LOS HECHOS 17 - Mam of Todos Santos -- Guatemala Unicode

Tej cyjaw labtl ke xjal tuj tnom Tesalónica

1Cyetzlenxitl tzunxin tuj tnom te Filipos, bix e xiꞌ Pablo cyuya ke tuya te elne tuj ttxꞌotxꞌ Macedonia. Excaxin tuj tnom te Anfípolis bix Apolonia. Cwax cyponxin tuj tnom te Tesalónica, jaaꞌ taꞌ jun camon jaaꞌ te xnakꞌtzabl tyol Dios cyej xjal judío.

2Entonces bix e bint tuꞌn Pablo tisenx nbint tuꞌnxin oj nponxin tuj jun acꞌaj lugar. E xiꞌxin te sábado tuj camon jaaꞌ te yolel cyuya xjal judío. Oxe sábado e x-ajxin tuj camon jaaꞌ.

3Tz̈itzen Pablo cye judío cyjulu:

—Key taat, tzin tkbaꞌn tyol Dios jaj xin Scyꞌoꞌn tuꞌn Dios, ja te xinj tbej tuꞌn tcyimxin bix tuꞌn tjatz itzꞌjxin juntl maj tuj cyamecy. Bix nuk oꞌcxcꞌa jun xjalj o til ja lu, jaj xin Jesús nxiꞌ nkbaꞌn cyey. Jatzen cyeꞌybil ka ja Jesús Scyꞌoꞌn tuꞌn Dios, jaj xin cyey tzin cyyoꞌn ejeeꞌy judío―tz̈i Pablo cye judío.

4Cyuya ke tyol Pablo tiꞌj Jesús e cwaꞌ tuj twitz cabxin judío, bix ockexin te ocslal, bix oc cyonenxin ke Pablo tuya Silas. Bix cyuyax nim xjal aj griego otk tzꞌoc ebinte tyol Dios, bix ocslan kej yol nyolj tiꞌ Jesús, tuyax cabxuj nintzaj xuuj.

5Pero cabtlxin judío min oc cybiꞌnxin tyol Pablo, bix oc chiꞌlkexin, cuma jcabtlxin judío ya lepchtlkexin tiꞌ acꞌaj be. Ejeeꞌ tzunj xin judío nchi kꞌojla, bix e xiꞌkexin tuj plaza te jyol cyej xjal cyꞌaj bix kaꞌ xjal. Entonces bixsen e baj niyꞌqꞌuetkexin te tzpetsalcꞌa tnom tuya tikꞌch baꞌn cyuꞌnxin bix tikꞌch tzpetpajlenel. Tejtzen tbaj cyyajlaꞌnxin tnom, bixsen e jaw chiꞌl ke tnom, bix e tzaj cykꞌoj xjal, bixsen e jaw meltzꞌaj ke xjal, bix oc ten ke xjal kꞌojlel tiꞌ tja Jasón, jaaꞌj taꞌ tposada Pablo cyuya ke tuya. Cyaj xsunxin etz cyiiꞌnxin Pablo tuya Silas tuꞌntzen cyxiꞌ kꞌoꞌnxin cye xjal te tnom.

6Pero min e cnet Pablo tuya Silas tunwen. Entonces bixsen e cytzuyxin Jasón, bix etz kitet-xin junx tuya cabtl ocslal cywitz ke cawel tuj tnom. Bix akꞌ ke xjal s̈-il cye cawel:

—Kej xjal Pablo tuya Silas tuj cykil twitz txꞌotxꞌ o cwaꞌ tiꞌ nim xjal cyuꞌn tuꞌn cyoc meltzꞌaj yuwin tiꞌ cawel te Roma. Juꞌtzen tten nchi jyon kꞌoja. Matzen cub cymeltzꞌen twitz txꞌotxꞌ, bix ya ma chi ul tzalu tuꞌn juꞌx bint cyuꞌna.

7Pero lutzen Jasón kꞌiꞌn kuꞌna. Jatzen xinja o kꞌinte cyexin tja. Ejeeꞌtzen xina bixsen cykil ke ocslal ma chi oc meltzꞌaj kꞌojlel tiꞌ tley cawel te Roma. Nbyaꞌntzen cyuꞌnxin ka at juntl xin cawel mas nintzaj, junxin cawel Jesús tbi. ¡Qꞌueyl xjal ke cyeja!―tz̈itzen ke judío cyuya kaꞌ xjal cye cawel.

8Tejtzen toc cybiꞌn kej yol juꞌwa, cykilxsen ke xjal bixsen ke cawel e jaw kꞌojl.

9Entonces bixsen el cyiiꞌn cawel pwak tiꞌ Jasón bixsen cyiꞌ ocslal, bix e xiꞌ cytzakpetkexin, bixsen e xiꞌ kbet cyexin:

—Ya baꞌntzen cyexa. Ojtzen cyex Pablo cyuya ke tuya tzalu, cꞌaal kmeltzꞌuꞌnke cyey cypwak―tz̈i tzunkexin te Jasón.

Tej tpon Pablo tuya Silas tuj tnom Berea

10Entonces texsen kꞌij, te koniyan, cykil ke ocslal ex chkꞌoꞌncye Pablo, Silas, bixsen Timoteo tuj tnom te Berea. Tejtzen cyponxin, bix ocxkexin tuj camon jaaꞌ te xnakꞌtzabl tyol Dios cye judío.

11Kej xjal judío najl tuj tnom te Berea mas baꞌnke xjal cywitzj xjal najl tuj tnom te Tesalónica. Bix listo eteꞌ xjal te ebil tyol Pablo, bix nim oc ten cycꞌuꞌj xjal tiꞌ tyol Dios. Cykilxsen kꞌij e cyeyen ke xjal tiꞌj tyol Dios tzꞌiꞌben, laꞌtzen ka junx taꞌ tuyaj tyol Pablo.

12Cwa tkꞌonte tumel nim xjal judío ocslan tiꞌ Jesús. Bix nim xjal griego ocslan, bix oc nim nintzaj xinak bix ke nintzaj xuuj tajlal ocslal.

13Pero tej cybinte ke judío te Tesalónica nkbaꞌn Pablo tyol Dios tuj tnom te Berea, jax juꞌx cyexin bix e xiꞌkexin jatzewe, bix akꞌkexin txcoltz il juntl maj tuꞌn cyoc chil xjal tiꞌ Pablo.

14Pero ke ocslal te Berea lwewa e xiꞌ cychkꞌoꞌn xjal ja Pablo tuj mlaj txꞌotxꞌ ttziiꞌ mar. Bix e cyaj Silas tuya Timoteo tuj tnom te Berea.

15Cab tzunxin ocslal te Berea e xiꞌ ẍklunte Pablo tuj tbe. Cwa cyponxin tuj nakch tnom te Atenas tuj ttxꞌotxꞌ Grecia. Jatztzen e tkbaꞌ Pablo cye ke tuya tuꞌn cymeltzꞌajxin tuj Berea bix tuꞌn t-xiꞌ cysmaꞌnxin Silas tuya Timoteo tuj tnom te Atenas, tuꞌn toc cymojban cyiibxin lwewa.

Tej tpon Pablo tuj tnom Atenas

16Nayontzen Pablo tuj Atenas tuꞌn cypon Silas bix Timoteo. Joocꞌtzen nayonxin, bix e tilxin nim sant nchi oc naꞌn xjal Dios twitz, bix oc bisenxin tiꞌj.

17Bix ocx Pablo cyuj camon jaaꞌ te yolel cyuya xjal judío bix cyuya xjal yaaꞌn judío n-oc ebinte Dios. Bix juꞌx tuj nin plaza e xiꞌ Pablo jaca kꞌij te kbalte tpocbal Jesús te cykilj xjal at jatzewe.

18Bix jatztzen tuj plaza akꞌake yolel tuya Pablo cab xjal epicúreo bixsen cab xjal estoico. Kej xjal epicúreo jatzen jun cloj n-eꞌla tuj cywitz jaj ti jilel ttz̈yal at twitz txꞌotxꞌ tzin cynaꞌn xjal, jatzen il tiꞌj. Yal tzun kej estoico, ejeeꞌtzen xjalj n-eꞌla tuj cywitz ka jaca juun xjal tcuya taꞌ ti tsuerte. Mintiiꞌ tuꞌn tcub tchꞌixbeꞌn, tuꞌntzen baꞌn ttema jun xjal tuya twitz txꞌotxꞌ. Attzen jun cyexin oc xmucchante Pablo. Tz̈i tzunxin cyjulu:

—¿Ti toc tuꞌnj jun chtꞌol min weꞌ tyolen?―tz̈itzen cab.

Bix aj ttzakꞌbeꞌn cabtl:

—Jacꞌa tej nkbaꞌn texin yol tiꞌ cab acꞌaj dios. Laꞌ tiiꞌntzenke―tz̈i tzunkexin. E xiꞌtzen cybisen xinj juꞌwa, cuma nyolen Pablo tiꞌj jun xjal otk jatz itzꞌj tuj cyamecy.

19Bix e xiꞌ cyiiꞌn ke epicúreo bix ke estoico ja Pablo twiꞌ jun witz Aerópogo tbi. Jaaꞌj cychmona cyiib jxin crinsipal te tnom te nincꞌul tiꞌj. Bix e xiꞌ cykanenxin te Pablo:

—Ma tzꞌoc kbiꞌna jay nyolena tiꞌ juntl acꞌaj yol. Txꞌolbantz keya jyol nbaj tkbaꞌna.

20Jtey tzin tkbaꞌna jun wikxitl. Kajtzen ke kbi―tz̈itzen ke epicúreo te Pablo.

21Tz̈i tzunkexin juꞌwa, cuma kej xjal te Atenas bixsen ke xjal te nakch najl tuj Atenas nim cye xjal cyanem tuꞌn cyyolen tiꞌ jun acꞌaj yol.

22Bix e cub weꞌ Pablo cyxol epicúreo twiꞌ jwitz te Aerópogo, bix aj ttzakꞌbeꞌnxin:

—Key taat te Atenas, o tzꞌoc ncyeꞌyen cyey nim nbaj cybisena tiꞌj ti tten tuꞌn toc mas takꞌ ke cydiosa cyey.

23Cyey junxsen maj nuk nchi naꞌna ke cydiosa. Nimal xsunkey tuj cyreligióna. Jatzen oc ncyeꞌyen tej wiyꞌ cyeyꞌlec tej jun cynaabl Dios simyent xak jaaꞌj nbyaꞌncꞌa cyjulu: “Ja simyent xak lu te tej xin Dios min-al itzkil twitz.” Juꞌtzen toc tuꞌnj tzꞌiꞌbenc twitz simyent xak. Jaꞌle tzuna cxeꞌltzen nkbaꞌn chꞌin tiꞌj xin Dios cyey n-oc cybiꞌn pero min cytzkiꞌna twitzxin.

24Jxin Dios lu jatzente mero Diosj, binchal cykil twitz txꞌotxꞌ. Jaxin taaw cyaꞌj bixsen twitz txꞌotxꞌ entera. Bix tej xin Dios lu min tzꞌajben texin jaaꞌ tisenj nbint cyuꞌn xjal tuꞌn tten jun tlugar.

25Texin min tzꞌajben texin tonbil juntl xjal. Tex texin. Pero ja tzunxin kꞌol chunkꞌlal te cykil xjal tuꞌn titzꞌj.

26Jaxin e cub binchante tneel xjal, bix tiꞌj tzunj xin xjal lu o tzꞌela itzꞌj cykil xeꞌchel. Jaxsen Dios o tzꞌel tz̈itente cye xjal te nojsal twitz txꞌotxꞌ, bix jax Dios o kbante laꞌ niꞌ chꞌin tyem ctemel jun wik xeꞌch, bix jaaꞌ pomnina baj tmojon.

27Bix o cub tbinchaꞌn Dios xjal tuꞌn toc tipen tuꞌn tlonte twitz Dios. Taj Dios tuꞌn cykil xjal jyonte texin. Bix alj xjal ma jyonte texin, cnetelxin, cuma te Dios nka taꞌ texin tiꞌ cykil xjal. Binne texin tten te tuꞌn tyeecꞌante tiibxin.

28Ja Dios binchal ke. Jaxin kꞌoltz kchunkꞌlal. Jatza eꞌla itzꞌj koꞌ tiꞌjxin. Tikꞌch nbint kuꞌn te texin t-xtalbilxin. Ejeeꞌx ootxa xjal o cyaj tzꞌiꞌbente: “Ejooꞌ tcwal Dios, cuma ja Dios o binchante ke,” juꞌtzen tcyajlen cytzꞌiꞌben ootxa xjal te cyey.

29Katzen juꞌwa ka tcwal Dios ejooꞌ, mintzen txiꞌ kbisen tiꞌj ka jxin Dios o tzaj kꞌonte kchunkꞌlal tisen oro, ma plata, ma xakxin, ma ti jilel juntl baꞌn tbaj tbinchaꞌn jun xjal tuya tkꞌab. ¡Titzen jilel juꞌwa!

30Ttzkiꞌn Dios ka at nim xjal tuj cykil twitz txꞌotxꞌ min tzꞌel tniyꞌ tiꞌj ka jaxin mero Dios. Pero ma pon tyem tuꞌn ttzaj tkꞌoꞌn Dios tuꞌn tel cyniyꞌ xjal tiꞌj jakꞌch tumel tuꞌn miꞌn chi oc lpe cyiꞌj nicꞌbil diosa, tuꞌntzen cyoc lpe tiꞌjxin.

31Ja lu junx maj il tiꞌj, cuma o tzaj tkꞌoꞌn Dios jun kꞌij tzul. Oj tul jkꞌij, jaxin cxeꞌl nincꞌunte xjal twitz cykil twitz txꞌotxꞌ. Jaca juun xjal ckꞌilte laꞌ alcyej te, laꞌ ti jilel xbint tuꞌn. Ja Dios tzul kꞌonte stis te cykil xjal tuꞌn jun xjal o tsicyꞌxin te nincꞌul. Jatzen xjalj Jesús. O jaw tiiꞌn Dios jaxin tuj cyamecy. Juꞌtzen o tniyꞌbe Dios ka ja Jesús cꞌoquel te nincꞌul―tz̈i Pablo. Juꞌtzen tten tyolen Pablo cyuya xjal te Atenas.

32Cabtl tzunxin tocx tmoj crinsipal, toc cybiꞌnxin ka at jun xjal jaxxix otk jatz itzꞌj tuj cyamecy, bix akꞌ jawel tzeꞌnkexin, cuma min el jax tuj cywitzxin. Pero cabtlxin e kbante:

—Cutzen tbiꞌnc. Ka yaaꞌn cꞌoquel kbiꞌn juntl maj juntl kꞌij cyiꞌj yola―tz̈i tzunkexin tuya mas cyanemxin.

33Jaxsen e pona baj twiꞌ yolj, bix etz Pablo cyxol xjal.

34Tejtzen tetz Pablo, attzen cabxin oc lpe tiꞌ Pablo, bix oc cyocslaꞌnxin tyol Pablo. Dionicio jatzen jun xinj tocxxin cymoj ocsal, bix ocxe te ocslal. Bix cabtl xjal ocslan, tuyaxa junxuj xuuj Damaris tbixuj.