SAN MARCOS 2 - Mam of Todos Santos -- Guatemala Unicode

Jun xjal mintiiꞌ tanem t-xumlal ul tnaabl tuꞌn Jesús(Mt. 9:1-8; Lc. 5:17-26)

1Eltzen cabtl kꞌij, bix ocx meltzꞌaj Jesús juntl maj tuj tnom te Capernaum. Pero tej tzunj tbijt tpocbal Jesús ka otk ponxin tuj jun jaaꞌ tuj tnom,

2lwewa e jaw tchmon naj tiib xjal tpeꞌnj jaaꞌ jaaꞌ otk tzꞌocxa Jesús, bix ocx baj ke xjal tunwen. Ya min ocx bajtl ke xjal tunwen, bix mitetpe peꞌntl oca baj ke xjal. Bix akꞌxin te txꞌolbal tyol Dios cye xjal.

3Ntxꞌolbantzente Jesús cyxol xjal, tej tul jun cloj xjal ikentzen jun yaab tuꞌn cyaja cyexin twitz jun wetbil. Mintiiꞌ tanem t-xumlalxin.

4Pero ya mix ocxakexin jaaꞌ tocxe Jesús tunwen, cuma otk noj jaaꞌ cyuya xjal. Entonces bixse e baj cybinchaꞌnxin yaab tuꞌn tjax cyiiꞌnxin yaab twiꞌ jaaꞌ. Bix el cyiiꞌnxin jun txol twiꞌ jaaꞌ, tuꞌn tcuꞌx cyxtunenxin yaab twitz wetbil jaaꞌj tcuꞌxa Jesús.

5Pero tej tzunj toc tcyeꞌyen Jesús kꞌuklec cycꞌuꞌj xjal tiꞌ Jesús, bix e xiꞌ tkbaꞌnxin te yaab cyjulu:

—Ncyꞌaal, matzen najset tey til jaꞌlewe―tz̈itzen Jesús te yaab.

6Pero kꞌuklec xsunkej xin txꞌolbal ley, bix iyꞌ tuj cycꞌuꞌjxin cyjulu:

7—¿Tikentzen t-xooꞌna tiib jxjal lu te yolel juꞌwa? Nxooꞌn teja yol tiꞌ Dios. Oꞌcxcꞌate Dios baꞌn tnajsante cyil xjal―tz̈i tzunkexin tuj cycꞌuꞌjxin.

8Pero el naj tniyꞌ Jesús tiꞌj ti jilel niyꞌ tuj cycꞌuꞌj txꞌolbal ley, bix e xiꞌ tkanenxin:

—¿Tikentzen nxaꞌ cyxiꞌmana juꞌwa?

9¿Alcye mas secy tyol jilj tej yaaba tuj cywitza, japa: “Ma najset tila,” bix ma jaj: “Weꞌwetzen tey, kꞌinx twetbila, bix cutxetzen tjay”? Oj t-xiꞌ tkꞌumen jun xjal: “Ma najset tila,” yaaꞌn cyiwte tyol jilj, cuma min chicꞌaj ka otk najset til xjal, bix ka min. Pero oj t-xiꞌ tkꞌumen jun xjal tej yaaba: “Weꞌwetzen tey, kꞌinx twetbila, bix cutxetzen tjay,” mas cyiw tyol jilj, cuma cchicꞌajaxel naj ka ma tzul tnaabl, bix ka min.

10Pero konyeecꞌaxse cyey ka inayen weja, jxjal Smaꞌn tuꞌn Dios tuꞌn ntena cyuya xjal, at wipemala twitz txꞌotxꞌ tuꞌn nnajsaꞌna cyil xjal―tz̈i Jesús cye txꞌolbal ley.

Entonces bix e xiꞌ tkbaꞌn Jesús tej xin yaab:

11—Weꞌwetzen tey, kꞌinx twetbila, bix cutxetzen tjay―tz̈i Jesús te yaab.

12Tej tzunj t-xiꞌ tkbaꞌn Jesús, tzin njaw weꞌtlte yaab, tzin niyꞌ tiꞌtlxin twetbilxin, n-etztlxin tuj jaaꞌ cyxol xjal. Juꞌ tzunj nimxse e jaw kleeꞌ ke xjal, bix oc tzalaj ke xjal tiꞌ Dios, bix e baj jaw yolenke:

—Bajxse tzꞌoca kcyeꞌyen jun maj tisej lu―tz̈itzen ke xjal.

Tej ttzaj txquet Leví tuꞌn Jesús(Mt. 9:9-13; Lc. 5:27-32)

13Tbajlen tkꞌaꞌnaxitltzen Jesús jxin mintiiꞌ tanem t-xumlal, bix e xiꞌ meltzꞌajxin ttziiꞌ jtnijabel aꞌ, bix akꞌ pomel lkꞌe ke xjal tiꞌ Jesús, bix nxnakꞌtzantzen Jesús cyxol xjal.

14T-xiꞌ tbeten Jesús juntl tkiyꞌ, bix exxin twitz jun jaaꞌ, jaaꞌ eteꞌcꞌa kej xin chmol chojentj najben te juntl tnom Roma tbi. Jatztzen oca noj Jesús tiꞌ Leví, tcwal jxin Alfeo. Jatzen Leví chmol pwak tuꞌn Roma. Bix e xiꞌ tkbaꞌn Jesús te Leví:

—Lpetz tey wiꞌj te wuya―tz̈itzen Jesús.

Bix e jaw weꞌ Leví, bix oc lpexin tiꞌ Jesús.

15Yaaꞌntzen ti e baj, bix e xiꞌ ttxcoꞌn Leví ja Jesús te waaꞌl tja cyuyax ke t-xnakꞌatz Jesús lepch tiꞌj, bixse ke kanl chojentj, bix nimtl xjal iiqꞌuenke tuꞌn juntl wik, cuma nimxse xjal yaaꞌn baꞌn oc lpe tiꞌj Jesús.

16Bix e pon cabxin txꞌolbal ley, cyxol jun cloj xjal n-oc cykꞌon cyiib cyiw tuj jtley Dios e cyaj tkꞌoꞌn Moisés, fariseo tbi cyclojan xjal. Tej tzunj tocx cycyeꞌyen txꞌolbal ley nwaaꞌncx Jesús cyuya yuwin xjal, bix e xiꞌ cykanenxin cye t-xnakꞌatz Jesús:

—¿Titzen taj jxin xnakꞌtzal cyey nwaaꞌncxxin cyuyaj yuwin xjal bix xsunkej kanl chojentja?―tz̈i tzunkexin.

17Pero e tbi Jesús cyyol txꞌolbal ley tej t-xiꞌ cykbaꞌn cye t-xnakꞌatz Jesús. Bix e xiꞌ tkbaꞌnxin cye txꞌolbal ley:

—Kej xjal baꞌn min cheꞌxcye tuya kꞌanel. Yal tzunkej xjal yaab, il tiꞌj ncheꞌx tuya kꞌanel. Jaxse juꞌx weya. Min ma chin ul weya te kꞌilectz cyej xjal mintiiꞌ cyil cyey tuj cywitz, sino ma chin ul weya kꞌilectz cyej xjal aj il tuj cywitza―tz̈i Jesús cye txꞌolbal ley cyxol fariseo.

Jun kanbil tiꞌj epaj weyaj(Mt. 9:14-17; Lc. 5:33-39)

18Pero attzen jun maj min chi waaꞌn xjal lepch tiꞌ tyol Juan Bautista bix xsunkej xjal lepch tiꞌj ley fariseo, tuꞌn t-xiꞌ cyyeecꞌan xjal cyanem te Dios. Attzen cabtl xjal e xiꞌ kanlecte te Jesús:

—Ma kila ka min chi waaꞌn jxjal lepch tiꞌ Juan Bautista bix ke lepch tiꞌj ley fariseo. Pero yaltzen kej tey t-xnakꞌatz, minttzen chi waaꞌn tisej cyewa. ¿Tikentzen min cybinche tisej cyej xjala?―tz̈i ke xjal te Jesús.

19Bix aj ttzakꞌbeꞌn Jesús cye xjal:

—Tuj jun mejoblenel tzul nim xjal tuya chmilbaj te iyꞌsal nin kꞌij. Jayaxittzen cub cyyoꞌn xjal weyaj, sino chi waaꞌlcye xjal, cuma nchi tzalaj.

20Laꞌ altzen cye jun kꞌij oj tcub naj chmilbaj, attzen bis. Entonces jatzen miꞌn chi waaꞌncye xjalj. Jaxse juꞌx weya. Ojtzen ncub naja, baꞌntzen tcub cyyoꞌn weya nxnakꞌatz weyaj, pero jaꞌlewe mlay.

21Pero at juntl cxeꞌl nkbaꞌn cyey. Min-al jun xjal ncuꞌx kꞌonte jun remyent acꞌaj tiꞌ jun xbalen kꞌanak, cuma mas qꞌuelex rotj kꞌanak tuꞌnj acꞌaj oj toc yutꞌpaj. Jaxse juꞌx weya, acꞌaj nyola. Mlay tzꞌoc tmoj kꞌanak xnakꞌtzaꞌn. Tej min chi waaꞌn xjal jaꞌlewe ja te xnakꞌtzaꞌnja te nejl.

22Bix juntl. Tise oj ncub cykꞌeysaꞌna acꞌaj cyviney tuj jun kꞌanak tzꞌuꞌn, n-ex rotj tuꞌn vino oj n-el ipcꞌaj, cuma cxeꞌl tzꞌuꞌn tuj il tuyax vino qꞌuelel kojl. Pero oj ncub cykꞌeysaꞌna acꞌaj cyviney tuj acꞌaj tzꞌuꞌn, mintzen tzꞌex rotj. Jaxse juꞌx weya nxnakꞌatz. Mlay tzꞌocx tuj cyey kꞌanak cyxnakꞌatza―tz̈i Jesús cye xjal.

Ke t-xnakꞌatz Jesús el cyiiꞌn twitz triwa tuj kꞌij te ajlabl(Mt. 12:1-8; Lc. 6:1-5)

23Attzen jun kꞌij, bix ex bet Jesús cyxol triwa cyuya t-xnakꞌatz. Tecꞌa mancꞌbil kꞌij tuj smant, jaj kꞌij xjan cyxol xjal. Nchi exxe tzunxin ttziiꞌ triwa, niyꞌxetzen cytokaxin tspigayil triwa, nxiꞌxetzen cywaaꞌnxin, tisenx cyten xjal.

24Bix oc naj cykanbil jxjal fariseo twitz Jesús:

—Cyena. ¿Tikentzen tzin tcuyaney tuꞌn tel cytokan jtey t-xnakꞌatza tspigayil jtriwawa? Xjante jaꞌlewe. Keya kxol, akꞌuntl teja, bix jatzen jun kꞌij tuꞌn kajlan keya jaꞌlewe―tz̈itzen ke fariseo te Jesús, cuma nimalxse ke xjal tuj cyley.

25Pero bix aj ttzakꞌbeꞌn Jesús:

—¿Bajxpatzen txaꞌ cycyeꞌyena tuj uꞌj ti e baj tej xin kiyꞌjil David cyuya ke tuyaxin tej toc nim takꞌ weyaj cyexin jun maj?

26Te tzunj tyem tej tocx Abiatar te nintzaj tawil naꞌl Dios, bix ocx David tuj tja Dios, bix etz tiiꞌnxin jpan cloꞌn tex te Dios, bix jatzen panj xjan t-xiꞌ twaaꞌn jun xjal, oꞌcxcꞌa ke tawil naꞌl Dios baꞌn t-xiꞌ waaꞌnte. Bix e xiꞌ twaaꞌn David cyuya ke tuya―tz̈i Jesús cye fariseo.

27Bix e xiꞌ tkbaꞌn Jesús juntl yol cyexin:

—At juun tley Dios mas nintzaj twitz cabtl tley Dios, tisen tzunj ley tuꞌn tclet xjal tuꞌn weyaj twitzj nuk cꞌuꞌn xjan pan. Yaltzen tisen ja lu, ja kꞌij te ajlabl o cub tbinchaꞌn Dios te onbil xjal. Pero yaaꞌn te xjal o cub bint te cꞌojlal te kꞌij.

28Juꞌ tzunj inayena, jxjal Smaꞌn tuꞌn Dios, at wipemala ncawena cyibaj xjal laꞌ ti cwel cybinchen te ja kꞌij jaꞌlewe―tz̈i Jesús cye fariseo.