1 CORINTIOS 12 - Mam of Todos Santos -- Guatemala Unicode

Ejooꞌ ocslal, o tzaj tkꞌoꞌn Espíritu Santo jun kaakꞌen

1Key hermano, ya waja txiꞌ nkꞌumena cyey jun tumel tiꞌj ti tten tuꞌn cyakꞌanana junx tuj taakꞌen Dios tjakꞌ tcawbil Espíritu Santo. Il tiꞌj tuꞌn tel cyniꞌya tiꞌj.

2Tej mitknaꞌx cyocslana, tej eteꞌcxa tjakꞌ cycawbil biman, cytzkiꞌntla tuꞌn cyipemal biman e xiꞌ kitetkey tuꞌn cyoc lpey cyiꞌ sant cyimne.

3Juꞌ tzunj nxaꞌ nkbaꞌna tuꞌn toc cycꞌuꞌja tiꞌj, cuma at caꞌba wik espíritu tuꞌn toc ten cawel cyey. Atte biman, bix atte Espíritu Santo. Cxeꞌl nkꞌumena cyey ti tten tuꞌn tel cyniꞌya tiꞌj alcyej ncawen cyiꞌja oj nchi yolena. Ka at jun xjal nxiꞌ sbunte Kaaw Jesús, ktzkiꞌntl yaaꞌnte Espíritu Santo njaw kꞌinte taakꞌxin. Pero ka at jun xjal nkbante “Ja Jesús Kaaw,” ka tz̈i juꞌwa, ktzkiꞌntl Espíritu Santo njaw kꞌinte taakꞌxin, cuma te biman mlay txiꞌ tkbaꞌn ja Jesús Kaaw.

4Tujtzen cywitza nuk jun wik akꞌuntl cꞌajbel tuj taakꞌen Dios. Pero cxeꞌl nkbaꞌna cyey tuj taakꞌen Dios, at nim wik kaakꞌen, bix kꞌoꞌn tuꞌn Espíritu Santo te teeylex juun taakꞌen. Pero amale jacat juun ocslal tecꞌax taakꞌen, jax Espíritu Santo o tzaj kꞌonte cykilca, bix junx Espíritu Santo ncawen tibaj cykilca taakꞌen Dios.

5Bix amale chꞌimacꞌat wik akꞌuntl at cyxol ocslal, cykilca koꞌ nko ajben te junx Kaaw.

6Bix amale chꞌimacꞌat tten cyuꞌn ocslal tuj taakꞌen Dios, pero junx Kman Dios taaw tibaj cykilca.

7Ntzaj tkꞌoꞌnte Espíritu Santo te jaca juun ocslal alcye baꞌn tbint tuꞌn, tuꞌntzen tajben cye niyꞌtl ocslal.

8At juun ntzaj tkꞌoꞌn Espíritu Santo tuꞌn ttzaj mas cynaabl. Bix at juuntl ntzaj tkꞌoꞌn Espíritu Santo tuꞌn cytzket chꞌintl tiꞌj.

9Bix at juuntl ntzaj tkꞌoꞌn Espíritu Santo nim n-oc juch cycꞌuꞌj tiꞌj tuꞌn tbint nim cyuꞌn, cuma n-oc ke cycꞌuꞌj tiꞌ Dios cuma jaxin baꞌn tbint cykilca tuꞌnxin. Bix at juuntl ntzaj tkꞌoꞌn Espíritu Santo jun cyipemal tuꞌn cykꞌanen tiꞌ cyyabel xjal.

10Bix at juuntl nim cyipemal o cyiikꞌ tuꞌn Espíritu Santo tuꞌn tbint jun akꞌuntl jawnex cyuꞌn. Bix at juuntl baꞌn cyuꞌn tuꞌn t-xiꞌ cykꞌumen tyol Dios cye xjal. Bix at juuntl ntzaj kꞌoꞌn cyipemal tuꞌn tel cyniyꞌ tiꞌj ti niyꞌ tuj tcꞌuꞌj juntl, ka jax bix ka ẍtakꞌ, ka te Dios bix ka yaaꞌn te Dios. Bix at juuntl ntzaj kꞌoꞌn tuꞌn cyyolen tuj chꞌimacꞌa wika yol min tzꞌel cyniyꞌ tiꞌj. Bix at juuntl ntzaj kꞌoꞌn tuꞌn tel cyniyꞌ tiꞌj ti japenina jchꞌimacꞌa wik yol tzin cyyolen cabtl pero min tzꞌel cyniyꞌ tiꞌj.

11Ejeeyle tzunj lu baꞌn tbint tuꞌn juun ocslal, laꞌ ti cyaakꞌen. Pero jax Espíritu Santo nkꞌonte te cye, bix ja nkꞌonte te jaca juun laꞌ alcye tipemal taj takꞌ.

12Cxeꞌl nkꞌumena cyey jun techel. Tisencꞌa chꞌimacꞌa iken tuꞌn kxumlal najben te junx kxumlal, jaxse juꞌx ejooꞌ ocslal tuya chꞌimacꞌa kaakꞌen nko ajben te junx Cristo. Ejooꞌtzen ocslal tisen t-xumlal Cristo. Amale chꞌimacꞌat kbaj, pero junx elnina koꞌ, cuma mintiiꞌ caꞌba t-xumlalxin.

13Tej kocslan, Espíritu Santo e tzaj tchmoꞌn ejooꞌ tuꞌn at kmojbabl kiib. Judíole, yaaꞌnle judío, etoꞌcxle tjakꞌ tcawbil kpatrón, yaaꞌnle etoꞌcx tjakꞌ tcawbil kpatrón, cykilca koꞌ junx cloj elnina koꞌ, bix etoꞌc tuj tkꞌab Kaaw. Bix nuk oꞌcx junx Espíritu Santo at, bix o kcꞌam.

14Ejooꞌtzen ocslal tisen jun xumlalbaj. Yaltzen te jun xumlalbaj, nim iken tuꞌn. Yaaꞌn nuk junx iken tuꞌn.

15Nuket tz̈i jun kenbaj, “Yaaꞌn te xumlalbaj kenwe, cuma yaaꞌn inayena jawnex tisen jun kꞌabbaj,” nuket tz̈i juꞌwa, pero tex xumlalbajx kenbaj.

16Juꞌx ẍquinbaj, nuket tz̈i jun ẍquinbaj, “Yaaꞌn jun nintzaj tbakꞌ witzbaj kenwe. Juꞌ tzunj yaaꞌn te xumlalbaj kenwe,” nuket tz̈i ẍquinbaj juꞌwa, pero tex xumlalbajx ẍquinbaj.

17Nuket cykil xumlalbaj tbakꞌ witzbaj, ¿titzen tten tuꞌn nbinte? Bix nuket cykil xumlalbaj ẍquinbaj, ¿titzen tten tuꞌn tskun?

18Najben ẍquinbaj bix najben tbakꞌ witzbaj, bix najben cykilca iken tuꞌn xumlalbaj. Bix o baj tnincꞌuꞌn Dios cykilca jaaꞌ toca tajbelel.

19Katzen cykilca nuk tbakꞌ witzbajcꞌa iken tuꞌn jun xumlalbaj, ¿titzen tten tuꞌn tajben?

20Mlay tzꞌajben juꞌwa. Ẍquinbajle, tbakꞌ witzbajle, kenbajle, kꞌabbajle, taj jun xumlalbaj cykilca tuꞌn toc te junx xumlalbaj.

21Tbakꞌ kwitz mlay txiꞌ tkꞌumen te kkꞌab, “Tey yaaꞌn juꞌ tisen inayena. Juꞌ tzunj min tzꞌajbena we.” Jax juꞌx kwiꞌ, ka nxiꞌ tkꞌumen kwiꞌ te kken, “Min tzꞌajben tey cuma junxitla bix ajnintza,” ka tz̈i juꞌwa, yaaꞌn jax tyol.

22Kej iken tuꞌn kxumlal yaaꞌn cyiw tuj kwitz, ejeeꞌtlpeje mas cyajbel.

23Bix kej iken tuꞌn kxumlal yaaꞌn tumel tuꞌn toc cyeꞌyet, ejeeꞌtl mas cꞌojlaꞌn kuꞌn. Oj cyoc kpotzen, nyeecꞌatzen jawnexke tuj kwitz,

24tisenx kej tuꞌn tchicꞌajax jawnex. Tuj twitz Dios jawnexsen kej iken tuꞌn kxumlal potzenke. Jaxin e binchante cykilca iken tuꞌn kxumlal, bix o baj tnincꞌuꞌnxin cykilca jaaꞌ toca tajbelel,

25tuꞌntzen tbaj cyonen cyiib tuj ttz̈yal, bix tuꞌntzen jaca juun cꞌajbel te kxumlal tuꞌntzen tel baꞌn.

26Ka at jun at nchyon te, cykilca ntnaꞌn tchyonel, bix ka at jun ntnaꞌn tzalajebl, cykilca ntzalaj tuya.

27Jaxse juꞌx ke ocslal. Ejooꞌtzen tisen t-xumlal Cristo. Jaca juun ke tisen jun iken tuꞌn t-xumlalxin.

28O baj tnincꞌuꞌn Dios nim wik ocslal te cyajbel cye cabtl. Bix o tzꞌoc tkꞌoꞌn Dios jaca juun ocslal jaaꞌ toca tajbelel cye niyꞌtl ocslal. At juun at cyipemal tuꞌn cyajben te apóstol tuꞌn t-xiꞌ cykꞌumen tpocbalj coꞌpbil tuꞌn Jesús cyxol xjal yaaꞌn ocslal. Bix at juuntl at cyipemal tuꞌn cyajben te profeta tuꞌn toc cycyiwsaꞌn cycꞌuꞌj ocslal tuj tyol Dios. Bix at juuntl at cyipemal tuꞌn cyajben te maystro te txꞌolbalte cye xjal ti japenina tyol Dios. Bix at juuntl o tzaj cyipemal tuꞌn tbint jun nintzaj akꞌuntl cyuꞌn. Bix at juuntl o tzaj cyipemal tuꞌn cykꞌanen cyyabel xjal. Bix at juuntl at cyipemal te onlcye xjal. Bix at juuntl at cyipemal te nicꞌulte bix cawel tiꞌ jun akꞌuntl. Bix at juuntl at cyipemal tuꞌn cyyolen tuj juntl wik yol min tzꞌel cyniyꞌ tiꞌj.

29Cxeꞌl nkanena cyey, ¿atpa cyipemal tiꞌj cykilca ocslal tuꞌn t-xiꞌ cykꞌumen tyol Dios cye xjal? ¿Atpa cyipemal tiꞌj cykilca tuꞌn toc cycyiwsaꞌn cycꞌuꞌj niyꞌtl ocslal? ¿Atpa cyipemal tiꞌj cykilca ocslal tuꞌn t-xiꞌ cyxnakꞌtzaꞌn cye xjal ti toc tuꞌn tyol Dios? ¿Atpa cyipemal tiꞌj cykilca ocslal tuꞌn tbint jun nintzaj akꞌuntl cyuꞌn?

30¿Bix atpa cyipemal tiꞌj cykilca tuꞌn cykꞌanen cyyabel xjal? ¿Bix atpa cyipemal tiꞌ cykilca tuꞌn cyyolen tuj juntl wik yol min-al n-el tniyꞌ tiꞌj? ¿Bix atpa cyipemal tiꞌ cykilca tuꞌn tcub cychꞌixbeꞌn ja juntl wik yol tuꞌn tel cyniyꞌ xjal tiꞌj? ¡Min! Yaaꞌn juꞌwa. Teeylex juun tuya taakꞌen kꞌoꞌn tuꞌn Dios.

31Yaltzen cyey, jaca juun cyey cyaja tuꞌn cyoca tuj cyaakꞌena mas jawnex tuj cywitza. Baꞌnte tuꞌn cyjyona jun akꞌuntl jawnex, pero cxeꞌl nkꞌumena cyey ti tten tuꞌn tbint jun mas baꞌnxix cyuꞌna.