1 TIMOTEO 4 - Mam of Todos Santos -- Guatemala Unicode

Nim xjal qꞌuelel tpaꞌn tiib tanem tiꞌ tyol Dios

1Pero tzinenxix tcyaj tuj chicꞌaj tuꞌn Espíritu Santo ka cyuj kꞌij chi ul nim xjal qꞌuelel tpaꞌn tiib tanem tiꞌ tyol Dios. Juꞌ chi xeꞌl lpetl tiꞌ cyxnakꞌatz jxjal lepch cyxnakꞌatz cyiꞌj xewbaj yajlal bix ma bimanj.

2Kej xjal chi cwel ten xnakꞌtzal cyej cynicꞌbil biman, ejeeꞌtzen xjalj junx maj ẍtakꞌ. Nimxse cyẍtakꞌbil ya tzpetpajninxtltzen cynaabl.

3Ja tzunkej xjal juꞌ baꞌn cyuꞌna cycyꞌitltzen chi oc maje xinak tuya cyxuꞌl, bix n-octzen cyxnakꞌtzaꞌn cye xjal ka at juun wik waabj mixben tniyꞌbej. Pero o cub tbinchaꞌnte Dios cykil wik waabj cye tcwalxin tuꞌn t-xiꞌ cywaaꞌn, bix tuꞌn toc chjonte te Dios tiꞌj.

4Cykil tej e cub tbinchen Dios, baꞌnte. Juꞌ tzunj mintiiꞌ chꞌin baꞌn tel cyxooꞌn xjal, sino ccyiikꞌelxix tuꞌn t-xtalbil Dios.

5Tuꞌn tnaꞌj Dios tiꞌ waabj, n-eltzen cyniyꞌ xjal tiꞌj ka ja Dios kꞌoltzte, bix cuma juꞌ toc tuꞌn Dios. Bix ka o tzaj tkꞌoꞌn Dios, cykiltzen baꞌn, yaaꞌn nuk alcyexte baꞌn.

Jun tbanel xnakꞌtzal tuꞌn tajben te Jesús

6Xnakꞌtzaꞌnc tzunja lu cye ocslal tuꞌntzen jay baꞌn tajben te Jesús. Tisenj waabj tzin tkꞌoꞌn tipen kchuꞌl, juꞌxse tzin tkꞌoꞌn tyol Dios tipemal kanem. Kꞌoꞌncxixsen tcꞌuꞌja tiꞌj.

7Pero miꞌn txiꞌ tcꞌuꞌja tiꞌj tpocbal cyuꞌnj ẍtakꞌ xjala, a te tbiꞌnc pero naꞌc yol. Yaaꞌntzen juꞌwa, sino xnakꞌtzam tiiba tuꞌntzen tnimena Dios.

8Alj ma baj t-xnakꞌtzaꞌn tuꞌn tkinpaj tchuꞌl, baꞌnte, pero nuk te twitz txꞌotxꞌ teja. Pero tej tuꞌn tbaj t-xnakꞌtzan tiiba tiꞌ tyol Dios, yaaꞌn nuk te twitz txꞌotxꞌ teja, sino te junx maj.

9Jaxxix tej we ma txiꞌ nkbaꞌna, bix cykilcakey baꞌn toc ebinte.

10N-oc kipen tuya kyol tuꞌn cycoꞌpj xjal tuj cyil. Nko akꞌanantzen bix niyꞌx kuꞌn cuma ktzkiꞌn iꞌtzte Dios jaaꞌ ma tzꞌoca ke kcꞌuꞌj. Ja tzunxin Cꞌojlal cykil xjal, bix tzin tcoꞌpaxin kej xjal ocslal te tyolxin.

11Jayle tzunj yol lu ccawel bix cxnakꞌtzal tuꞌna.

12Amale cwalxita, pero tcꞌojlaꞌ tiiba tuꞌn miꞌn tzꞌel xeꞌta, sino cwelxix tkꞌoꞌna jun techlal baꞌnxix cywitz ocslal tuya tnaabla te yolel, tuyaxix jun tbey jiquen, bix tuya baꞌn tanema cyiꞌ xjal, bix juch tcꞌuꞌja tiꞌ Dios, bix sakxix jun tnaabla.

13Joocꞌtzen nchin ponwe, tenctzen te s̈-ilwe tyol Dios tuj uꞌj tuj tja Dios, bix te nimsalec cycꞌuꞌj ocslal, bix te xnakꞌtzaleccye.

14Timoteo, miꞌn tzꞌel tuj tcꞌuꞌja ka tuꞌn t-xjikꞌben Dios e yolenke tyolel Dios tibaja bix e cub cykꞌoꞌn tij xjal cawel tuj tja Dios cykꞌab tibaja tuꞌn toc tajwalela te xnakꞌtzal tyol Dios cye xjal.

15Junx maj kꞌoꞌnc tcꞌuꞌja tiꞌj, tuꞌntzen toc cycyeꞌyen xjal jay ka xiꞌnen t-xiꞌy tuya Dios.

16Cꞌojlam tiiba, bix cꞌojlam ti nbaj t-xnakꞌtzaꞌna, bix cwelxix weꞌy twitz tixja jilel. Katzen ma bint juꞌwa, bix ka cuyan tey tuꞌn tuꞌn t-xiꞌ tkbaꞌna jyol te coꞌpbil, bix cmeltzꞌajel te coꞌpbil cyej xjal ma tzꞌoc ebinte tey. Juꞌtzen ctemela tey, yaaꞌntzen tuꞌntl tey ka min ẍi coꞌpj xjal tuj tkꞌab il.