1Teltzen Jesús tiꞌ tja Dios cyuya t-xnakꞌatz, bix e xiꞌ tkbaꞌn jun cyexin te Jesús:
—Xnakꞌtzal, cyena, ¡a xsun xak binchbil tej tja Diosa, bix axse cycyeꞌyencj nmak jaaꞌ tej tja Diosa!―tz̈i tzunkexin.
2Pero bix aj ttzakꞌbeꞌn Jesús:
—Cyeꞌncxixseke tiꞌj lux ke jaaꞌ eteꞌwa, cuma tzul jun kꞌij oj cyiyꞌ kuchꞌj jaaꞌwa. Mi nuket jun xak cyjel tibaj juntl―tz̈i Jesús.
Kej yecꞌbil cyuj mancꞌbil kꞌij(Mt. 24:3-28; Lc. 21:7-24; 17:22-24)3Bix etzkexin tuj Jerusalén, bix e xiꞌkexin twiꞌj witz te Olivos tumel tja Dios. Bix e cub ke Jesús tuj cꞌul. Bix e xiꞌ lkꞌe ke Pedro, Santiago, Juan, bix Andrés tiꞌ Jesús te kanlecte:
4—Taat, ¿jtojtzen pjel jma tzaj tkbaꞌna keya? ¿Bix titzen jilel techel tzul oj chꞌitk tbaj juꞌwa?―tz̈i tzunkexin te Jesús.
5Bix aj ttzakꞌbeꞌn Jesús:
—Cykꞌoꞌnc cycꞌuꞌja tiꞌj nuk al cub yajlante cyey.
6Cuma tzul nim xjal kbalte: “Inayen wej Scyꞌoꞌn tuꞌn Dios,” tz̈i cybel, bix cwel cyyajlaꞌn nim xjal.
7Ojtzen toc cycyeꞌyena nbaj kꞌoj tzalu bix nxiꞌ cybiꞌna nbajtl kꞌoj jakꞌch tumel, miꞌn chi jaw seyꞌpaja, cuma juꞌ il tiꞌj pjel te mintknaꞌx tbaj twitz txꞌotxꞌ.
8Tzul jun kꞌij cꞌoquel kꞌoj tuꞌn jun nin tnom tuya juntl nin tnom tuj cykil twitz txꞌotxꞌ. Bix nuk jakꞌch qꞌuiyela xcyaklajnab. Bix pjel nim weyaj twitz txꞌotxꞌ. Maantkxixse ja te t-xeeꞌ tchyonelja, tisen jun xuuj at tuj tchyonel tal. Juꞌtzen pjelte twitz txꞌotxꞌ oj mitknaꞌx tbaj.
9Yaltzen cyey, cycꞌojlamxix cyiiba tuya tikꞌch cyyola, cuma chi xeꞌl kꞌoꞌna cye cawel tuꞌn cyoc pjeta cyuj camon jaaꞌ te xnakꞌtzabl tyol Dios nuk wiꞌjcꞌa. Bix chi xeꞌl chkꞌeta cywitz gobernador bix cywitz nin cawel nuk wiꞌjcꞌa, bixse t-xiꞌ cykꞌumena ti nten.
10Tetzen mintknaꞌx tbaj twitz txꞌotxꞌ, qꞌuelex tz̈itj tpocbal jyol coꞌpbil xjal tuj cykil tnom twitz txꞌotxꞌ.
11Ejeeꞌ tzuna chi elex tz̈itpunte tej yola. Juꞌ tzunj miꞌn tzaj ttz̈i cyiꞌja oj tzyuꞌnkey cyuꞌn cawel nuk wiꞌjcꞌa, bix miꞌn baj cynincꞌuꞌna tiꞌj ti cyyola, cuma yaaꞌn tiꞌ cywiꞌy ctzaala cyyola, sino ja te Espíritu Santo cꞌoquex kbante tuj cywiꞌy ti cyyola cye cawel.
12Cye tzunj kꞌij chi ul, ke cytzicyxse xjal ke cyitzꞌenxse xjal cxeꞌl kꞌonte juntl tuj cykꞌab cawel tuꞌn cybyet, bix ke cwal chi oquel kꞌojl cyiꞌ cyman, bix cxeꞌl cykꞌoꞌn cwal ke cyman tuꞌn cybyet.
13Bix nim xjal cꞌoquel chiꞌl cyiꞌja cuma telniyꞌx ka wuya cykꞌona cyiiba. Pero alj xjal min xcyaj cyeꞌyente we ojxe tbyet, chi tzakpajeltzen twitz kꞌakꞌ tuꞌn Dios.
14Cxeꞌltzen nkbaꞌn cyey juntl yol ilcꞌa tiꞌj. Cycꞌojlam cyiiba. Ojtzen toc cycyeꞌyena jun xjal xitel, biꞌx cyjel weꞌ jun ti jilel tuꞌn tjunalx bix chi iꞌyel tzꞌeꞌya tuꞌn, tocxsen jaaꞌj yaaꞌn baꞌn tocxe ten, jatzen baꞌn cyxiꞌ okj jxjal te Judea tuj cꞌul cyxol witz tuꞌn tclet cychunkꞌlal. Il tiꞌj pjel te ja lu. Juꞌ tzunj tzꞌocxix cycꞌuꞌja tiꞌj oj tbaj.
15Alcyej najlan tja oj tul jxjal xitel, miꞌn chi ocxtle kꞌilbetz titl cyey tuj cyjay, sino txucl chi xeꞌl oka tuj cꞌul.
16Bix alj nakꞌanan tuj taakꞌen, miꞌn tzꞌajtz meltzꞌaj tuj taakꞌen, mitetpe te kꞌilbex ke tiꞌj.
17Mlayxix kej xuuj preñada, bix ma nchꞌuꞌn cyal, oj cyel ok oj tul ja ila.
18Bix cykanex te Dios nuket miꞌn baj juꞌwa tuj jbalel, cuma cyiwxse tbetsaj.
19Bix cuma jaxse cab kꞌij tchyonelj, bix bajxsen pjaꞌ jun maj juꞌwa jatxe tcublen itzꞌj twitz txꞌotxꞌ tuꞌn Dios, bix miꞌn baj juntl maj juꞌwa oj tbaj ja lu.
20Nuket miꞌn cub tbajsaꞌn Dios ja qꞌuixcꞌaja twitz txꞌotxꞌ, milen-al juntl xjal jacꞌa cyaj itzꞌj. Pero tzulxin te bajsalcꞌa twiꞌ tuꞌn tanemxin cyiꞌj texin t-xjal.
21Katzen al jun xjal ma tzꞌoc kbante cyey: Cycyeꞌyenctzen, lu tzunj xin Scyꞌoꞌn tuꞌn Dios lu, ka tz̈i cyseja, miꞌn tzꞌoc cybiꞌna,
22cuma tzultzen nim xjal ẍtakꞌ kbalte ka ejeeꞌ Scyꞌoꞌn tuꞌn Dios te cawel, bix tzul xjal ẍtakꞌel ka ejeeꞌ tyolel Dios. Ejeeꞌ tzunj xjal lu chi cwel binchante techel bix nuk tikꞌch cbinel cyuꞌn tuya cyipemal te yajlal cye xjal, bix chi oquel ten niyꞌbelte tuya cyipemal laꞌ ka miꞌn chi cub tzꞌak cyuyaxe jte Dios t-xjal.
23Cykil tzunja lu nxiꞌ nkbaꞌn cyey nejl. Cycꞌojlantzen cyiiba twitz tuꞌn miꞌn chi cub tzꞌaka.
Ti tten oj tul tcwal Dios juntl maj(Mt. 24:29-35, 42-44; Lc. 21:25-36)24Yaltzen tej kꞌij oj takꞌ iyꞌpa n-el baj qꞌuixcꞌaj, cꞌoquel klolj twitz kꞌij, ya miꞌn txakentl xjaw,
25chi cꞌuꞌl tzꞌak cheꞌw, bix nuk cluꞌleltl tipemal twitz cyaꞌj tuꞌn t-xiꞌ xitj.
26Cyuj xsunj kꞌij oj nchicꞌajaxa inayena, jxjal Smaꞌn tuꞌn Dios tuꞌn ntena cyuya xjal, tzajnin kena twitz txꞌotxꞌ tuj muj, tuya nim wipemala bix tzinxsen chin txakakana.
27Ojtzen wul, chi ultzen nsmaꞌn nsanjel tuj cyaꞌj tuj cykil twitz txꞌotxꞌ, tuyaxe cykil jaaꞌ pomnina baj ttxaꞌn twitz txꞌotxꞌ, tuꞌn cyoc chmet jxjal ebil nyola.
28Cycnomtzen. Nkꞌaꞌcꞌatzen jun techel ti tten oj wul, tuya ti tten oj nxulan jun wiꞌ higuera. Oj n-alajin tkꞌab higuera bixsen n-akꞌ eletz muxkꞌaj t-xul, ya telniyꞌtzen tuj cywitza ka chꞌitk toc coresma.
29Tisen tzunj t-xul higuera n-etz te chꞌitk coresma, qꞌuelelcꞌatzen cyniꞌya tiꞌj oj tbaj tikꞌch ma txiꞌ nkbaꞌn cyey twitz txꞌotxꞌ, jatzen techel ka chꞌitk tetz jxjal Smaꞌn tuꞌn Dios tuj cyaꞌj.
30Tzinexix cxeꞌl nkbaꞌn cyey jcyiyꞌjil xjal te Israel miꞌn baj teja, sino qꞌuitzꞌjelxte ojxe tbaj tisej ma txiꞌ nkbaꞌn cyey.
31Il tiꞌj juꞌ pjela. Te cyaꞌj bix te twitz txꞌotxꞌ chi pjelxcye, pero ke weya nyol mlay chi bajcye.
32Yaltzen tej tuꞌn alcye kꞌij bix jniyꞌ hora oj wul, min-al ebilte. Mitetpe ejeeꞌ tsanjel Dios tuj cyaꞌj itzkilte, bix mitetpe inayena, Tcwal Dios, itzkilte. Nukxix ja te Mambaj itzkilte jtoj pjel.
33Cuma min cytzkiꞌna jtoj chin ulwe, juꞌ tzunj cycꞌojlam cyiiba tuꞌntzen binne cytena oj cyul canbaja.
34Juꞌ teja tisen jun xjal matk tziyꞌ bint tuꞌn t-xiꞌ tuj juntl tnom. Tetzen mintknaꞌx tex bint taaw jaaꞌ, ncyajtzen tkꞌoꞌn cyaakꞌen akꞌanal teeylex te juun, bix te cꞌojlal jaaꞌ tuꞌn t-xiꞌ tcꞌojlaꞌn.
35Inayentzen wej tisen taaw jaaꞌ. Mintiiꞌ tumel jtoj cꞌulel meltzꞌaj taaw jaaꞌ, matzen te ncub klolj, matzen te chil akꞌbila, matzen te nokꞌ eyꞌ te chꞌitk kskix, bix matzen te kꞌijl. Juꞌ tzunj cynaꞌmcꞌa cyiiba,
36cuma yaaꞌn tumel nchi wutana tuj cyaakꞌena oj wul meltzꞌaj.
37Alcyej nxiꞌ nkbaꞌn cyey, yaaꞌn nuk cyequey nxaꞌ nkbaꞌn, sino te cykilj xjal lepchec wiꞌj. ¡Cynaꞌmcꞌa cyiiba!―tz̈i Jesús cye t-xnakꞌatz.
Who We AreWhat We EelieveWhat We Do
2025 by iamachristian.org,Inc All rights reserved.
