EFESIOS 4 - Mam of Todos Santos -- Guatemala Unicode

Ja Espíritu Santo kꞌolte jun kmojbabl kiib

1Entonces, key hermano, Dios o txconte cyey tuꞌn cyoca te t-xjalxin. Juꞌ tzunj nchin cubsan nwitza cyey tuꞌn t-xiꞌ cyiiꞌna jun cynaabla jiquen, cuma t-xjal Dioskey. Yaltzen weya, ntiina tuj tzeeꞌ nuk tuꞌn nchin ajbeꞌna te Kaaw.

2Miꞌn jaw cyniman cyiiba, bix miꞌn baj t-xelen tiib cykꞌoja, bix tenx cypasensyey. Ka cyaja t-xiꞌ cyyeecꞌana tkꞌakꞌbil cycꞌuꞌja te juntl xjal, cxeꞌl cyonena.

3Miꞌn txiꞌ cyxooꞌna cymojbabl cyiiba o tzaj tkꞌoꞌn Espíritu Santo cyey, sino cyjyoma tuꞌn tel cynaabla junx, tuꞌntzen cytena tuj ttz̈yal.

4Nxiꞌ nkbaꞌna cyey junx qꞌuelel cynaabla, cuma tuj twitz Dios nuk junx cloj elnina t-xjal. Bix nuk junx Espíritu Santo at. Bix nuk junx tcawbil Dios tzul, bix o txcon Dios kiꞌj te ayolte tzunj tcawbil.

5Junx Kaaw at, bix nuk junx kocslabl tiꞌ Kaaw at, bix at nuk junx bautismo, jaj junx chombil ke tuꞌn koc te junx cloj tuya Dios.

6Bix nuk junx Kman Dios at kibaj. Jaxin ncawen tibaj cykilca koꞌ, bix nakꞌananxin kxol cykilca koꞌ, bix at-xin tuj cykilca kanem.

7Junx elnina koꞌ, pero kaakꞌen tecꞌalex te juun. O tzaj tkꞌoꞌn Cristo te jaca juun ke tecꞌalex taakꞌen tuꞌn kajben cyxol ocslal, laꞌ niyꞌ chꞌin o takꞌ Cristo te jaca juun ke.

8Cꞌoquel cycyeꞌyena ti toc tuꞌn tyol Dios tiꞌj t-xtalbil Cristo cye t-xjal Dios. Tz̈i cyjulu: “Tej tjax Cristo tuj cyaꞌj, e tyeecꞌatzen otk tcolxin ke xjal tuj il, bix e tzaj tkꞌoꞌnxin tecꞌax taakꞌen juun,” tz̈i tyol Dios.

9Yaltzen tiꞌj ti japenina jyol “e jaxxin tuj cyaꞌj,” katzen jax e jaxxin tuj cyaꞌj, jax il tiꞌj e cuꞌtzxin tuj cyaꞌj tuj tneel tuꞌn tulxin hasta maa twitz txꞌotxꞌ.

10Jaxj xin e cuꞌtz tuj cyaꞌj bix ul twitz txꞌotxꞌ, jaxxin o japan tuj cyaꞌj cyibajxe twitz cyaꞌj, tuꞌntzen ttenxin tibajxe cykilca. Mintiiꞌ jun lugar mint o tziyꞌxin tuj.

11Yaltzen tiꞌj ti japenina jyol “e tzaj tkꞌoꞌnxin tecꞌax taakꞌen juun,” jaj ti tten tuꞌn takꞌanan jun ocslal tuꞌn tajben cye niyꞌtl ocslal te tajbel cye. O tzaj tkꞌoꞌnxin te juun cye tuꞌn cyajben te t-xelxin. Bix te juuntl o tzaj tkꞌoꞌnxin te kꞌumlte ti otk tyeecꞌa Dios cye. Bix te juuntl o tzaj tkꞌoꞌnxin tuꞌn tcub cycꞌuꞌj kej xjal yaaꞌn ocslal tuꞌn cyocslan. Bix te juuntl o tzaj tkꞌoꞌnxin te yecꞌlecte cye xjal bix te xnakꞌtzal ti japenina tyol Dios.

12Bix otzen tzaj tkꞌoꞌnxin cyaakꞌen te cykilca, tuꞌntzen cyonen cye niyꞌtl ocslal tuꞌn cyajben tuj taakꞌen Dios, bix tuꞌntzen cyajben tuꞌn ttzket cynaabl ke t-xjal Cristo.

13Katzen najben kaakꞌen te jaca juun te tajbel te cabtl, ko pomeltzen maje junx tuj kocslabl, bix qꞌuelel kniyꞌ tiꞌ Tcwal Dios, bix ctzketeltzen knaabl, hasta ojxe tpon knaabl tisenj te Cristo tnaabl.

14Oj ttzket knaabl juꞌwa, waꞌlxixse koꞌ tuj kocslabl. Yaaꞌntzen tisen jun neeꞌ koꞌ mintiiꞌ tipen oj tul juntl xjal ẍbiꞌl tuya jun acꞌaj t-xnakꞌtzbil te yaꞌlcꞌate ke. Katzen yaaꞌn waꞌlxix koꞌ tuj kocslabl, bixsen qꞌuiyel tiken jt-xnakꞌtzbil ejooꞌ tuꞌn kpon tuj il, tisen jun cykꞌiꞌk niyꞌ tiken jun tiiꞌ tuꞌn tpon t-xooꞌn nakch.

15Miꞌn kbinche tisen kej ẍtakꞌ xjal, sino cxeꞌlxix kkbaꞌn alcyej jaxxix. Bix oj t-xiꞌ kkꞌumen, il tiꞌj tuya jun tkꞌakꞌbil kcꞌuꞌj. Ka nbint kuꞌn juꞌwa, ctzketeltzen knaabl tisenj te Kaaw, ja Cristo.

16Jaxin tisen kwiꞌ, bix ejooꞌ t-xjalxin tisen t-xumlalxin. Ja kwiꞌ ncawen ti cbinel tuꞌn kxumlal. Bix tecꞌax juun iken tuꞌn kxumlal najben jaaꞌ tuꞌn tajbeꞌna. Ka najben jaca juun iken tuꞌn kxumlal, n-onentzen te juntl, bix baꞌntzen taꞌ kxumlal juꞌwa, bix ntz̈ꞌiytzen. Juꞌxse te ke ejooꞌ ocslal. Oj najben jaca juun ke, ejooꞌ ocslal, cye niyꞌtl ocslal tuyaj kaakꞌen o kiikꞌ tuꞌn Kaaw, jatzen n-oc kꞌakꞌen tcꞌuꞌj jun tiꞌ juntl, bix ko cywixeltzen tuj kocslabl.

Tej kocslan tiꞌ Dios, e tzaj tkꞌoꞌn Dios jun acꞌaj kchunkꞌlal

17Entonces, key hermano, tuꞌn tcawbil Kaaw cxeꞌl nkbaꞌna cyey tuꞌn miꞌn cybinchatla tisen kej xjal yaaꞌn ocslal tiꞌ Dios. Ejeeꞌ tzunja mintiiꞌ tajbel cynaabl twitz Dios,

18bix min tzꞌel cyniyꞌ tiꞌj ti taj Dios. Bix nakchxsen eteꞌ tiꞌ Dios. Nuk mos̈ taꞌ cynaabl tuꞌn cyxiꞌ tuj be jiquen, cuma nuk oꞌcx tuj be kaꞌ ncheꞌxa.

19Ya mintiiꞌtl cychꞌixew oj nbint il cyuꞌn. O tzꞌoc cykꞌon cyiib te nuk tikꞌch cyaj. Min nchi weꞌ tuꞌn nuk nchi yaẍen cyuya nuk alkꞌch xjal.

20Katzen ejeeꞌy ocslal nbint cyuꞌna juꞌwa, pero yaaꞌn te Cristo kbalte tuꞌn tbint cyuꞌna juꞌwa.

21Ka o tzꞌel cyniꞌya tiꞌj jaxxix e cyaj t-xnakꞌtzaꞌn Jesús bix e cyaj tyeecꞌanxin tej ttenxin twitz txꞌotxꞌ, bix ka cyaja cheꞌx lpey tiꞌ tyolxin,

22cykꞌoncjtzen tisenj cytena nejl. Ya miꞌntzen chi jyontla tiꞌj tikꞌch e cyajbey nejl, cuma puro tzꞌil ootxa cychunkꞌlala. Niyꞌj cyachbila nejl nuk te sbulte cyey tuꞌn cyxiꞌy tuj il.

23Il tiꞌj cychꞌixpum cynaabla tuꞌn toc te acꞌaj.

24Tej cyocslana tiꞌ Dios, e tzaj tkꞌoꞌn Dios cyey jun acꞌaj cynaabla. Ja tzunj acꞌaj cynaabla tisenj tnaabl Dios, bix jiquen bix sakxix bix tbanelxix tnaablxin. Iltzen tiꞌj tuꞌn tel cyxooꞌna jkꞌanak bix tuꞌn cyocxa tuj acꞌaj.

25¿Titzen tten tuꞌn cyocxa tuj acꞌaj cynaabla? Il tiꞌj cyjel cykꞌoꞌna cyẍtakꞌbila. Oj cyyolena cyuya ke cyuyey, pero tujxix tumel bix jaxxix cyyola, cuma ka nchi ẍtakꞌena, biꞌx chi xeꞌl xitja tuj cymojbabl cyiiba.

26Bix ka ma chi jaw kꞌojla, miꞌn cyakꞌa amleꞌn te cykꞌoja, sino cybinchaꞌy tuꞌn tbaj tilel tex kꞌij.

27Katzen tzinxa chi kꞌojla, nxiꞌtzen cykꞌoꞌna amleꞌn te taaw il tuꞌn tcaman cyiꞌja.

28Bix kej o chi alkꞌan, miꞌntzen chi alkꞌantl. Baꞌn tuꞌn cyakꞌanana tuj tumel tuꞌn cyitzꞌja, bix tuꞌn t-xiꞌ cyonena juntl xjal pena n-itzꞌja.

29Ojtzen cyocxa tuj acꞌaj cynaabla, miꞌntzen cyyoley xmeletzꞌtzen yol, sino chi yolela tujxix tumel, tuꞌntzen tajben cyyola cye kej nchi oc ebinte.

30Miꞌn cub cykꞌoꞌna Espíritu Santo tuj bis. At Espíritu Santo te Dios cyuyey te techel ejeeꞌy t-xjal Dios, bix najben tuꞌn tzinen taꞌ tuꞌn cycoꞌpja tuꞌn Dios te junx maj oj tpon alcye kꞌij tuꞌn kcoꞌpj.

31Cybajsancꞌaja cyiicꞌbila bix jtikꞌch cykꞌoja, bix cys̈itz̈ꞌbila, bix jkaꞌ cyyola tzin cykbaꞌna tiꞌ juntl xjal.

32Miꞌntzen cybinchay jlu, sino tkꞌakꞌbil cycꞌuꞌja tiꞌ cyuyey cbinel cyuꞌna, bix qꞌuelel cyniꞌya tiꞌj ti ilel taꞌ juntl. Cwel cynajsaꞌna til juntl cyuyey, tisen o cub tnajsaꞌn Dios ke kil tuꞌn tcyimlen Cristo.