LOS HECHOS 16 - Mam of Todos Santos -- Guatemala Unicode

Tej t-xiꞌ tjunan tiib Timoteo tuya Pablo bix Silas

1Cyetz tzunxin tuj ttxꞌotxꞌ Cilicia, bix e pon Pablo juntl maj tuj kej tnom te Derbe bix Listra, junx tuya tuyaxin Silas.

Tujtzen tnom te Listra, attzen jun xin ocslal Timoteo tbixin. Ja tzunj xin Timoteo tal junxuj ocslal judío, pero texin tman te griego.

2Ejeeꞌtzen ocslal te Listra bixsen te tnom Iconio baꞌnxsen cyyolxin tiꞌ Timoteo.

3Tajtzen Pablo e xiꞌ jxin xjal te cyuyaxin tuj be, bix jax baꞌnte Timoteo tuj twitz. Pero ttzkiꞌn Pablo ka at nim xjal judío cyuj tnom jaaꞌ xaꞌninakexin. Tuꞌntzen mintiiꞌ kꞌoj cyuyaj xjal judío lu, bix el tcpuꞌn Pablo ttzꞌumel twiꞌ ttzꞌalbil Timoteo, cuma cykil xjal itzkilte ka tcwal griego jaxin, bix mintzentiiꞌ cye xjal griego cycostumbre juꞌwa.

4Entonces bixsen akꞌke Pablo, Silas, bixsen Timoteo te betel. Tujtzen jaca juun tnom e xaꞌkexin kbalte cyej xjal yaaꞌn judío ti otk cub cyniqꞌuen t-xel Jesús tiꞌj bixsen ke tij xjal tuj Jerusalén alcye tbinlel cyuꞌn xjal ocslal yaaꞌn judío.

5Juꞌtzen tten cyoc chmet ke ocslal tuya mas ttz̈yal, bix juꞌ tzunj mas cyipemal cyuj tja Dios, bix e xiꞌ tz̈ꞌiy mas cybaj ocslal.

Tej tocx twitziyꞌ Pablo tiꞌj xjal te Macedonia

6Tuj tzunj tyem lu tajtzen Pablo bix xsunj caꞌbatlxin e xiꞌkexin elne te tuj ttxꞌotxꞌ Asia te kbalte tyol Dios. Pero te Espíritu Santo jun wikxitlte txolen kꞌiꞌn tuꞌn. Min e tcuya tuꞌn cyxiꞌxin tuj Asia. Entonces bix exkexin tuj tnom te Frigia bix tuj Galacia.

7Yajcꞌatl cyponxin twitz mojón tuya Misia. Tejtzen cyponxin tuj Misia, e cyajbe tzunxin tuꞌn cyxiꞌxin mas jawne tej lugar te Bitinia, pero juntl maj min e tcuya Espíritu Santo te Jesús tuꞌn cyxiꞌxin.

8Entonces bixsen e xiꞌkexin te elne cyuj tnom tuj Misia. Tejtzen cyponxin tuj mlaj txꞌotxꞌ, tuj tnom te Troas, jaaꞌj in tina weya inayena Lucas.

9Tetzen koniyan, bix ocx jun twitziyꞌ Pablo. Jatzen oc tcyeꞌyenxin ja lu. Attzen junxin xjal waꞌlcꞌa. Te Europa jxin xjal, tej lugar te Macedonia. Toc tzunj xin xjal kanlte te Pablo cyjulu: “Ctiyꞌtz tuj mar. Quixtey tzalu tuj Macedonia te kꞌumlte keya ti tten jtyol Dios,” tz̈itzen ttxocan xjal.

10Tejtzen ttzaj tnaꞌn tiib Pablo tuꞌn twitziyꞌ, bixsen e cub kuꞌna ka jun tyol Dios, bix ja Dios otk txconte keya tuj Macedonia. Entonces lwewax e jaw bint koꞌya tuꞌn kxiꞌya tuj Macedonia.

Tej cyocx Pablo tuya Silas tuj tzeeꞌ tuj tnom Filipos

11Bix ocx koꞌya tuj jun barc, bix etz koꞌya tuj Troas, bix iyꞌx koꞌya tuj mar jiquen tejxe kpona tuj txꞌotxꞌ tuj mar Samotracia tbi. Tetzen juntl kꞌij bix iyꞌ koꞌya tuꞌn kpona tuj ttxꞌotxꞌ Macedonia, tuj jun tnom Neápolis.

12Tujtzen Neápolis e xaꞌ koꞌya tuj tnom te Filipos, jun tnom nintzaj tuj ttxꞌotxꞌ Macedonia, jun tnom jaaꞌ najla nim xjal te Roma.

13Tejtzen tpon jkꞌij te ajlabl, jkꞌij te sábado, bix etz koꞌya ttzi pwert te tnom, tuꞌn kpona ttziiꞌ nimaꞌ. Jatztzen e xaꞌ kej xjal judío tej tnoma te naꞌl Dios. Tejtzen cypon, attzen cabxuj xuuj cychmon cyiib, bix e cub ke koꞌya, bix akꞌ koꞌya yolel cyiꞌjxuj.

14Juntzen cyej xuj xuuj Lidia tbixuj. Otk tzajxexuj nakch te jun tnom te Filipos te ttxꞌotxꞌ Tiatira. Jatzen taakꞌenxuj te qꞌueyl xbalen tuya tilbil tisen t-xmaquel San Juan. Jatzen tilbil jmas jawnex te cyxbalen xjal Romano. Ebil tyol Dios texuj, bix oc tenxuj ebil tyol Pablo. Bix e tjakꞌ Dios tanemxuj tuꞌn toc tbiꞌnxuj yol, bix oc tocslanxuj.

15Bix e bautizarj Lidia cyuyaxj xjal najl tjaxuj. Yajcꞌatltzen bix e tzaj tkbaꞌnxuj keya:

—Katzen jaxxix baꞌn tuj cywitz tiꞌj ma tzꞌoc wocslaꞌn jyol te tcoꞌpbil Jesús, quixtakey nja tuꞌn cyposadayina te kꞌumlte keya mas tiꞌ Jesús―tz̈i Lidia te Pablo tuya Silas bixsen te Timoteo bixsen we. Juꞌtzen tten toclen tcubsaꞌnxuj twitzxuj keya. Cwatzen kcuyan teya kcyaja tjaxuj.

16Tetzen juntl kꞌij bix e xiꞌ koꞌya tuj lugar jaaꞌj nchi naꞌna judío Dios. Pero tujtzen be ttziiꞌ nimaꞌ oca noj koꞌya tiꞌ juntxin xuuj. Pero jtxin xuuja tzyuꞌntxin tuꞌn biman najl tuj t-xumlaltxin. Tuꞌntzen biman ncyjaꞌ tuj tzinen tuꞌnj txin xuuj ti pjelte jun xjal mas yaj. Pero at cab xjal taaw jtxin xuuj. Nimxsen pwak e cycama jxin xjal taawtxin, cuma chjoꞌn tzuntxin tuꞌn tkban tetxin tsuerte juun xjal.

17Pero bixsen oc lpetxin tiꞌ Pablo bix kiꞌja tuj be. Njawxe s̈-intxin:

—Kej xjal lu nchi ajben cyeja tej xin jaxxix Dios, jxin Dios tibaj cykil. Bix jyol tzin cykbaꞌn cyey, jatzente be ja te coꞌpbil―tz̈i tzunj txin xuuj tjaw ts̈iꞌntxin.

18Pero e jaw kej ts̈itz̈ꞌbil jtxin xuuj jaca kꞌij, tejxe ttzaj kꞌojl Pablo. Bix e xiꞌ tkbaꞌn Pablo tej biman najl tuj t-xumlaltxin:

—Biman, tuꞌn tajwalel tbi Jesús, cxeꞌl nkbaꞌn tey tuꞌn tetz tuj t-xumlal jxuuja―tz̈i Pablo. Yalj kaꞌ xewbaj n-etztl naj tuj t-xumlaltxin.

19Tejtzen toc cycyeꞌyenxin tej tetz biman tiꞌjtxin, bixsen e jaw kꞌojl kej xin taawtxin, cuma el cyniyꞌxin tiꞌj ka ya mintiiꞌtl tipemaltxin te kbal suerte. Yaltzen cycꞌaꞌs̈xin tiꞌjtxin, otktzen cub baj. Bixsen e cytzuyxin Pablo tuya Silas, bix e xiꞌ kꞌiꞌnkexin cywitz cawel tuj tnom tuj maa nim plaza.

20Tejtzen cypon kꞌiꞌnxin cywitz nmak cawel, bixsen ocx cyniqꞌuen jxin taaw jtxin xuuj cyiꞌ Pablo tuya Silas cyjulu:

—Kej xjal lu judíoke. Nuktzen tikꞌch ntzaj cykꞌoꞌn tuj ktanem.

21Lu ke nchi xnakꞌtzan xjal tuya juntl costumbre yaaꞌn tisenj ke kley, bix jaj mintiiꞌ tuꞌn toc kbiꞌn, cuma te Roma koꞌke―tz̈itzen ke ẍtakꞌel.

22Tejtzen toc ebiꞌn jyol juꞌwa, cykilxsen xjal e jaw kꞌojl, bix akꞌ ocax cykbaꞌn xjal kaꞌ cyyol cyiꞌjxin. Bixsen e xiꞌ cykbaꞌn cawel tuꞌn tel cyxbalen Pablo tuya Silas, tuꞌntzen ttzyet cypjujxin tuya tzeeꞌ.

23E bajxsen pjetkexin cyiw, bixsen ocxkexin tuj tzeeꞌ. Bixsen e xiꞌ cykbaꞌn cawel tej xin taaw tzeeꞌ tuꞌn cycꞌojlet-xin tuya nim cꞌojlaꞌn.

24Ja tzunj xin taaw tzeeꞌ taj tikꞌen texin yol juꞌwa, bixsen ocx tkꞌoꞌnxin ke Pablo maan t-xeeꞌxa tzeeꞌ tuj jun cwart min jaaꞌ baꞌn cyetzaxin, bix oc tkꞌoꞌnxin cyken Pablo tuya Silas tuj toyajil ke tij laaꞌn tzeeꞌ, tuꞌn miꞌn chi tzokpajxin.

25Tejtzen tpon chil akꞌbil, tocxsen Pablo tuya Silas tuj tzeeꞌ. Nchi naꞌnxin Dios bix nchi bitzenxin tiꞌ tbanel Dios. Yaltzen tnimal pres, nuktzen nchi ebinxin.

26Chꞌinnchꞌetzen ttzaj jun xcyaklajnab, bix e cub xitj t-xeeꞌyel tzeeꞌ. Cykil ke tlemel e jket, bix el coꞌpj cykilj cadena bix toyajil tzeeꞌ ẍipbel cye pres.

27Yal tzunj xin cꞌojlal cars, tej ttzaj tnaꞌn tiibxin, toctzen tcyeꞌyenxin cykil ke tlemel tzeeꞌ jaktl, bix etz tiiꞌnxin jun espada tuꞌn tcub tbyon tiibxin, cuma eꞌla tuj twitzxin cykil ke pres otk chi etz baj, bix ttzkiꞌn tzunxin ka tuꞌn tbyet-xin cyuꞌn cawel tuꞌn min tzꞌoc tcꞌuꞌjxin tiꞌj.

28Pero bix oc tcyeꞌyen Pablo juꞌwa, bix etz s̈-inxin cyiw tiꞌ cꞌojlal:

—Miꞌn cub tbyon tiiba, cuma cykilca koꞌke etoꞌctz―tz̈i Pablo.

29Tejtzen toc tbiꞌnxin tuj twiꞌ Pablo, bix e xiꞌ tsmaꞌnxin tuꞌn cytzaj kꞌit luz. Tejtzen cyul luz, bixsen ocxxin ajkelenxin jaaꞌj tocxa Pablo tuya Silas. Bix e jaw luꞌlenxin tuꞌn ttz̈i, bix e cub tzꞌakxin cywitz Pablo tuꞌn t-xiꞌ tyeecꞌanxin cykil tanemxin.

30Bix tujx naj tetz tiiꞌnxin ke Pablo tuj tzeeꞌ. Tejtzen t-xiꞌ tiiꞌnxin ke Pablo tjaxin, bix e xiꞌ tkanenxin:

—Key taat, ¿titzen cnbinchaꞌya tuꞌn ncoꞌpja tuj wila?―tz̈i tzunj xin cꞌojlal.

31Bix aj cytzakꞌbeꞌnxin:

—Ocslama Jesús, jxin Scyꞌoꞌn tuꞌn Dios, jxin taaw tikꞌch jilel. Juꞌtzen ctemeley bix cykil ke te tjay, bix chi coꞌpjel tuj cyila bixsen cawbil cyibaja―tz̈i tzunkexin.

32Bixsen e baj cykbaꞌnxin te cykil ke te tjaxin tikꞌch tten tyol Jesús.

33Texsen koniyan, bix e baj ttxjoꞌn jxin cꞌojlal kej is̈jnin tiꞌ Pablo bix Silas. Tbajtzen twiꞌj juꞌwa, ja tzunj xin jkol tzeeꞌ cyuyax ke te tjaxin e bautizarjkexin te techel ka otk chi ocslanxin Jesús.

34Tej cybautizarjxin, bix aj tiiꞌn jxin jkol tzeeꞌ ejeeꞌxin juntl maj tjaxin, bix e xiꞌ tkꞌoꞌnxin chꞌin cywaxin, bix ocx meltzꞌajkexin tuj tzeeꞌ juntl maj. Bix xsunj xin cꞌojlal tzeeꞌ bix ke te tjaxin e tzalaj ke xjal tuꞌn otk chi ocslan tyol Dios.

35Tejtzen kskix, bix e xiꞌ cychkꞌoꞌn nin cawel ke policía te kbalte tuꞌn cyetz tzakpet Pablo tuya Silas.

36Entonces bix e xiꞌkexin tuj tzeeꞌ. Tejtzen cyponxin, bix e xiꞌ tkbaꞌn jxin cꞌojlal te Pablo:

—Ma wiikꞌ jun tumel tuꞌn cyex tzakpeta. Quixtakey. Ya baꞌntzen cyexa tuj ttz̈yal―tz̈i tzunxin.

37Pero bix aj ttzakꞌbeꞌn Pablo:

—Min. Keya, aj Roma koꞌya. Yaaꞌn nuk tikꞌch xjalel koꞌke. Pero tiꞌj juꞌwa, min e tzaj cycꞌuꞌj kiꞌja tisenxix tten, sino e bajxsen cypjuꞌn ejooꞌya cywitz xjal tisen jun byol xjal. O ko octzen tuj tzeeꞌ twitz cykil xjal. Jaꞌle tzuna cyajtzen ko ex cyiiꞌna tuj ewjel. ¡Min! Yaaꞌn tumel. Ejeeꞌx cawel e cytzaj te kꞌilbax keya tuj tumel―tz̈i Pablo.

38Bix e xiꞌ cyiiꞌn policía ke tyol Pablo cye nin cawel. Tejtzen toc cybiꞌnxin, bix tej tel cyniyꞌxin tiꞌj ka aj Roma Pablo tuya Silas, bix e jaw luꞌlen tuj cychuꞌlxin, bix e tzaj ttz̈i cyiꞌjxin.

39Bix e xiꞌ ajkelenkexin tuj tzeeꞌ, bix e xiꞌ cykbaꞌnxin te Pablo tuya Silas:

—¡Nuksamkey, taat, cybajsama kila tiꞌj ti jilel xkbinchaya! Bix cxeꞌl kcubsaꞌna kwitza cyey tuꞌn cyexa tuj ja tnom lu, bix baꞌnxit cheꞌxa tuj cybey―tz̈itzen ke cawel.

40Bix e tcuya Pablo tuya Silas, bix etzkexin tuj tzeeꞌ bix tuj tnom te Filipos. Pero te mitknaꞌx cyexxin tuj tnom, bix e xiꞌkexin tja Lidia, bix e kꞌolbenkexin cye cykil ocslal, bix oc cynimsaꞌnxin cycꞌuꞌj.