HEBREOS 8 - Mam of Todos Santos -- Guatemala Unicode

Jun acꞌaj trat o bint tuꞌn Cristo mas baꞌn twitzj kꞌanak trat

1Key hermano, alcyej nxiꞌ nkbaꞌn ja tzunj lu: At jun nintzaj kpala. Jaxin mas jawnex cywitz cykil pala te ootxa. Bix nuk jacꞌaxin jun pala il tiꞌj o japaxin tuj cyaꞌj jaaꞌ ncawen Dios tibaj cykilca, bix o cub kexin tuj tmankꞌab Dios.

2Jatzen nakꞌanana te pala tuj mero ttxuylal tuj cyaꞌj Dios binchalte. Yaaꞌntzen nakꞌanana tuj nintzaj tja Dios cyxol xjal judío xjal binchalte, bix nuk techel tiꞌj mero ttxuylal at tuj cyaꞌj.

3Yaltzen cyaakꞌenj cykilca nintzaj pala tzalu twitz txꞌotxꞌ, jatzen cyaakꞌenj te oylxte cotz bix chojbil il te Dios. Juꞌtzen tten cyxol ke pala te twitz txꞌotxꞌ, bix jax juꞌx te Jesús tuj cyaꞌj, jax il tiꞌj tuꞌn t-xiꞌ toyen jun chojbil il cyiꞌ xjal. Kej xin pala te twitz txꞌotxꞌ, nuk nxiꞌ cyoyen alimaj. Pero te Jesús, jaxin o txiꞌ toyen tiibxin te junx maj.

4Nukettzen tcub Jesús twitz txꞌotxꞌ, yaaꞌntetle pala te oylxte chojbil kil, cuma tzin tkbaꞌn tley Moisés at-x jun cloj nchi ajben te pala. Juꞌ tzunj min tzꞌajben Jesús te pala twitz txꞌotxꞌ, sino tuj cyaꞌj.

5Ootxa, jatzen Dios e cyaj tyol tuꞌn tbint jun nintzaj jaaꞌ jaaꞌ akꞌanana ke pala. E tajbexin cyoybil xjal bix tja Dios tzalu twitz txꞌotxꞌ nuk jun xlequemal tej at jawne, bix nuk jun techel tiꞌj jun jaxxix at tulel, jaj Kman Jesús jun mero oꞌcxcꞌa chojbil il at pomlel twitz Dios tuj mero tlugar Dios. Kcyeꞌyenc ti toc tuꞌn Dios te Moisés tej ttzyet tbinchante tneel nintzaj tja Dios. Tz̈i Dios cyjulu: “Kꞌoꞌnc tcꞌuꞌja tiꞌj tuꞌn tbint tja Dios tisex e xiꞌ nyeecꞌan tey tej tjapey twiꞌ witz,” tz̈i Dios te Moisés. Ja lu nyeecꞌan tej tcyaj tkꞌumen Dios te Moisés ja techel lu, nuk te jun techel tiꞌ jun ttxuylal.

6Juꞌ tzunj kej pala najbenke tuj tja Dios tzalu twitz txꞌotxꞌ nuk techlal tej ttxuylal at tulel. Pero yaltzen jaꞌlewe, ja tzunj ttxuylal at tulel o tzul, bix jax mas jawnex bix mas najben jun ttxuylal twitz techlal. Bix yaaꞌn nuk jaj lu, sino tuyax tiꞌj acꞌaj trat e nincꞌun Jesús tuya Dios kiꞌj mas baꞌn twitzj trat te nejl. Mas baꞌn acꞌaj trat, cuma mas e bint twitzj tneel.

7Tneel trat min ajben tuꞌn cypon xjal sakxix tiꞌ cyil te junx maj. Nuket e bint tuꞌnj tneel trat te Dios, mintle e tzaj juntl te tcab.

8Cxeꞌl nyeecꞌana cyey tuj tyol Dios tneel trat e cyaj cye xjal yaaꞌnxix tzꞌakl bix juꞌ tzunj il tiꞌj tuꞌn tul juntl acꞌaj. Tuj tyol Dios tz̈i Dios cyjulu: “Cpomel jun kꞌij oj tcub nkꞌoꞌn jun acꞌaj trat cyuya xjal aj Israel bix aj Judá.

9Ja tzunj acꞌaj trat yaaꞌntzen juꞌtl tisenj e cub bint wuꞌna nejl cyuya kej ootxa cyxeꞌchel tej cyetz wiiꞌna tuj txꞌotxꞌ te Egipto. Min e cybi tzunj trat nejl. Juꞌ tzunj e cyjaꞌ nkꞌoꞌnke tiꞌjxe.

10Ja tzunj trat cwel nkꞌoꞌn cyuya xjal aj Israel laꞌ alcye jun kꞌij juꞌtzen ctemela julu. Cꞌoquex nkꞌoꞌn nyol tuj cyanem xjal, tuꞌntzen cyocslante xjal nyol. Yaaꞌn tisen nejl, nuk twitz jun xak e cub bint te tzꞌibbil e cyjaꞌ ntzꞌiꞌben nyol. Bix inayen tzuna chin oquel te Cydios, bix ejeeꞌtzen chi oquel te nxjala.

11Ojtzen tel cyniyꞌ cykil ke xjal wiꞌj, mintiiꞌ il tiꞌj tuꞌn toc tkꞌumen jun xjal cye cabtl tuꞌn tel cyniyꞌ wiꞌj, mi nuket cyeke tuya bix mi nuket cyeke te tja, cuma tuj tzunj kꞌij tzul cyajbe xjal nyola yaaꞌn lomoꞌn ke xjal tiꞌj sino tuꞌn cyex cygana, tele ajnintz xjal bix tele nmak xjal.

12Bix cwel nnajsaꞌna cyil, bix mlay tzaj nnaꞌntla juntl maj,” tz̈i Dios tuj tyol Dios.

13Tej tyolen Dios tiꞌj jun acꞌaj trat, nyeecꞌan ya tuj twitzxin ya kꞌanaktl trat te nejl. Otk tzꞌoc tley Moisés te kꞌanak, bix ktzkiꞌn alcyej n-oc kꞌanak, ya tuꞌn tex xeꞌt, ya min tzꞌajbentl.