ROMANOS 8 - Mam of Todos Santos -- Guatemala Unicode

Tuꞌn tipemal Espíritu Santo at acꞌaj kchunkꞌlal

1Pero yaaꞌn etoꞌtl tjakꞌ tcawbil il, cuma at kmojbabl kiib tuya Cristo Jesús. Ya min koꞌxtl tuj castiwa,

2cuma tzakpiꞌn koꞌ tjakꞌ tcawbil jley tzin tkbaꞌn aj il koꞌ bix il tiꞌj ko xeꞌl tuj cyamecy te junx maj. Tuꞌnj kmojbabl kiib tuya Cristo Jesús, ma ko el libre tjakꞌ ley, bix ma kꞌoj acꞌaj kchunkꞌlal tuꞌn Espíritu Santo.

3Jley e tkba il tiꞌj tuꞌn knimante, pero min e xcye tuꞌn knimante, cuma jknaabl aj il mintiiꞌ tipemal tuꞌn knimante. Pero e xcye Dios tuꞌn tnimj ley tej ttzaj tsmaꞌnxin Tcwalxin twitz txꞌotxꞌ tuꞌn toc te xjal tisen ejooꞌ, tuꞌntzen tbyet te chojbil kil, ejooꞌ aj il. Tuꞌnj tcyimlen Tcwalxin tisen xjal, cykiltzen il e chjet tuꞌnxin,

4tuꞌntzen koc jiquen twitz Dios tisenj tzin tkbaꞌn ley. Yaaꞌntzen etoꞌtl tjakꞌ tcawbil knaabl aj il, sino etoꞌtl tjakꞌ tcawbil Espíritu Santo.

5Ja tzunkej xjal eteꞌ tjakꞌ tcawbil ootxa cynaabl, nuktzen jaj ti taj cyxumlal ncub cybisen. Ja tzunkej xjal eteꞌ tjakꞌ tcawbil Espíritu Santo, ncubtzen cybisen tiꞌj ti taj Espíritu Santo.

6Ja tzunkej xjal nuk ncheꞌx lpe tiꞌj ti taj cynaabl aj il, chi xeꞌltzen tuj cyamecy. Ja tzunkej nchi jyon ti taj Espíritu Santo, attzen cychunkꞌlal te junx maj bix eteꞌ tuj ttz̈yal.

7Jknaabl aj il n-el tiiqꞌuen Dios. Tcyꞌi knaabl aj il tniman tley Dios, bix mintiiꞌ tipemal tuꞌn tbint tuꞌn.

8Juꞌ tzunj kej xjal eteꞌ tjakꞌ tcawbil cynaabl aj il, mlay chi japan tiꞌj ti taj Dios.

9Jatzen cyey, yaaꞌn tjakꞌ tcawbil cynaabla aj il eteꞌy, sino tjakꞌ tcawbil Espíritu Santo, cuma at Espíritu Santo tuj cyanema. Qꞌuelel cyniꞌya tiꞌj ka min ma kꞌoj Espíritu Santo tuꞌn Cristo te jun xjal, yaaꞌntzen t-xjalxin ja xjal.

10Pero ka at Cristo tuj cyanema, amale cymelet cyxumlala tuꞌn il, pero at cychunkꞌlala te junx maj, cuma jiquen eteꞌy twitz Dios.

11Pero jax juꞌx cjawel itzꞌj cyxumlala juntl maj. J-espíritu Santo at tuj cyanema, e takꞌ Dios cyey, jaxj Dios e jatz kꞌinte Jesús cyxol cyimne. Juꞌ tzunj cjawetz tiiꞌn Dios cyxumlala juntl maj tuj cyamecy, tisenxj e jatz tiiꞌnxin ja Jesús cyxol cyimne. Bix cbinel tuꞌnxin juꞌwa tuꞌn Espíritu Santo at tuj cyanema.

12Juꞌ tzunj, key hermano, mintiiꞌ nko oc chkꞌet tiꞌj tuꞌn t-xiꞌ kniman alcye tajbil knaabl aj il.

13Ka ma ko niman knaabl aj il, ko cymeltzen tuꞌn te junx maj. Pero ka tuya tonbil Espíritu Santo n-el kxooꞌn jkaꞌ taj knaabl aj il, ko camaltzen kchunkꞌlal te junx maj.

14At kchunkꞌlal te junx maj cuma tcwal Dios koꞌ. Kej ncheꞌx lpe tiꞌ Espíritu Santo, ejeeꞌtzen tcwal Diosja.

15Tcwal Dios koꞌ. Yaaꞌn nuk tmaanxin ejooꞌ. Ya mintl ko tz̈iyel twitz Dios tisen nejl, cuma n-el kniyꞌ tiꞌj o ko oc tcwal Dios. Juꞌ tzunj oj t-xiꞌ kkꞌolbeꞌn Dios, “Kman Dios” tz̈i kbel.

16Nxiꞌ kkbaꞌn juꞌwa cuma jax Espíritu Santo tzin tkbaꞌn tuj kanem tcwal Dios koꞌ.

17Cuma tcwal Dios koꞌ, ckiikꞌeltzen kkab te Dios, cuma ja tzunxin Kman. Bix ckiikꞌel kkab tuya Cristo, cuma niyꞌx qꞌuixcꞌaj kuꞌn tiꞌjxin, tisenx texin iyꞌx qꞌuixcꞌaj tuꞌnxin nejl. Ka etoꞌ tuyaxin amale niyꞌxet qꞌuixcꞌaj kuꞌn tuꞌn tlajxin, ko temeltzen tuyaxin oj tiikꞌen texin jawnex tkabxin.

18Pero amale niyꞌxet qꞌuixcꞌaj kuꞌn, pero tuj nwitza kej qꞌuixcꞌaj te jaꞌlewe yaaꞌn nimxix twitzj jawnex chojbil ctkꞌaꞌ Dios te cyxel laꞌ alcye jun kꞌij.

19Tuj tzunj kꞌij oj cyiikꞌente tcwal Dios cykab, cpomel baj twiꞌ cykilca qꞌuixcꞌaj twitz txꞌotxꞌ. Juꞌ tzunj, cykilca kej tbinche Dios nchi ayon tuya cykil cycꞌuꞌj alcyej kꞌij tzul.

20Kej tbinchbil Dios yaaꞌn tuj tbanel eteꞌ jaꞌlewe. Pero yaaꞌn cyuꞌnx tuꞌn cyten tuj il, sino tuꞌnj toclen tpaltel tuꞌn tneel xjal. Juꞌ tzunj nayet jbaꞌn tyem tzul tuꞌn cykilca,

21cuma cykilcaj e baj bint tuꞌn Dios ccoꞌpjel tuj tbeyel cyamecy oj tul cana jkꞌij tkꞌa Dios cykab tcwal.

22Jqꞌuixcꞌaj niyꞌx tuꞌn entera twitz txꞌotxꞌ jaꞌlewe tisen tchyonel tal jun xuuj. Niyꞌx tchyonel tuꞌn, pero tkꞌaꞌ jun tal. Juꞌx xsunj cykilca e bint tuꞌn Dios. At tuj tchyonel jaꞌlewe, pero nchi ayon tiꞌj baꞌn tzul.

23Bix yaaꞌn nuk ejeeꞌj e baj bint tuꞌn Dios at tuj tchyonel, sino kuyax. Amale ot tzaj tkꞌoꞌn Dios Espíritu Santo ke te yecꞌbilte tzul mastl mas yaj, pero niyꞌx tchyonel kuꞌn jaꞌlewe, cuma minaꞌx tpon jkꞌij oj tchicꞌajax te junx maj tcwal Dios koꞌ, jaxj kꞌij oj tkꞌonte Dios acꞌaj kxumlal.

24Tej kclet, eltzen kniyꞌ tiꞌj at ttzajlel tkꞌoꞌn Dios juntl baꞌn ke laꞌ alcye jun kꞌij. Nuket o tzul, yaaꞌntle il tiꞌj tuꞌn kyonte. ¿Ti cꞌoquel tyoꞌn jun xjal te nuket ya o kꞌoj?

25Pero minaꞌx klonte jchojbil ke tzul. Juꞌ tzunj miꞌn baj kpasensya tuꞌn kyonte j-acꞌaj kxumlal.

26Tisexsen kpasensya n-onen kiꞌj tuꞌn tiyꞌx qꞌuixcꞌaj kuꞌn, jax juꞌx n-onen Espíritu Santo kiꞌj tuꞌn tiyꞌx qꞌuixcꞌaj kuꞌn. Min ktzkiꞌn alcyej onbil cxeꞌl kkanen te Dios tuꞌn tiyꞌx qꞌuixcꞌaj kuꞌn, pero Espíritu Santo nnaꞌn Dios kiꞌj cyuya yol min cnet kuꞌn.

27Iyꞌnen tilbil Dios tiꞌj alcye niyꞌ tuj kcꞌuꞌj, bix n-el tniyꞌxin tiꞌj ti toc tuꞌn Espíritu Santo oj nnaꞌn Dios kiꞌj, cuma jnnaꞌn Espíritu Santo Dios kiꞌj, junx taꞌ tuyaj taj Dios te ke.

Cykilca cwel tiꞌj kuꞌn, nuk tuꞌn Cristo

28Amale niyꞌxet qꞌuixcꞌaj kuꞌn, pero ktzkiꞌn nakꞌanan Dios tiꞌj cykil qꞌuixcꞌaj n-oc kiꞌj, tuꞌntzen cyajben te onbil ke, ejooꞌj n-oc takꞌ Dios ke. Ncawen Dios tibaj cykilca nbaj, tuꞌntzen at jun baꞌn te ke, ejooꞌj at tuꞌn kpon tuj j-o baj tnincꞌuꞌn Dios tiꞌj te ke.

29Cykilca qꞌuelel baꞌn, cuma o baj tnincꞌuꞌn Dios juꞌwa. Jatxe tuj tneel ttzkiꞌn Dios alcyej xjal at tuꞌn cyxiꞌ lpe tiꞌj, bix jatxe tuj tneel o baj tnincꞌuꞌnxin tuꞌn toc knaabl tisenj te Tcwalxin, tuꞌntzen at nim cwal tisen Tcwalxin, Jesús, bix tuꞌntzen tchicꞌajax jtcwalxin mas jawnex cyxol cykilca cwal.

30Juꞌtzen e baj tnincꞌuꞌn Dios cyiꞌj kej xjal at tuꞌn cyoc lpe tiꞌjxin. E baj tnincꞌuꞌnxin tuj tneel tuꞌn koc te tcwalxin, bix tuꞌn jiquen koꞌ twitzxin tuꞌn t-xtalbilxin, bix tuꞌn tkꞌoj te ke jun jawnex kchunkꞌlal te junx maj, ejooꞌj jiquen twitzxin.

31¿Tiiꞌntzen tuj cywitza ja yol lu? Cuma o baj tnincꞌuꞌn Dios cykilcaj lu te ke, ¿pjelpatzen kcꞌuꞌj oj nchi kꞌojl xjal kiꞌj? Min. Mlay chi xcye kiꞌj, cuma Dios n-onen kiꞌj.

32Yaaꞌn ẍpiẍ Dios te ke, sino e tzaj tkꞌoꞌnxin Tcwalxin te ke tuꞌn tcyim te kxel cykilca koꞌ. Cuma o tzaj tkꞌoꞌnxin Tcwalxin te ke, juꞌ tzunj jaxte ctzaal tkꞌoꞌnxin cykilcatl xtalbil te ke.

33¿Atpa jun xjal jacꞌa tzꞌoc tkanbil twitz Dios kiꞌj, ejooꞌ t-xjalxin? Min-al, cuma o kꞌoj ke tuꞌn Dios tuꞌn jiquen koꞌ twitzxin tuꞌn Cristo.

34¿Atpa jun xjal jacꞌa kbante te Dios tuꞌn kxiꞌ tuj castiwa? Min-al, cuma at Cristo Jesús te onl ke. E cyimxin, bix e jatz itzꞌjxin juntl maj tuj cyamecy, bix at-xin tuj tmankꞌab Dios tuj cyaꞌj jaꞌlewe te yolel kiꞌj twitz Dios.

35Jnbaj kiꞌj, ¿tzimpa tyeecꞌan ka min tzꞌoctl kakꞌ te Cristo? ¡Min! Oj niyꞌx qꞌuixcꞌaj kuꞌn, oj nbaj kcꞌuꞌj, oj n-el cyiiqꞌuen xjal ejooꞌ bix nchi oc lpe kiꞌj te tzyulte ke, oj at takꞌ weyaj ke, oj mintiiꞌtl chꞌin kxbalen, bix oj at nim seyꞌpajlenel kiꞌj, bix oj cyaj xjal tuꞌn kcub byet, t-xol entera kej lu min tzin tyeecꞌa nweꞌ tkꞌakꞌbil tcꞌuꞌj Cristo kiꞌj.

36Tzin tkbaꞌn tyol Dios niyꞌx qꞌuixcꞌaj cyuꞌn kej t-xjal Dios. Tz̈i cyjulu: “E xiꞌ cykbaꞌn t-xjal Dios te Dios: ‘Nuk tuꞌnj t-xjala ejooꞌya, cocꞌcꞌa nchi jyon xjal kiꞌja tuꞌn kbyeta cyuꞌn. Tuj cywitz tisen carnel koꞌya tuꞌn kbyeta,’ tz̈ike t-xjal Dios te Dios,” tz̈i tyol Dios.

37Pero amale niyꞌxet qꞌuixcꞌaj kuꞌn, pero ko camal te junx maj tibaj cykilca nbaj kiꞌj. Ko camal tuꞌn Cristo, jaj xjal n-oc kakꞌ te.

38Tuj nwitza jaxte mintiiꞌ jun baꞌn tuꞌn tcaman kiꞌj tuꞌn kel pax tuya Dios. Cyamecyle, bix cykilcaj tikꞌch nbaj kiꞌj tuj kchunkꞌlal, ke tsanjel Diosle, ke bimanle, ke cawel-le, jtikꞌch nbaj kiꞌj jaꞌlewe, bix jpjel kiꞌj nchiꞌj,

39mi nuk ejeeꞌj eteꞌ jawne, bix mi nuk ejeeꞌj eteꞌ cubne, bix nuk alcyexja o bint tuꞌn Dios, mlay bint cyuꞌn tuꞌn tweꞌ tkꞌakꞌbil tcꞌuꞌj Dios kiꞌj tuꞌn Kaaw Jesucristo.