3 JUAN 1 - Mam of Todos Santos -- Guatemala Unicode

Jun kꞌolbebl tuꞌn apóstol Juan

1Inayena, jun nejenel cyxol ocslal, nxiꞌ ntzꞌiꞌbena ja uꞌj lu te tey, Gayo. N-oc takꞌa weya tuya cykil ncꞌuꞌja.

2Hermano, nchin cubsana nwitza te Dios tiꞌja, tuꞌn tel baꞌn cykilcaj te tey bix tuꞌn baꞌn taꞌy, tisen baꞌn taꞌ tchunkꞌlala tuya Dios.

3Ntzkiꞌna baꞌn taꞌ tanema tuya Dios, cuma ul cab ocslal te kbalte weya ti ttena, bix nim in jaw tzalaja tej ttzaj cykbaꞌn kꞌiꞌnxix yol jaxxix tuꞌna.

4Jawnex ntzalajebla jaca maj oj nbintiya ka nchi oc lpe tiꞌj jaxxix yol kej xjal ocslan tuꞌnj waakꞌena.

Tej tyole Juan baꞌn tiꞌj jxin Gayo

5Hermano, baꞌnxix nbint tuꞌna, cuma nxiꞌ tonena cyiꞌj ocslal. Amale mint ttzkiꞌna cywitz t-akꞌanal Dios nchi bet cyuj tnom, pero nxiꞌ tonena cyiꞌj.

6Tej cyul tzalu, e xiꞌ cykꞌumen cywitz ke ocslal ti tten e xiꞌ tyeecꞌana tnaabla cye. Cxeꞌl ncubsaꞌna nwitza tey tuꞌn t-xiꞌ tkꞌoꞌntla chꞌin onbil cye oj cypon tuyey, tuꞌntzen cyitzꞌj tuj cybe oj cyiyꞌ ttanema tuꞌn tkꞌumj tyol Dios cyuꞌn, cuma nchi ajben te Dios.

7Nchi bet cyuj tnom tuꞌn ttz̈itpaj yol tiꞌj colbil cye xjal tuꞌn Cristo, bix mintiiꞌ chꞌin onbil ccyiikꞌel cyuꞌn ke xjal yaaꞌn ocslal.

8Juꞌ tzunj, ilxix tiꞌj tuꞌn t-xiꞌ kkꞌoꞌn onbil cyej t-akꞌanal Dios lu, tuꞌntzen kakꞌanan junx cyuya tuj cyaakꞌen te kbalte tpocbal Cristo.

Jun tley Diótrefes yaaꞌn baꞌn

9E xiꞌ ntzꞌiꞌbena jun wuꞌja cye ocslal jaaꞌ taꞌy, pero nuk wajxa e xiꞌ nsmaꞌna, cuma at jxin Diótrefes cyxola. Tajxin tuꞌn tocxin te nejenel cyxol ocslal, bix juꞌ tzunj min oc tbiꞌnxin nyola.

10Juꞌ tzunj, ka ma chin pona cyxola, cxeꞌl nkbaꞌna cywitz ocslal jma tbinchaxin, tuꞌn tchicꞌajax ti ttenxin. Nyolenxin kaꞌ yol wiꞌja, pero ẍtakꞌ. Bix yaaꞌn nuk jaj lu, pero jax juꞌx tcyꞌixin tuꞌn ttzaj tkꞌoꞌnxin cyposada t-akꞌanal Dios. Bix ka at ocslal cyaj tuꞌn t-xiꞌ cykꞌoꞌn cyposada t-akꞌanal Dios, mintiiꞌ nxiꞌ tkbaꞌnxin cye tuꞌn t-xiꞌ cykꞌoꞌn cyposada, sino nuk n-etz tlojoꞌnxin ejeeꞌ cyxol ke ocslal.

Jun tbanel tbinchben jxin Demetrio

11Hermano, miꞌn tzꞌoc lpey tiꞌj kaꞌ, nuk oꞌcx tiꞌj baꞌn. Kej xjal nchi binchan baꞌn, te Dioske, pero kej xjal nchi binchan kaꞌ, min cytzkiꞌn Dios.

12Kꞌonx tonbila tej xin Demetrio. Cykilca xjal nchi yolen baꞌn tiꞌjxin. Junx taꞌ tbinchbenxin tuyaj yol jaxxix, bix chicꞌaj jiquen jun xjal. Jax juꞌx weya, ntzkiꞌna ka baꞌn jun xjal, bix cytzkiꞌna baꞌn tuꞌn toc ke cycꞌuꞌja tiꞌj nyola.

Mancꞌbil kꞌolbebl

13At nimtl waja txiꞌ nkbaꞌna tey, pero ncyꞌiya tuꞌn tcub ntzꞌiꞌbena twitz jun t-xak uꞌj.

14Waja mas tuꞌn npona tuyey tuꞌn nyolena tuyey oj toc ncyeꞌyena twitza tuj cabtl kꞌij.

15Tenxita tuj ttz̈yal. Kej ocslal tzalu cytzkiꞌn twitza nxiꞌ cykꞌoꞌn cykꞌolbebl tey. Kꞌonxa jun nkꞌolbebla cye ocslal at tuyey, teeyle juun.