2 PEDRO 1 - Mam of Todos Santos -- Guatemala Unicode

Jun kꞌolbebl tuꞌn apóstol Pedro

1Inayena Simón Pedro. Jun t-akꞌanal bix jun t-xel Jesucristo kena. Nxiꞌ ntzꞌiꞌbena ja uꞌj lu te cyey xjal ma chi ocslana tiꞌ Cristo tisen keya, ejooꞌya t-xel Jesús. Clol ke bix Diosxin, bix cuma jiquenxin, ma kꞌoj ke tuꞌn koc te ocslal.

2Tzajxit nim xtalbil cyey bix chi tenxita tuj ttz̈yal tuꞌnj cytzkiꞌna Dios tuya Kaaw Jesús.

Ti tten cychunkꞌlal ke ocslal

3Tuꞌnj tipemalxin bix tuꞌnj ktzkiꞌn jaxin, ma tzaj tkꞌoꞌnxin ke cykilca najben tuꞌn tten kchunkꞌlal te junx maj bix tuꞌn t-xiꞌ kiiꞌn kchunkꞌlal tisen taj Dios. Ma ttxocxin ejooꞌ tuꞌn kten tuyaxin tuj tcawbilxin jawnex bix tuꞌn koc te ttanemxin tbanelxix.

4Tuꞌnj tipemalxin bix tuꞌnj ktzkiꞌn jaxin, ma cyaj tkꞌoꞌnxin jawnex tyolxin te ke tuꞌn t-xiꞌ kiiꞌn jun knaabl jiquen tisenj texin Dios bix tuꞌn ktzakpet tiꞌj tikꞌch yaaꞌn baꞌn at twitz txꞌotxꞌ.

5Cuma ma tzaj tkꞌoꞌn Dios xtalbil te ke tuꞌn koc te ttanem jiquen, juꞌ tzunj, yaaꞌn nuk chi ocslala tiꞌ Cristo, pero jax juꞌxa cꞌoquel cyipena tiꞌj tuꞌn cytena jiquenxix. Bix yaaꞌn nuk jaj lu, sino jax juꞌx cykꞌoꞌnc cyipena tiꞌj tuꞌn tel cyniꞌya tiꞌj.

6Bix yaaꞌn nuk tuꞌn tel cyniꞌya tiꞌj. Jax juꞌx cykꞌoꞌnc cyipena tiꞌj tuꞌn ttzyunte cyiiba twitz il. Bix yaaꞌn oꞌcx tuꞌn ttzyun cyiiba. Jax juꞌx tuꞌn tten cypasensyey. Bix yaaꞌn nuk oꞌcx jlu. Jax juꞌx tuꞌn t-xiꞌ cyiiꞌna cynaabla tisen taj Dios.

7Bix yaaꞌn nuk oꞌcx jlu. Jax juꞌx tuꞌn toc cyakꞌ ke niyꞌtl ocslal cyey. Bix yaaꞌn nuk oꞌcx tuꞌn toc cyakꞌ ocslal cyey. Jax juꞌx tuꞌn toc cyakꞌ cykilca xjal cyey.

8Katzen ma bint cykilca jlu cyuꞌna bix ka tz̈ꞌiyne tz̈ꞌiy cynaabla juꞌwa, nchi ajben tzuna, bix cꞌajbel jlu tuꞌn cytzkiꞌna ja Kaaw Jesucristo.

9Pero ka min nbint cyuꞌna tuꞌn cytz̈ꞌiya tuj cyocslabla juꞌwa, tisentzen sjuman tiꞌ cywitza min nakꞌ, bix ka mos̈key, cuma ma tzꞌel tuj cycꞌuꞌja o chi txjeta tuꞌnxin tiꞌ cyila te ootxa.

10Juꞌ tzunj, key ocslal, juntl maj cxeꞌl nkbaꞌna cyey tuꞌn toc cyipena tiꞌj tuꞌn cytena jiquenxix, tuꞌntzen cycyaj tena tuj cyocslabla. E ttxoc Dios ejeeꞌy bix e tscyꞌoxin ejeeꞌy tuꞌn cyoca te t-xjalxin. Ka ma tzꞌoc cyipena tiꞌj juꞌwa, miꞌn cheꞌxa tuj il.

11Cykilcaj ma txiꞌ nkbaꞌna cyey, ka nbint cyuꞌna juꞌwa, tuya cykil tcꞌuꞌj Kaaw Jesucristo, Clol ke, ctkꞌaꞌ tuꞌn cyoca tuj lugar jaaꞌ ccawel te junx maj.

12Ilxsen tiꞌj jyol ma txiꞌ nkbaꞌna cyey, tuꞌn cycywixa mas tuj cyocslabla. Juꞌ tzunj, miꞌn cyaj nkꞌoꞌna tuꞌn t-xiꞌ nkbaꞌna ja consejo lu nim maj te cyey, amale elet cyniꞌya tiꞌj bix ma cub cyiꞌja wuꞌna jaꞌlewe ka jaxxix nyola.

13Tiꞌj lux kena iꞌtza, baꞌn tuj nwitza tuꞌn tcyaj nkꞌumena cyey tiꞌj lu, tuꞌntzen tjaw cyitzꞌjsaꞌna cynaabla bix tuꞌn tul tuj cycꞌuꞌja.

14Il tiꞌj cyjel nkꞌumena cyey, cuma n-el nniꞌya tiꞌj chꞌixcꞌa tuꞌn taj wanema cjawetz tuj nxumlala, cuma o tzaj tyeecꞌan Kaaw Jesucristo weya.

15Loꞌj lux kena iꞌtza, cꞌoquel wipena tiꞌj tuꞌn tcyaj wokxenena cyey, tuꞌntzen tul nyola tuj cycꞌuꞌja oj ncyima.

Kej apóstol o cyil tipemal Jesucristo

16Tej t-xiꞌ kkꞌumena cyey, ejooꞌya t-xel Kaaw Jesucristo, tiꞌj tipemalxin bix tiꞌj tuꞌn tul meltzꞌajxin juntl maj, yaaꞌn nko yolena tisenj nicꞌbil yol tzin cyxnakꞌtzaꞌn juuntl xnakꞌtzal ẍbiꞌlke pero ẍtakꞌke, cuma oc kcyeꞌyena tej tul jlet-xin kwitza tuya jawnex tipemalxin.

17Oc kcyeꞌyena tej ttzaj tkꞌoꞌn Kman Dios nimbil te Jesús bix e jaw tnimsaꞌnxin tbi. Bix e kbiꞌya tej ttzaj tkbaꞌn Dios jawnex tiꞌj Tcwal cyjulu: “Ja weya Ncwal jlu n-oc takꞌ weya. Nimxsen nchin tzalaja tiꞌj,” tz̈i Dios.

18Ejooꞌxa e binte kej yol lu tej ttzaj kbet tuj cyaꞌj, tej kjapana twiꞌ witz tuya Jesús jaaꞌ e cꞌuꞌla ten Dios.

19Bix yaaꞌn nuk ejooꞌya at kyola tiꞌ Cristo. Jax juꞌx at cyyol kej tyolel Dios te ootxa jaxxixxsen. Baꞌn tuꞌn toc cycꞌuꞌja tiꞌj yol jaxxix, tuꞌntzen tel cyniꞌya tiꞌj alcyej jiquen bix alcyej ẍtakꞌ. Tej yol jaxxix tisen jun jul tzaj, tuꞌn tchicꞌajax tikꞌch jilel tuj klolj. Cynimanxa jaxxix ojxe tul meltzꞌaj Kaaw bix qꞌuelel cyniꞌya tiꞌj te junx maj tuj cyanema, tisen oj n-el klolj oj n-ul kꞌij.

20Il tiꞌj qꞌuelel cyniꞌya tiꞌj tej tcub cytzꞌiꞌben ke tyolel Dios tyol Dios twitz t-xak uꞌj, yaaꞌn cyexxin cyyol e cub cytzꞌiꞌben.

21Bajx cwaꞌ cytzꞌiꞌben ke tyolel Dios cyex cyajbil, sino nuk oꞌcx ajbenke te Dios. Kꞌiꞌnkexin tuꞌn Espíritu Santo, bix nuk tyol Dios e cub cytzꞌiꞌbenxin.