1 TESALONICENSES 1 - Mam of Todos Santos -- Guatemala Unicode

Jun kꞌolbebl tuꞌn apóstol Pablo

1Inayena, Pablo, nxiꞌ ntzꞌiꞌbena ja uꞌj lu te cyey ocslal tuj tnom te Tesalónica, ejeeꞌy at cymojbabl cyiiba tuya Kman Dios bix tuya Kaaw Jesucristo. Jax nxiꞌ cykꞌoꞌn Silvano tuyax Timoteo jun cykolbebl te cyey. Tzajxit tkꞌoꞌn Dios bix Jesucristo xtalbil cyey, bix tuꞌn cytena tuj ttz̈yal.

Kej ocslal te Tesalónica ajbenke te yecꞌbil cye cykil ocslal

2Cykilca kꞌij nxiꞌ kkꞌoꞌna chjonte te Dios tiꞌj cykilcakey, bix nko naꞌna Dios cyiꞌja.

3Nchicꞌajax at cyocslabla tiꞌ Dios, cuma baꞌnxsen cybinchbena. Tuya cykil cycꞌuꞌja nchi akꞌanana tuꞌn cyyeecꞌana cyanema cye xjal, bix amale n-oquet qꞌuixcꞌaj cyiꞌja, pero tuya cypasensyey nchi ayona tiꞌj jbaꞌn ccyiikꞌela oj tul meltzꞌaj Cristo. Cykilcaj lu n-ul tuj kcꞌuꞌja oj nko oca twitz Kman Dios.

4Key hermano n-oc cyakꞌa te Dios, tzinen taꞌ tuj kwitza t-xjal Dioskey,

5cuma tej t-xiꞌ kkꞌumena jbaꞌn yol tiꞌj colbil ke cyxola, yaaꞌn nuk kajxa e xiꞌ kkꞌumena. E cybiy kyola tuya cykil cycꞌuꞌja, bix akꞌanan Espíritu Santo tuj cyanema tuꞌn tcub cyiꞌja, bix el jax tpocbal colbil cyey tuj cywitza. E xiꞌ cycyeꞌyena ejooꞌya tej tiyꞌx qꞌuixcꞌaj kuꞌna tuj taakꞌen Dios nuk tuꞌn kajbena cyey.

6Bix tisenx iyꞌx qꞌuixcꞌaj kuꞌna bix tuꞌn Kaaw Jesucristo nuk tuꞌn tlaj tyol Dios, jax juꞌx cyey. Ma tziyꞌx qꞌuixcꞌaj cyuꞌna nuk tuꞌnj cyocslabla tiꞌ Cristo. Bix amale oquet pena cyiꞌja, pero oc cybiꞌna tyol Dios tuyaj tzalajebl kꞌoꞌn tuꞌn Espíritu Santo.

7Amale e jawet cykꞌoj xjal cyiꞌja, pero e cykꞌumena jbaꞌn tpocbal colbil ke, bix juꞌ tzunj ockey jun baꞌn yecꞌbil te cykil ocslal cyuj departamento te Macedonia bix Acaya.

8Jax wuꞌna jun baꞌn yecꞌbilkey, cuma cyuꞌna ma tzꞌabij jyol tiꞌj Kaaw, yaaꞌn nuk tuj Macedonia bix tuj Acaya, pero jax juꞌx tuj cykilca lugar. Cykil xjal ma txiꞌ cybiꞌn tpocbal cyocslabla tiꞌ Dios. Juꞌ tzunj, mintiiꞌ il tiꞌj tuꞌn t-xiꞌ kkbaꞌna mastl yol cye xjal tiꞌj ti cytena.

9Ejeeꞌx xjal tuj cykil tnom tzin cykbaꞌn weya ti tten oc cybiꞌna kyola, bix ti tten e cyaj cykꞌoꞌna cysanta tuꞌn cyxiꞌ lpey tiꞌ Dios, bix jaꞌlewe nchi ajbena te Dios iꞌtz bix jaxxix.

10Tzin cykbaꞌnxin ti tten nchi ayona tiꞌj jkꞌij oj tul meltzꞌaj Tcwalxin tuj cyaꞌj, jxin Jesús, jax xjal e jatz titzꞌjsaꞌnxin tuj cyamecy, bix jxjal Clolte ke tuj castiwa tzul.