LOS HECHOS 1 - Mam of Todos Santos -- Guatemala Unicode

Tej tkbante Jesús ka tuꞌn tul Espíritu Santo

1Key xjal n-oc takꞌ Dios cyey.

Inayen Lucas. Ncub ntzꞌiꞌben tcab uꞌj cyey. J-uꞌj e xiꞌ ntzꞌiꞌben cyey tneel, e xiꞌ nkbaꞌn cyey cykilj e baj te Jesús bix cykilj e baj t-xnakꞌtzaꞌnxin cye xjal, jatxe tej ttzaj tzyet t-xnakꞌtzanxin tneel kꞌij,

2tejxe tjaxxin tuj cyaꞌj.

Tuj tzunj libro lu cxeꞌltzen nkbaꞌn cyey ti e baj cyej xin oc lpe tiꞌj Jesús tej tajlenxitlxin tuj cyaꞌj.

Tej ttenxin twitz txꞌotxꞌ, nuk e tyeecꞌaxin cyej t-xnakꞌatzxin otk baj tjyoꞌnxin tuꞌn cycyajxin te t-xel Jesús. E baj tnincꞌuꞌn Jesús ejeeꞌxin tuya tonbil Espíritu Santo tuꞌn ti ctemela jtaakꞌenxin otk tzaj tzyet.

3Bix tej tjatz itzꞌjxin tej tcyimlenxitlxin, bix e xiꞌxin jaaꞌj eteꞌ ke t-xnakꞌatzxin, bix e pon Jesús iꞌtz cyiꞌjxin, bix nim maj e cub tyeecꞌaxin techlalxin ka iꞌtzxin. Bix e tenxin cyuya ke t-xnakꞌatzxin cyaꞌwnak kꞌij bix e baj tyeecꞌanxin ti tten tcawbil Dios.

4At jun kꞌij tej mintknaꞌn t-xiꞌ Jesús tuj cyaꞌj bix e xiꞌ tkbaꞌnxin cye t-xnakꞌatzxin:

—Miꞌ chi exa tuj tnom te Jerusalén. Cyyoꞌm cabtl kꞌij tzalu, ojxe tul Espíritu Santo tzinen o tzaj kbet cyey, ka tuꞌn ttzaj chkꞌet Espíritu Santo tuꞌn tten cyuyey, otzen txiꞌ nkbaꞌn cyey nejl.

5N-ultzen tuj cycꞌuꞌja tej xin Juan Bautista e cuꞌx tkꞌoꞌnxin ke xjal tuj aꞌ kej e cyajbe cymeltzꞌaj tuya Dios. Pero tujtzen cabtl kꞌij attzen juntl chꞌixbeꞌn cꞌoquel. Tzultzen Espíritu Santo te kꞌolte mas cyipemala tuꞌn t-xiꞌ cyiiꞌna jcyaakꞌena cyjel nkꞌoꞌna―tz̈i Jesús cye t-xnakꞌatz.

Tej taj Jesús tuj cyaꞌj

6Juntltzen kꞌij tbajlenxitl juꞌwa, tej toc cychmon cyiib t-xnakꞌatz Jesús tuyaxin, ttxaꞌn Jerusalén, twiꞌ jun witz Olivos tbi, bix e xiꞌ cykanenxin:

—Taat, keya ejooꞌya xjal te judío lu koꞌya etoꞌcx tjakꞌ cycawbil jxjal tzajninxa. Jeyꞌ, ¿mapatzen pon tumel tuꞌn kel tcoꞌpana tjakꞌ cycawbil bix tuꞌntzen ja tey cawen?―tz̈i tzunkexin te Jesús.

7Bix aj ttzakꞌbeꞌn Jesús:

—Yaaꞌn ilxixte tiꞌj tuꞌn cybinte cyey jntzaj cykanena. Nuk oꞌcxcꞌate Kman Dios itzkil te ja, cuma nuk ja texin at tajwalel te scyꞌolte jtoj pjel tikꞌch jilel.

8Jcyey il tiꞌj tuꞌn cybinte ja tej tzul cyey cyipemal ojtzen tul Espíritu Santo najal cyuyey bixsen ckebel cycꞌuꞌja oj cyakꞌa yol we. Chi xeꞌla tz̈itpul we nuk jakꞌch tumel, tzalu tuj tnom te Jerusalén, tuj ttxꞌotxꞌ Judea, tuj ttxꞌotxꞌ Samaria, bixsen cyuj txꞌotxꞌ mas nakch twitz txꞌotxꞌ. Chi oquela te nxel―tz̈i Jesús cye t-xnakꞌatz.

9T-xiꞌlen tkbaꞌnxitltzen Jesús ja lu, bix akꞌ jawexxin tuj cyaꞌj, maatkxsen nchi cyeꞌyenx t-xnakꞌatzxin tiꞌjxin. Cwa tcyaj bajxin tuj jun muj. Minx e cyilxin jaxin.

10Maatkxsen n-el jacꞌch cyanemxin tiꞌj tjaxlen Jesús tuj cyaꞌj, tjaw jlet caꞌbaxin tsanjel Dios cytxlajxin scꞌapenxsen cyiꞌjxin.

11Bix e xiꞌ cykbaꞌnxin cye t-xnakꞌtzal Jesús:

—Ke cyey xjal aj Galilea, ¿tikentzen nim nchi cyeꞌyenxa tuj cyaꞌj? Tej xin Jesús lu ma cyaj tkꞌoꞌn texin ejeeꞌy. Ma tzꞌaj kꞌiꞌn texin tuj cyaꞌj. Ma cyila ma jaxxin, bix laꞌ alcye jun kꞌij tzul meltzꞌaj texin twitz txꞌotxꞌ. Tisenx ma jaxxin juꞌx oj tulxin―tz̈i ke tsanjel Dios cyexin.

Tej tjaw scyꞌet t-xel Judas

12Entonces bix e xiꞌ ke t-xel Jesús twiꞌ jwitz Olivos, bix ajtz meltzꞌajkexin tuj Jerusalén te jun kilómetro taꞌ.

13Tejtzen cyponxin tuj tnom, bix e jaxkexin tuj tcab cxoꞌlen jaaꞌ jaaꞌj taꞌ cyposadaxin. Bixsen oc cykꞌoꞌnxin te tajlal kej xin Pedro, Jacobo, juntl tbixin Santiago, Juan, Andrés, Felipe, Tomás, Bartolomé, Mateo, Jacobo, tcwal jxin Alfeo, jxin Simón, junxin otk ten nejl tej cloj e tajbe tkꞌojl tuya Roma, bixsen Judas, juntl tbixin Tadeo, tcwal Jacobo, yaaꞌnte Judas Iscariote.

14Jatztzen oca cychmon cyiibxin jaca kꞌij tuꞌn toc cykꞌon cyiibxin te naꞌl Dios te junx maj bix cyjunen cyiibxin. Cyuya cab xuuj e pon cyuyaxin te naꞌl Dios cyuyaxin, cyxoltzen xuuj tocxa jxuj María, ttxu Jesús, bixsen ke titzꞌen Jesús.

15Cabtltzen kꞌij mas yaj tuj jun wikxitl lugar bix oc cychmon cyiib jun syent tuya winkꞌan xjal otk tzꞌocslante Jesús, bixsen e cub weꞌ Pedro cyxol xjal te yolel cyuya.

16Bix e xiꞌ tkbaꞌn Pedro cyjulu:

—Key ocslal wuya, tej e cuꞌx tzꞌiꞌbet tuj tyol Dios at-xe tyem ox bintte. E cyaj tkbaꞌn Espíritu Santo tuya tyol ktzan David ti jilel tbinlel tuꞌn Judas Iscariote. Bix yaltzen jaꞌlewe ox bintte juꞌwa. Cykil koꞌ itzkilte ti tten tonen bix ti tten tcub nej Judas cywitz jxjal e tzyunte Jesús tuꞌn tbyet-xin.

17Tej xin Judas lu ja te xinja jun kuya, cuma jax e scyꞌet-xin tuꞌn Jesús tuꞌntzen tbint jkaakꞌen, tuꞌn tchicꞌajax jbaꞌn tpocbalj yol te coꞌpbil.

18Pero bix e xiꞌ tqꞌueyen Judas ja Jesús tuj ewjel. Mas yaj, ya ktzkiꞌntltzen keya, bix e xiꞌ Judas tuj jun lugar jaaꞌ e tzaaꞌ t-xooꞌn tiibxin lenchl e ponxin twitz txꞌotxꞌ. Tcubtzen tzꞌakxin, biꞌx el tzacꞌch ttzooꞌnxin bix etz baj tuj tcꞌuꞌjxin tiꞌjxe. Juꞌtzen tten tcyimxin. Yajcꞌatltzen bixsen e cylokꞌtl ke pala cyibaj xjal judío ja txꞌotxꞌa tuyaj pwak e tcama Judas tiꞌj t-xiꞌlen tqꞌueyenxin ja Jesús tuj ewjel.

19Yaltzen ke xjal te Jerusalén, tej toc cybiꞌn xjal ja ila, bixsen oc cykꞌoꞌn xjal tbi ja txꞌotxꞌa te Acéldama, jatzen elpenina “Jtxꞌotxꞌ Tlokꞌaj Pwak Byol Xjal” tuj cyyol xjal.

20Tuj Salmos at jun yol nbyaꞌn cyjulu: “E tcyajtzen tkꞌoꞌn tja bix min-al juntl baꞌn tocx najan tuj.” Bix juntl tzin tkbaꞌn cyjulu: “Jun wikxitltzen xjal e tkꞌin tej taakꞌen tocsen,” tz̈i tyol Dios, tuꞌntzen telniyꞌ ka tuꞌn tcyim Judas bix tuꞌn tcyaj taakꞌenxin otk tzꞌoc nejl.

21-22Juꞌ tzunj ctzaal kjyoꞌn jun xjal te t-xel Judas, jaj junxin xjal e bet kuya junx tuya Jesús tej tbautizarjxin tuꞌn Juan Bautista bix tejxe taj kꞌiꞌnxin tuj cyaꞌj. Jatzen xjalaja cwel ten kbalte tyol Dios kuya ka o jatz itzꞌjte Kman Jesús―tz̈i Pedro cye xjal.

23Entonces cyxoltzen xjal bix etz cyscyꞌoꞌnxin caꞌba xjal. Jatzen José bixsen Matías. Jatzen José at maj n-ocxin te Barsabás bix at maj n-ocxin te Justo.

24Bix akꞌkexin naꞌl Dios cyjulu:

—Taat, ja tey itzkilte tiiꞌn tanem cykil xjal. Nuksama, yeecꞌantz tzuna keya al jun cyej xjal lu taja

25te t-xel Judas, tuꞌn tbint jtaakꞌen Judas ma cyaj tkꞌoꞌn tej t-xiꞌ tjyoꞌn til bix o cyim, o txiꞌ tuj kꞌakꞌ ja tzunja o tiikꞌ―tz̈itzen ke xjal te Dios.

26Tejtzen cybaj naꞌnxin Dios, bixsen akꞌkexin kẍal tiꞌ cysuertexin laꞌ altzen jun cyexin tuꞌn tcaman te t-xel Judas. Jatzen Matías e caman, ja tzunxin ocx tuj taakꞌen Jesús tuyaj junlajajtlxin.