LOS HECHOS 25 - Mam of Todos Santos -- Guatemala Unicode

Tej t-xiꞌ tkanen Pablo tuꞌn t-xiꞌ kꞌiꞌn twitz César

1Oxetltzen kꞌij tocxlen jxin acꞌaj gobernador Festo, etzxin tuj Cesarea te kꞌolbel Jerusalén.

2Tejtzen tpon Festo, ejeeꞌtzen nintzaj pala bixsen ke mas nintzaj cawel cyxol xjal judío bix e baj ponkexin twitz Festo, bix ocx cykanbilxin juntl maj tiꞌ Pablo. Cyiwxsen cykanbilxin ocx tiꞌ Pablo.

3Bix e xiꞌ cykanenxin te gobernador tuꞌn t-xiꞌ tkbaꞌnxin tuj Cesarea tuꞌntzen t-xiꞌ smet Pablo tuj Jerusalén. Pero at e cyajbexin. Cyajxin e cub cybyoꞌnxin tuj ewbil tuj be.

4Pero bix aj ttzakꞌbeꞌn Festo:

—Mlay, cuma ma chin aj najwe tuj Cesarea. Mintiiꞌ amleꞌn wiꞌj tuꞌn ncyaj te stisel. Mlay. Ma cyajte Pablo tuj tzeeꞌ tuj Cesarea.

5Pero at juntl baꞌn tbint. Yajtzen ẍeꞌx cyey ejeeꞌy cawel wuya tuj Cesarea. Vayatzen, jatzewe nuk ka at jun til jxjala o cub bint, baꞌntzen cykanena―tz̈itzen Festo cye xjal judío.

6Bix e cyaj Festo Jerusalén juntl wajxak kꞌij ma lajaj kꞌij. Tejtzen tpon baj tajlal kꞌij juꞌwa, bix aj meltzꞌajxin tuj Cesarea tuya cabxin cawel cyxol judío. Tetzen juntl kꞌij cypomlenxin, bix ocx Festo tuj tkꞌaꞌj gobernador tuj jaaꞌ jaaꞌ npjaꞌ nincꞌuꞌn, bix e xiꞌ tsmaꞌnxin ikꞌbilte Pablo.

7Tejtzen tpon jlet Pablo twitzxin, bix oc cysutꞌen cyiib judío te Jerusalén tiꞌ Pablo, bix akꞌke xjal kꞌolcꞌa nim tilxin. Pero mix e tkꞌaꞌ tumel tilxin.

8Cwa t-xiꞌ tkbaꞌn Pablo:

—Key taat, mintiiꞌwa wil o cub bint wuꞌn, mitetpe tiꞌ cyley xjal judío, mitetpe tiꞌ tcostumbre nin tja Dios, bix mitetpe tiꞌ cyley xjal romano―tz̈i Pablo tuꞌn tcoꞌpante tiib.

9Pero jxin Festo e tajbexin tuꞌn tcyajxin baꞌn cyuya judío, bix tuꞌn mintiiꞌ tzꞌoc tbinchenxin cyiꞌj. Juꞌtzen e xaꞌ tkbaꞌnxin:

—Pablo, ¿baꞌmpa tuj twitza tuꞌn t-xiꞌy Jerusalén, tuꞌntzen tcub nbinchaꞌn stis tiꞌj ncub cykꞌoꞌn xjala?―tz̈itzen Festo te Pablo.

10Pero bix aj ttzakꞌbeꞌn Pablo:

—Twitzj xin t-xel tneel nintzaj cawel te Roma in tina. Jatzete tzalu, yaaꞌn Jerusalén, cwela we wil. Ttzkiꞌn tey minxtiiꞌ jun we wil o tzꞌoc nbinchen cyiꞌ xjal judío.

11Katzen jax at il o cub bint wuꞌn, bix ka ilxix tiꞌj tuꞌn ncyim tiꞌj, entonces mlay tzꞌel nxooꞌnwe ncyamecy. Lu kenwe lu. Pero ka nuk ẍtakꞌbil kej wila, yaaꞌn baꞌn tuꞌn woc tkꞌoꞌna tuj cykꞌab jxjal cyaj chi cub byonte we. Min-al jun at tajwalel tuꞌn t-xiꞌ kꞌonte we juꞌwa. Yaltzen jaꞌlewe, cxeꞌltzen nkanen tey tuꞌn toc tbiꞌn jxin nintzaj cawel te Roma ti nten―tz̈i tyol Pablo te gobernador.

12Tejtzen toc tbiꞌnxin juꞌwa, bix e xiꞌ tkanen Festo cye ocsal. Yajcꞌatltzen bix aj ttzakꞌbeꞌnxin te Pablo:

—Ma tkaney tuꞌn tcub tila tuya mas jawnex cawel. Pon tzuna twitz nintzaj cawel tuj Roma―tz̈i Festo.

Tej tpon kꞌiꞌn Pablo twitz rey Agripa

13Exsen cab kꞌij, bix e pon jxin Agripa tuya tanebxin Berenice tbixuj tuj tnom te Cesarea. Ja tzunj xin Agripa jatzen xin jrey cyxol judío. Jatzen nintzaj cawel tibaj Roma bix tibaj cykil twitz txꞌotxꞌ otk tzꞌoc kꞌonte texin te cawel cyibaj judío. Bixsen e ponxin tuj Cesarea te kꞌol jun nintzaj kꞌolbebl te acꞌaj gobernador Festo.

14E tentzen Agripa bix Berenice cab kꞌij tuya Festo. Attzen jun kꞌij bix e xiꞌ tkbaꞌn Festo te Agripa ti tten Pablo. Tz̈itzen Festo cyjulu:

—Kape jacꞌa tzaj tkꞌoꞌna jun ocsabl we. At jun pres tzyuꞌn wuꞌn, Pablo tbi. Ja gobernador Felix e cyaj kꞌon texin we.

15Tejtzen nx-aj Jerusalén, ejeeꞌ tzunj xin mas nintzaj yolel tuya Dios bix nincꞌul cyxol xjal judío ul kꞌinte nim kanbil tiꞌj xjal Pablo. Bix e cykana we tuꞌn tcub nkꞌoꞌn til tuꞌn tcub.

16Pero bix aj ntzakꞌbeꞌn ka yaaꞌn juꞌ ctemela, bix ka min tcuya tley Roma tuꞌn tcub jun xjal nuk yalx. Bix e xiꞌ nkbaꞌn cye il tiꞌj tuꞌn tcub cykꞌoꞌn tilxin tujxix chicꞌaj oj tmaje cywitzxin tuya Pablo, tuꞌntzen tcoꞌpante tiibxin.

17Juꞌtzen tten cyul-len ke kbalte til Pablo tzalu. Tejtzen cyul, min e xiꞌ nkꞌoꞌn tyem te, sino bix in cub ke twiꞌ nkꞌaꞌj te binchal stis te juntl kꞌij, bixsen oc nchmoꞌnke cykilke nwitz, bix e xiꞌ nchkꞌoꞌn ikꞌbilte Pablo.

18Otktzen bint tten, ejeeꞌ tzunj xin kanel bix e jaw weꞌkexin, bix akꞌke txꞌolbal cykanbilxin. Pero jcykanbilxin tiꞌ Pablo mintiiꞌ elpenina tiꞌj we otk txiꞌ nbisen tiꞌj.

19Cykanbilxin nuk tiꞌj yaaꞌn baꞌn cytenxin tiꞌ cyreligión judío. Bix juntl. E yolenke tiꞌ jun xjal Jesús. O cyimxin, tz̈i ke judío, pero te Pablo tuj twitz, iꞌtz texin.

20Juꞌ tzunj ya mix e binne tele nniyꞌ tiꞌj stis, jaaꞌle otk tzaaꞌ jlet. Juꞌ tzunj e xaꞌ nkbaꞌn te Pablo tuꞌn taj meltzꞌaj tuj Jerusalén tuꞌn tcub tilxin jatzewe.

21Pero min e tcuyaxin. Jaxsen Pablo e tzaj kanente we tuꞌn ja nintzaj cawel te Roma, jax te Augusto, cxeꞌl cyeꞌyente tilxin. Juꞌ tzunj e xaꞌ nkbaꞌn tuꞌn tcyajxin pres tzalu ojxetzen tkꞌonte tumel tuꞌn t-xiꞌ nsmaꞌn tibaj mar tuꞌn tpon twitz nintzaj cawel. ¿Ti tey toc tuꞌn?―tz̈i Festo te Agripa.

22Bix aj ttzakꞌbeꞌn Agripa te Festo:

—Wachexsela ojat toc nbiꞌn tyol Pablo―tz̈i Agripa.

Bix e xiꞌ tkbaꞌn Festo:

—Cuna, taat, nchiꞌjna tzꞌoc tbiꞌna―tz̈i Festo.

23Entonces tetzen juntl kꞌij attzen jun tij sesión tuj jun jaaꞌ ma nim. Bix ocxke Agripa tuya Berenice. Ocxkexin tuya nintzaj cyxbalenxin te yecꞌbil ka ma nintzaj xjalkexin, bix cyuya cykꞌoꞌpajxin. Bix ocpan ke nintzaj cycawel soldado, bix ke nintzaj xjal tuj tnom. Tejtzen toc cychmon cyiibxin, bix e xiꞌ tsmaꞌn gobernador Festo ikꞌbilte Pablo.

24Tejtzen tpon Pablo tunwen, bixsen akꞌ Festo yolel cyjulu:

—Nintzaj cawel Agripa, bix cykilkey eteꞌ tzalu, chꞌin cybiꞌtza, nuksamkey. Lu tzunj jun xjal lu n-oc cycyeꞌyena. Nim xjal judío o tzul kꞌinte kanbil nwitz tiꞌj. O tzꞌoc cychmon cyiib nwitz tzalu tuj Cesarea, bix tuj Jerusalén. Nuk cocꞌcꞌa tzin cyajbeꞌn tuꞌn tcub nbyoꞌn.

25Pero weya tuj nwitz, mintiiꞌte til tuꞌn tbyet. Pero, cuma jax o kanente tuꞌn t-xiꞌ twitz Augusto ti ctemela stis tiꞌ til, matzen ncuyan wej juꞌwa. Cxeꞌl nchkꞌoꞌnwe Roma.

26Pero at chꞌineeꞌ tkaꞌyel. ¿Titzen tten oj t-xiꞌ nsmaꞌn jun pres mintiiꞌ til twitz nintzaj cawel? Pero bix mintiiꞌ baꞌn t-xiꞌ ntzꞌiꞌben te. Juꞌ tzunj waj txiꞌ nkanen cyocsabla. Ma tzaj wiiꞌn jxjal lu cywitza, bix twitzxixa, cawel Agripa, tuꞌntzen toc cybiꞌna, tuꞌntzen ttzaj cykbaꞌna we ti tten til cwel nkꞌoꞌn twitz nintzaj cawel te Roma,

27cuma tuj nwitz jun naꞌc xjal kena oj t-xiꞌ nsmaꞌn twitz cawel bix mintiiꞌ til cxeꞌl kbet―juꞌtzen tten tyolen Festo twitz Agripa bix cywitz xjal otk tzꞌoc cychmon cyiib.