ROMANOS 5 - Mam of Todos Santos -- Guatemala Unicode

Jiquen koꞌ twitz Dios tuꞌnj n-oc ke kcꞌuꞌj tiꞌ Jesucristo

1Entonces, jiquen koꞌ twitz Dios tuꞌnj n-oc ke kcꞌuꞌj tiꞌ Dios. At ttz̈yaltl etoꞌ tuya Dios tuꞌnj e bint tuꞌn Kaaw Jesucristo.

2Bix tuꞌnj e bint tuꞌn Kaaw, bix tej toc ke kcꞌuꞌj tiꞌj e bint tuꞌnxin, e kꞌoj t-xtalbil Dios ke tuꞌn koc jiquen twitz Dios. Bix nko tzalaj, cuma nko ayon laꞌ alcyej kꞌij oj kten tuya Dios tuya jun kchunkꞌlal tbanelxix.

3Bix nko tzalaj yaaꞌn nuk oꞌcx tuꞌnj kꞌij tzul, sino jax juꞌx oj toc qꞌuixcꞌaj kiꞌj, cuma n-el kniyꞌ tiꞌj oj tiyꞌ qꞌuixcꞌaj kwitz, cbineltzen tuꞌn tiyꞌx kuꞌn.

4Bix oj niyꞌx qꞌuixcꞌaj kuꞌn, cyjeltzen knaabl mas baꞌn. Bix oj ncyaj knaabl mas baꞌn, nko ayontzen tiꞌj o cyaj tkbaꞌn Dios ke.

5Bix mlay ko ayon nuk kajx, cuma jaxte cjapanel baj Dios tiꞌ tyol. Ktzkiꞌntl te Dios mlay ko el t-xooꞌn Dios tuj jkꞌij tzul, cuma at tumel kuya ntzaj kꞌakꞌen tcꞌuꞌjxin kiꞌj. O tzaj tkꞌoꞌnxin Espíritu Santo ke, bix nakꞌanan Espíritu tuj kanem tuꞌntzen tel kniyꞌ tiꞌj n-oc kakꞌ te Dios.

6Tzinen taꞌ n-oc kakꞌ texin, cuma tej tpon tumel, e tzaj tkꞌoꞌnxin Cristo tuꞌn tcyim te kxel. Aj il koꞌ nejl, bix min-al jun clol ke tuꞌn kcoꞌpj twitz kcastiwa tzul tkꞌoꞌn Dios.

7Katzen at jun xjal baꞌn tnaabl, pero amale baꞌnt tnaabl, pero min-al jun xjal jacꞌa takꞌ tiib te t-xel tuꞌn tcyim. Jacꞌatzele at juun cykꞌaꞌ cyiib tuꞌn tcyim te t-xel jun xjal baꞌn tnaabl, pero cykilcatle xjal jacꞌa jaw kleeꞌ tiꞌj. Pero min-al jun xjal cymel te t-xel jun xjal kaꞌ tnaabl.

8Pero yal te Dios, e tzaj tkꞌoꞌnxin Cristo twitz txꞌotxꞌ tuꞌn tcyim te kxel, amale aj ilet koꞌ. Tiꞌj tzunj lu e tyeecꞌanxin tkꞌakꞌbil tcꞌuꞌjxin kiꞌj.

9Cuma oc kakꞌ texin tej etoꞌx tuj kil, qꞌueleltzen kniyꞌ tiꞌj oj kpon tuj kꞌij te stisbil tzul, nimxsen cꞌonelxin kiꞌj tuꞌn Cristo tuꞌn ktzakpet tiꞌj kcastiwa binne tuꞌn Dios, cuma jaꞌlewe yaaꞌn aj il koꞌ twitz Dios, sino jiquen etoꞌ twitzxin tuꞌnj e bint tuꞌn Cristo tej tel tz̈itj ttz̈qꞌuel Cristo tuꞌn kil.

10Jnxiꞌ nkbaꞌna cuma e tzaj tkꞌoꞌn Dios tuꞌn kten tuj ttz̈yal tuyaxin tuꞌnj tcyimlen Tcwal te kxel tej lux koꞌke nko chiꞌlec tiꞌjxin, qꞌueleltzen kniyꞌ tiꞌj miꞌntzen jawtl tkꞌojxin kiꞌj tuj jkꞌij te stisbil tzul, cuma yaaꞌntzen nko chiꞌlectl tiꞌjxin. Bix cuma onen Tcwalxin kiꞌj tej tcyim, mlaytzen cyaj tkꞌoꞌnxin tonbilxin kiꞌj jaꞌlewe, cuma iꞌtz tzunxin.

11Pero yaaꞌn oꞌcx tuꞌn kclet twitz kcastiwa tuꞌn Dios, sino jax juꞌx nko tzalaj tiꞌj Dios tuꞌnj e bint tuꞌn Kaaw Jesucristo tuꞌn tweꞌ tkꞌoj Dios kiꞌj.

Alcye o bint tuꞌn Adán bix alcye o bint tuꞌn Cristo

12Juꞌtzen tten, key hermano, tuꞌnj e bint tuꞌn jun xjal, ja Cristo, at kchunkꞌlal te junx maj. Pero tuꞌnj e bint tuꞌn juntl xjal tuj tneel, oc il twitz txꞌotxꞌ, bix juꞌ tzunj cykil xjal oc tjakꞌ tcawbil cyamecy. Tuꞌnj aj ilke, eteꞌ xjal tjakꞌ tcawbil cyamecy.

13Yaaꞌn eteꞌ xjal tjakꞌ tcawbil cyamecy tuꞌnj min txiꞌ cyniman ley. Ktzkiꞌntl jlu tuꞌnj ti e baj tej mitknaꞌx ttzaj tkꞌoꞌn Dios tley Moisés. Amale minttiiꞌ ley e kꞌoj cye xjal, pero at il cyxol xjal, cuma e cyim ke xjal. ¿E cyimpake tuꞌnj il e bint cyuꞌn? Min, cuma n-el kniyꞌ tiꞌj ka mintiiꞌ ley, mintiiꞌ baꞌn tel cyiiqꞌuen.

14Pero e biꞌn kuꞌn e cyim cykilca xjal e ten twitz txꞌotxꞌ tej mitknaꞌx tkꞌoj ley te Moisés. Amale mint el cyxooꞌn jun ley e takꞌ Dios tisenj el t-xooꞌn Adán, pero cykil e cyim. Ja tzunj lu nkꞌonte tumel e cyimke yaaꞌn tuꞌnj el cyxooꞌn jun ley, sino tuꞌnj cyiyꞌjil Adán. J-il e bint tuꞌn Adán biꞌx e tiikꞌ cykil xjal. Jax juꞌx j-e bint tuꞌn Jesucristo mas yaj jax biꞌx e cyiikꞌ ke xjal.

15Pero j-o tzul kibaj tuꞌnj e bint tuꞌn Cristo yaaꞌn juꞌ tisenj ul kibaj tuꞌnj e bint tuꞌn Adán, cuma jcoꞌpbilte ke ul tuꞌn Cristo mas tipemal twitzj cyamecy ul kibaj tuꞌn Adán. Amale oquet ke xjal tjakꞌ tcawbil cyamecy tuꞌnj il e bint tuꞌn Adán, pero jxtalbil ntzaj tkꞌoꞌn Dios cye xjal tuꞌnj e bint tuꞌn Jesucristo, nbajtzen twiꞌ cyamecy tuꞌn, cuma mas tipemal.

16Jcoꞌpbil ke e tzaj tkꞌoꞌn Dios, e cub tyeecꞌan mas tipemal twitzj il e bint tuꞌn Adán. Tuꞌnj nuk junx il e bint tuꞌn Adán, e tkba Dios cykilca xjal oc te kaꞌ twitzxin. Pero amale atet nim il jaꞌlewe, jcoꞌpbil e tzaj tkꞌoꞌn Dios at tipemal tuꞌn tnajset cykilca il, yaaꞌn nuk oꞌcx te Adán til.

17Katzen nuk tuꞌn til jun xjal oca ke xjal tjakꞌ tcawbil cyamecy, yajtzen tuꞌn Jesucristo chi eletz tzokpaj xjal tjakꞌ tcawbil cyamecy, cuma mas jawnex tipemalxin, bix chi cawel tuyaxin te junx maj, ejeeꞌj nchi ocslan tiꞌj jawnex t-xtalbil Dios, ejeeꞌj jiquen eteꞌ twitz Dios.

18Juꞌ tzunj, tiꞌj nuk jun maj min e tniman Adán tley Dios, e tkba Dios il tiꞌj chi xeꞌl cykilca xjal tuj castiwa. Pero te Cristo, e tnima texin ja Dios tej t-xiꞌ tkbaꞌn Dios texin tuꞌn tcyimxin. Bix tiꞌ tzunj juꞌwa junx tnimbil Cristo, at tuj tkꞌab Dios tuꞌn t-xiꞌ tkbaꞌn jiquen ke xjal twitzxin, bix tuꞌn ttzaj tkꞌoꞌnxin cychunkꞌlal te junx maj.

19Tumel eꞌla e tkba Dios il tiꞌj chi xeꞌl xjal tuj castiwa, cuma tuꞌn til jun xjal oc ke xjal aj il. Jax tumelte oj tkbante Dios jiquen eteꞌ xjal twitzxin, cuma tuꞌnj tnimbil jun xjal ja Cristo, jaxte e cyajtzen ke xjal jiquen twitzxin.

20Yaltzen te tley Moisés, ¿tikentzen e tzaj tkꞌoꞌn Dios? E tzaj tkꞌoꞌn Dios tuꞌn tcub tyeecꞌanxin oj at tcawbilxin, mascꞌa n-el cyxooꞌn xjal tcawbilxin. Pero amale mascꞌat e binchanx ke xjal il, pero t-xtalbil Dios mas tipemal twitzj il e bint cyuꞌn xjal.

21Mas tipemal t-xtalbil Dios, tuꞌntzen miꞌn ko tentl tjakꞌ tcawbil cyamecy, sino tuꞌntzen juꞌ ko temel tjakꞌ t-xtalbil Dios. O tkba Dios jiquen koꞌ twitzxin tuꞌnj e bint tuꞌn Kaaw Jesucristo. Juꞌ tzunj at kchunkꞌlal te junx maj mintiiꞌ tbajlel.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help