1 TIMOTEO 3 - Mam of Todos Santos -- Guatemala Unicode

Ti ctemel tchunkꞌlal jun taj tzꞌoc te nincꞌul tiꞌj tuj tja Dios

1O kbaj al jun taj tzꞌoc tkꞌaꞌben te nincꞌul tiꞌj ma te cawel cyibaj xjal tuj tja Dios, baꞌnte. Baꞌn tocxte,

2pero al ma tzꞌoc te nincꞌul tiꞌj tuj tja Dios, tuꞌn miꞌn yolj cyuꞌn xjal. Cwelxix ten tuj tbanel tuya junx t-xuꞌl, bix cxeꞌl tiiꞌn jun tchunkꞌlal nuk yalnix, bix cxeꞌlxix tbisen tiꞌj, baꞌntzen tbiꞌnc cyuꞌn xjal bix tcuyan tuꞌn twutan jun xjal tja, bix baꞌnxix te xnakꞌtzal cyxol xjal.

3Jun cawel tuj tja Dios mintiiꞌ tuꞌn toc te bola, mitetpe jyol kꞌoj, bix mitetpe lmolec xjal tiꞌj te taj. Yaaꞌntzen juꞌ ctemela, sino jun xinak mixbenxix kꞌojl, jun xinak baꞌn chewsan kꞌoj cyxol xjal, bix mitetpe tziyꞌ tuj tcꞌuꞌj nuk te cambl pwak.

4Cbinelxix tnincꞌun tuj tja, bix ebil ke tcwal.

5Cuma ka jun xjal mixben nincꞌun tex tja, jeyꞌ, ¿titzen tseꞌ tuꞌn tbint tnincꞌun tuj tja Dios?

6Jxjal ma tzꞌoc te tajwilel tja Dios, yaaꞌnt loj jun maantk tzke toclen te ocslal, cuma chꞌinnchꞌe axse qꞌuelela tuj twitz ma taj tuya cubsaj witzbaj, bix cwelx tzꞌak, tisex tcublen tzꞌak Satanás tuj cyaꞌj bix ocxin te taaw il.

7Bix jax il tiꞌj cwel ten tuya jun tnaabl baꞌn cyuyaj xjal yaaꞌn ocslal, tuꞌn miꞌn jaw ikj yol tiꞌ tja Dios cyuꞌn xjal. Jatzen tcꞌoꞌbel bimanj, tuꞌn tel iiqꞌuet tyol tajwilel tja Dios.

Ti ctemel tchunkꞌlal jun diácono

8Jaxse juꞌx kej onlte tajwilel tja Dios, cybiꞌxix chꞌin. Miꞌn chi cub tzꞌak tuj cyyol cywitz xjal, bix mitetpe tuꞌn cyoc bola, bix jax mitetpe tuꞌn cycaman pwak tuj tkaꞌyel.

9Bix cwelxix cycꞌuꞌn tyol Dios tisecꞌax tten ttzajlen tkꞌoꞌn Dios, cuma cytzkiꞌnxixa ka jax tyol Dios.

10Baꞌn cyniyꞌbet jxjala nejl ka baꞌnke te onel. Katzen mintiiꞌ jun cykaꞌyel, baꞌntzen cyajben te onl tajwiyel.

11Jaxse juꞌx kej xuuj onl tajwilel, baꞌnx chi cwel ten, yaaꞌn tuꞌn cycub ten xtzꞌiml yol, mitetpe tuꞌn cycub ten balkꞌajel ma iken yol, sino nukxix yalnix tiꞌ cynaabl, bix baꞌnxix toc ke cycꞌuꞌj xjal cyiꞌj.

12Jun onl tajwilel tja Dios cꞌoquelxix nuk te tchmil junx xuuj, bix cbinelxix tnincꞌun ke tcwal bix tikꞌch te tuj tja.

13Kej onel nbint-xix cyaakꞌen cyuꞌn tuj tja Dios, ejeeꞌ tzunj a cyanem xjal cyiꞌj, bix kꞌuklxix cycꞌuꞌj oj nchi akꞌ yolel tiꞌ cyocslabl tiꞌ Jesús cyuya xjal.

Jun kocslabl o tzaj tkꞌoꞌn Dios nimxse t-xiꞌlen

14Xiꞌman wuꞌna tuꞌn nxiꞌ naja cyeyꞌl tey, pero ncubtzen ntzꞌiꞌbena ja uꞌj lu tey

15yaaꞌn ka nchin tzyetcꞌa, cuma wajtzen ttzkiꞌntla ti ctemela cynaabl jxjal te tja Dios, cuma te tja Dios te te Dios iꞌtz, bix cuma ejeeꞌcye xjal te tja Dios iklte bix cꞌojlal tej jax tyol Dios.

16Jatzen jax tyol Dios, jkocslabl, o tzaj tkꞌoꞌn Dios, maꞌxse t-xiꞌlen, tisen toc tuꞌnj bitz: “Oc Dios te xjal, Jesús. E cub tyeecꞌan Espíritu Santo ka ja Jesús Scyꞌoꞌn tuꞌn Dios, bix cykilj e bint tuꞌn Jesús baꞌnxse eꞌla. Axse eꞌlaxin tuj cywitz tsanjel Dios. Bix ex tpocbalxin tuj cykil yol twitz txꞌotxꞌ. Bix oc cyocslaꞌn nim xjal jaxin. Bix e kꞌiijxin tuj cyaꞌj juntl maj,” tz̈i bitz.