EFESIOS 3 - Mam of Todos Santos -- Guatemala Unicode

Jun taakꞌen Pablo tuꞌn t-xiꞌ tkbaꞌn tpocbal Cristo Jesús te cyej yaaꞌn judío

1Entonces, key hermano, ejeeꞌy ocslal yaaꞌn judío eteꞌy tajlal t-xjal Dios, bix juꞌ tzunj inayena, Pablo, nchin naꞌna Dios cyiꞌja. Ntiincꞌtza tuj tzeeꞌ nuk tiꞌ tkꞌumj tpocbal Cristo Jesús te cyey yaaꞌn judío.

2Jatzen waakꞌenja o tzaj tkꞌoꞌn Dios, bix ntzkiꞌna o cybiy tiꞌj ja waakꞌena lu.

3O cybiy Dios o tzaj tyeecꞌan weya j-e baj tnincꞌuꞌn nejl pero min e tyeecꞌa. Matzen cyaj ntzꞌiꞌbena chꞌin tiꞌj e baj tnincꞌuꞌn Dios kiꞌj cykilca koꞌ jatxe ootxa.

4Oj cyakꞌa xnakꞌtzal tiꞌj ma ntzꞌiꞌbiya tuj wuꞌja, qꞌuelel cyniꞌya tiꞌj nim o tzꞌel weya nniꞌya tiꞌj ti e baj tnincꞌuꞌn Dios min e chicꞌajax nejl. Jatzen e cub tnincꞌuꞌn Dios tiꞌj, jaj tuꞌn tcub tkꞌoꞌn Dios cykilca at tjakꞌ tcawbil Cristo.

5Ootxa min-al jun el tniyꞌ tiꞌj ti e baj tnincꞌuꞌn Dios, pero jaꞌlewe o tzaj tyeecꞌan Dios tuꞌn Espíritu Santo cye ke t-xel Jesús bix ke tyolel Dios o tzꞌoc cykꞌon cyiib tuꞌn cyajben tuj taakꞌen Dios.

6Bix alcyej o tzaj tyeecꞌan Dios cye t-xel Jesús bix ke tyolel Dios ja tzunj lu: Yaaꞌn nuk ejeeꞌ ocslal judío, sino cyuyax ke ocslal yaaꞌn judío ccyiikꞌel cykilj o takꞌ Dios. Tuꞌnj oj toc cyocslaꞌn coꞌpbil tuꞌn Cristo Jesús, cyuyaxsen chi oquel tajlal t-xjal Dios.

7Yaaꞌn inayena scyꞌolte tuꞌn tkꞌumj tyol Dios wuꞌna. Jatzen Dios o tzaj kꞌonte weya tuꞌn t-xiꞌ nkꞌumena ja yol lu, bix tuꞌn tipemalxin nbint wuꞌna.

8Amale inayenta mas aj il nejl twitz cykilca xjal tuj nwitza, pero o tzaj tkꞌoꞌn Dios waakꞌena te cxeꞌl nkꞌumena tyol Dios cye xjal yaaꞌn judío. Bix jnxiꞌ nkꞌumena, jaj ka ma tzꞌoc tkꞌon tiib jun xjal tiꞌ Cristo, attzen tkꞌinemal tbanelxsen mi nuk binel tajlaj.

9O tzaj tkꞌoꞌn Dios weya tuꞌn t-xiꞌ nkꞌumena cye cykil xjal tiꞌj e baj tnincꞌuꞌn Dios jatxe ootxa tuj ewjel. Tuj tneel, jxin e binchante cykilca at min e cub tyeecꞌanxin j-e baj tnincꞌuꞌnxin,

10tuꞌntzen cyjaw kleeꞌ jaꞌlewe cykilca ke ángel bix ke biman. E tajbe Dios tuꞌn kajben ejooꞌ ocslal te jun yecꞌbil cywitz kej ángel bix kej biman nchi cawen cyxol cyaꞌj, tuꞌntzen tel cyniyꞌ tiꞌj nimxsen baꞌn tuꞌn Dios.

11Cykil tzunj lu e baj tnincꞌuꞌn Dios jatxe tuj tneel, bix tuꞌn Cristo Jesús, Kaaw, e pjaꞌ bint.

12Bix at kmojbabl kiib tuya Cristo tuꞌnj kocslabl tiꞌj. Juꞌ tzunj tuya cykil kcꞌuꞌj bix mintiiꞌ ttz̈i kiꞌj, baꞌn tuꞌn kocx twitz Kman Dios.

13Entonces, key hermano, ntiina tuj tzeeꞌ tzalu, cuma e xiꞌ nkbaꞌna tyol Dios cyey. Niyꞌx qꞌuixcꞌaj wuꞌna, pero cxeꞌl ncubsaꞌna nwitza cyey miꞌn baj cycꞌuꞌja ti pena ntiiniya, sino oꞌcx cxeꞌl cykꞌoꞌna chjonte wiꞌja.

Mlay tzꞌel kniyꞌ tiꞌj niyꞌ chꞌin pomnina tkꞌakꞌbil tcꞌuꞌj Cristo

14Cuma n-el nniꞌya tiꞌj ejeeꞌy t-xjal Dios, juꞌ tzunj nchin cub majeya twitz Kman Dios cyiꞌja.

15Jatzen Kmanj, bix juꞌ tzunj ejooꞌ ocslal tcwal Dios. Jaxin Cyman kej o chi pon tuj cyaꞌj, bix Cyman cyej eteꞌx twitz txꞌotxꞌ.

16Bix jawnexsen tbixin. Ojtzen nchin naꞌna Kman cyiꞌja, tzin nkaniya texin tuꞌn ttzaj tkꞌoꞌnxin tipemalxin tuj cyanema tuꞌn Espíritu Santo, tuꞌntzen tcyiwset cyanema.

17Bix nchin kanena te Dios tuꞌn toc ke cycꞌuꞌja te junx maj tiꞌj Cristo, tuꞌntzen tten Cristo tuj cyanema. Ka wiꞌl cyocslabla tiꞌj Cristo tuj cyanema juꞌwa, cyiwtzen taꞌ tkꞌakꞌbil cycꞌuꞌja, tisen jun tzeeꞌ min yucch ka wiꞌl tlocꞌ junx maj tuj txꞌotxꞌ.

18Ka nbint cyuꞌna juꞌwa, ejeeꞌy ocslal cyuyax cykil niyꞌtl ocslal qꞌuelel cyniꞌya tiꞌj niyꞌ chꞌin pomnina baj tkꞌakꞌbil tcꞌuꞌj Cristo.

19Mlay bint tmloj cuma nimxsen. Ojtzen tel cyniꞌya tiꞌj jtkꞌakꞌbil tcꞌuꞌj Cristo, amale mint tzꞌel cyniꞌya tiꞌj entera, jax ctzketel cynaabla tisen taj Dios.

20¡Ko nimanxit tbi Dios! ¡Jawnexsen tipemal Dios! Bix tuya nim tipemalxin nakꞌananxin tuj kanem. Mintiiꞌ jun miꞌnt bint tuꞌnxin. Baꞌn tuꞌn ttzaj tkꞌoꞌnxin mastl twitzj nxiꞌ kkanen, bix mas baꞌn nbint tuꞌnxin twitzj ncub kbisen.

21¡Nimjxit Dios te junx maj kuꞌn, ejooꞌ t-xjal Dios at kmojbabl kiib tuya Cristo Jesús!