LOS HECHOS 3 - Mam of Todos Santos -- Guatemala Unicode

Tej tkꞌanj jun cox

1Attzen jun kꞌij caꞌba tzunxin t-xel Jesús, ja Pedro tuya Juan, bix e xiꞌkexin tuj nintzaj tja Dios te oxe tajlal hora te kale, texj hora oj nchi pon xjal judío te naꞌl Dios.

2Chꞌitktzen cypon cananxin taꞌ tja Dios, t-xiꞌ cycyeꞌyenxin cab xjal kꞌiꞌn juntl xjal cox cyuꞌn, xiꞌninke tuj tja Dios. Pero jxjal cox juꞌx tten ttzajlen itzꞌja, bix nakꞌlx tuꞌn t-xiꞌ kꞌit ttziiꞌ jtja Dios. Oc cykꞌoꞌn xjal tbi Cyeca Ttziꞌyen, bixsen ncub kej xin xjal cox ttziiꞌ tja Dios te kanl pwak tcotzxin cye xjal nchi ocx ttziꞌyen.

3Tejtzen takꞌ twitzj xin cox cyiꞌ Pedro tuya Juan, ya chꞌitk cyocxxin tuj tja Dios bix e xiꞌ tkanenxin jun pwak tcotzxin.

4Cyiwcꞌa oc cycyeꞌyen t-xel Jesús jaxin, bix e xiꞌ tkbaꞌn Pedro texin:

—Ko tcyeꞌcꞌa―tz̈i Pedro texin.

5Bixsen ocxix tkꞌoꞌn jxin cox tcꞌuꞌjxin cyiꞌjxin. Tujtzen twitzxin, chꞌin pwak tuꞌn toc texin.

6Pero bix e xiꞌ tkbaꞌn Pedro:

—Pwak mintiiꞌke kꞌiꞌn kuꞌn, mitetpe plata bix mitetpe oro. Yaaꞌn kꞌina koꞌya. Keya kꞌiꞌn kuꞌn nuk ja tej keya kipemal o tzꞌoc tkꞌoꞌn Jesús Kajwalela. Tuya tzunja cꞌoquela konena jay. Tuꞌn tajwalel Jesús te Nazaret, jxin Scyꞌoꞌn tuꞌn Dios, cxeꞌltzen nkbaꞌn tey tuꞌn tjaw weꞌy bix tuꞌn tiyꞌ beta―tz̈i Pedro texin.

7Bix e tzaj ttzyuꞌn Pedro tkꞌabxin te tmankꞌabxin bix e jaw tiiꞌn Pedro jaxin. Tujx naj tcywix ke tkenxin bix ke tmopxin.

8Bix e jaw lipenxin tej tjaw weꞌxin, bix akꞌxin betel. Axsen eꞌla tuj twitzxin tjaw lipenxin bix tiyꞌ bet-xin. Tzinxsen naꞌnxin Dios. Juꞌtzen tten tocxxin tuj tja Dios tuya Pedro bix Juan.

9Cykil xsunj xjal tcub oc cyeyente jxin cox nbet-xin bix nkꞌoꞌnxin chjonte te Dios.

10Nimxsen e jaw kleeꞌ ke xjal toc cycyeꞌyen xjal jaj xin cox ncubxix ten ttziiꞌ Cyeca Ttziꞌyen te kanl tcotzxin.

Tej tpocban Pedro twitz jun peꞌn te Salomón tbi

11Tejtzen cybaj naꞌnxin Dios, bixsen etzkexin twitz peꞌn Salomón tbi. Yal tzunj xin otk tzul tnaabl, minxsen elxin cyiꞌ Pedro tuya Juan. Yal cye xjal, tzinxsen chi kleeꞌ xjal, bix binxsen toc cychmon cyiib xjal.

12Tejtzen toc cychmon cyiib xjal cyiꞌ Pedro, bix e xiꞌ tkbaꞌn Pedro:

—Key te ntanem te Israel, ¿tuꞌn tikentzen nimxsen nchi kleeꞌy? ¿Tikentzen nim nchi kleeꞌy oj nko oc cycyeꞌyena jacꞌa xsunj nuk kuꞌn keya ma tzula tnaabl jxin coxa? Min bet texin tuꞌn jun keya kipemal, bix yaaꞌn nuk tuꞌnj nko naꞌna Dios.

13Yaaꞌn juꞌ tewa. Tej ma baja tuꞌn Dioste, jaj xin Tdios Abraham, Tdios jxin kiyꞌjil Isaac, tej xin kiyꞌjil Jacob, bixsen cykil ke kiyꞌjil. Ja te Dios ma binchan te ja lu tuꞌntzen t-xiꞌ tyeecꞌanxin ka o jax tkꞌoꞌnxin Tcwalxin mas jawnex bix o txiꞌ tkꞌoꞌnxin nim tipemal Tcwalxin. Jatzen Tcwal xinj Jesús, jaxj xin cyey e xiꞌ cykꞌoꞌn tej xin cawel Pilato tuꞌntzen tbyet-xin, bix jaxj xin cyey el cyxooꞌn, amale otket cub te Pilato tuj twitz tuꞌn tex ttzakpiꞌnxin Jesús.

14Jaj xin Scyꞌoꞌn tuꞌn Dios te cawel, jaj xin Jesús baꞌn tanem, min e cycuyey. Pero tzunj xin byol xjal Barrabás, jatzen xin e cycuyey tuꞌn tetz tzakpet-xin.

15Juꞌ tzunj ejeeꞌy e byonte tej xin xjal tbeyel jchunkꞌlal te junx maj. Pero o jatz titzꞌjsaꞌn Dios jaxin. O kila o jatz itzꞌjxin. Ejooꞌya tstiwa.

16Bix lu tzunj xin xjal cox nejl lu, bix cytzkiꞌna twitzxin, matzen tzꞌoc ke tcꞌuꞌjxin tiꞌ tbi jxin Jesús, bix tuꞌntzen tipemal tbi Jesús ma tzula tnaablxin. Tuꞌnj a tanemxin tiꞌ Jesús, juꞌtzen ma tzula tnaabl xina tisenxj tten n-oc cycyeꞌyena.

17Ke cyey te ntanem, weya ntzkiꞌna ka minxix otk tzꞌel cyniꞌya tiꞌj tuya ke cycawela ka ja Jesús Scyꞌoꞌnxix tuꞌn Dios.

18Pero amale otket cybinchey kaꞌ, yal te Dios max bint texin tuꞌn ti jilel tajxin, cuma at-xe kꞌij cyyolbil-lente ke tyolel Dios ka tuꞌn tiyꞌx qꞌuixcꞌaj bix tuꞌn tcyim jxin Scyꞌoꞌn tuꞌn Dios. Jax o tzꞌeꞌla tyol Dios.

19Pero amale otket bint cyuꞌna cuma min cytzkiꞌna ka jaxin Tcwal Dios, pero cyuꞌnx cyey. Juꞌ tzunj chi meltzꞌaja cycyaj meltzꞌaj tuya Dios, tuꞌntzen tnajset cyila,

20bix tuꞌntzen tajtz tmeltzꞌuꞌn Dios jxin Jesús, Scyꞌoꞌn tuꞌn Dios, jaxj xin otk kꞌoj te cyey.

21Pero te lwewa naj ctemelxte Jesús tuj cyaꞌj, ojxetzen tpon jkꞌij te tuꞌn tbaj tnincꞌuꞌn Jesús cykilca nbaj twitz txꞌotxꞌ, jaj e tkba Dios cye ke tyolel at-xe tyem.

22Cxeꞌltzen nkbaꞌn cyey tuꞌntzen cymeltzꞌaja. Cꞌulelcaxixna tuj cycꞌuꞌja ti e tkba jxin kxeꞌchel Moisés: “Jatzente Kman Dios qꞌueletz scyꞌoꞌnte jun tyolelxin tisenj weya cyxola ejeeꞌy te Israel. Ja tzunxin cꞌoquel cybiꞌna bix cycuyey tyolxin.

23Al tzunj min ma tzꞌoc ebinte texin, junxsen maj qꞌuelel pax cyiꞌj te Dios t-xjal,” tz̈i Moisés tcyaj tkbaꞌn―tz̈i Pedro cye xjal, tuꞌntzen tel cyniyꞌ xjal tiꞌj ka tiꞌ Jesús nyolena Moisés tej tkbante xinj juꞌwa.

24Bix e xiꞌ tkbaꞌntl Pedro:

—Juꞌxsen tten cyyolen cykil tyolel Dios, jatxe tuyaj xin tyolel Dios Samuel o tzaj bet tyem nyolj tiꞌj ti tten Jesús tzalu twitz txꞌotxꞌa, tejxe taj Jesús tuj cyaꞌj.

25Ke cyey te ntanem, tisenx cyey bix tisenx keya, jatza eꞌla itzꞌj koꞌ cyiꞌj kej xin kxeꞌchel ootxa e yolen tej tyol Diosa. Ke cyey bix ko keya ejooꞌ tzunj cotzl tej tyol Dios e cyaj tkꞌoꞌn cyuya ootxa. Juꞌtzen tten tcyajlen tkbaꞌn Dios tyol tej xin itzꞌjsal kxeꞌchel, jxin Abraham: “Cykil ke tnom twitz txꞌotxꞌ cyꞌiwlaꞌn chi temela tuꞌn jun cyey itzꞌj cyxol ke t-xeꞌchela,” tz̈i Dios te Abraham.

26Ejeeꞌy te Israel tneel tnom o tscyꞌo Dios tuꞌn tcyꞌiwlet tuꞌnj xin xjal, baꞌn tcyaj cykꞌoꞌna cyila. Juꞌ tzunj, cubsanx cywitza―tz̈i Pedro cye aj judío tuj nin tja Dios.