos.

13Key ocslal, o tzaj ttxcoꞌn Dios ejeeꞌy tuꞌn cytena tzakpiꞌn tiꞌj tcawbil ley. Pero min e tzaj tkꞌoꞌnxin cycolbila tiꞌ ley tuꞌn cybinchana nuk tikꞌch taj cyxumlala, sino tzꞌajbenxit cycolbila tuꞌn cyonen cyiiba tuya nim tkꞌakꞌbil cycꞌuꞌja.

14Chi ajbena cyxolxa juꞌwa, cuma cykilca yol tuj ley njapan baj twiꞌ tuꞌn ja yol lu: “Cꞌoquel cyakꞌ ke cyuyey cyey tisenj n-oc cyakꞌa cyey,” tz̈i tyol Dios.

15Pero ka nuk nchi jaw kꞌojla cyxolxa, tisen oj n-oc cytxꞌan cyiib txyan, cykꞌoꞌnc cwent cyiꞌja, cuma jacꞌa chi naja cykilca cyuꞌnx cyiiba.

¿Alcye tuꞌn tbint kuꞌn? ¿Jun tajbil Espíritu Santo bix ka alcyej jun tajbil kxumlal?

16Cxeꞌl nkbaꞌna cyey, cyiiꞌnx cynaabla tuꞌn junx qꞌuelela tuya tajbil Espíritu Santo, tuꞌntzen miꞌntl txiꞌ cynimana nuk tajbil cyxumlala.

17Tcyꞌi knaabl aj il jtaj Espíritu Santo, bix jax tcyꞌi Espíritu Santo jtaj knaabl aj il. Kej caꞌba lu cyajkꞌoj cyiib. Juꞌ tzunj, miꞌn chi binchana nuk alcyej taj cyxumlala.

18Pero qꞌuelel cyniꞌya tiꞌj, oj ncheꞌx lpey tiꞌj Espíritu Santo, yaaꞌn eteꞌtla tjakꞌ tcawbil ley, sino tjakꞌ tcawbil Espíritu Santo.

19Tzinente ti nbint cyuꞌnj xjal ncheꞌx lpe tiꞌj cynaabl aj il. Nchi oc ipan cyiꞌj xuuj yaaꞌn cyxuꞌl bix cyiꞌj xinak yaaꞌn cychmil. Nuk nchi jyon cyiꞌj pajbaj bix tikꞌch taj cyxumlal.

20Nchi ocx sukel t-xeeꞌ cyken sant. Bix n-oc ke cycꞌuꞌj cyiꞌ chmambaj. Bix n-oc cyipen tuꞌn tbint kaꞌ cyiꞌ juntl xjal. At kꞌoj cyxol bix at chiꞌl cycꞌuꞌj cyiꞌ juntl xjal. Nuk ntzaj cykꞌoj tiꞌj cykilca nbaj. Bix n-oc cyipen tiꞌj nuk tuꞌn cycaman cyibaj niyꞌtl xjal. Ncub ten pabl cyiib cyxol. N-el cyiiqꞌuen cyej xjal nchi oc lpe tiꞌ juntl xnakꞌtzbil.

21Nchi achen jte cyuya at. Byol xjalke. Bix nuk jaj taj cyxumlal nbint cyuꞌn. Bix nimtl kaꞌ ncybincha kej xjal nchi niman cynaabl aj il. Cxeꞌl nkbaꞌna cyey, tisenx e xiꞌ nkbaꞌna cyey tej ntena cyxola nejl, kej xjal nchi binchan jkaꞌ lu, mlay chi ocx tuj tcawbil Dios.

22Pero cyekej xjal ncheꞌx lpe tiꞌj Espíritu Santo, tzin tkꞌoꞌn Espíritu Santo cye cyjulu: N-octzen cyakꞌ xjal cye, bix at cytzalajebl, bix at tuj ttz̈yal, bix at cypasensya. Min chi kꞌojl cyiꞌ xjal, sino n-oc cyipen tiꞌj tuꞌn tbint jun baꞌn cye juntl. Nchi japan baj tiꞌ cyyol cyuya xjal.

23Maansxseke oj nchi yolen cyuya xjal. Bix nchi tzyun cyiib twitz tkaꞌyel. Kej xjal lepchec tiꞌ Espíritu Santo juꞌwa, mintiiꞌ il tiꞌj tuꞌn t-xiꞌ tkbaꞌn jun ley alcyej tuꞌn tbint cyuꞌn.

24Kej t-xjal Cristo, ma cyaj cycyeꞌyen tachbil cyxumlal bix ti taj cynaabl aj il.

25Key ocslal, o kiikꞌ kchunkꞌlal tuꞌn Espíritu Santo. Juꞌ tzunj, ko kbinchaꞌcꞌa ti taj Espíritu Santo.

26Miꞌn cub kbisen mas jawnex koꞌ cywitz juntl. Miꞌn ko jyon tuꞌn ttzaj cykꞌoj juntl. Miꞌn ko achen jte kuya at bix tiꞌ cyaakꞌen.