1 CORINTIOS 2 - Mam of Todos Santos -- Guatemala Unicode

O kban apóstol Pablo cye aj Corinto tiꞌj tcyimlen Cristo twitz cruz

1Key hermano, tej npomlena cyxola te kbalte jun jaxxix tyol Dios at-xe kꞌij te tneel maj, min in pona yecꞌlte jun wexa nyola mas baꞌn wuꞌna, bix min in pona kbalte jun jawnex yol cyey nuketle ejeeꞌj ke xjal jawnex el cyniyꞌ tiꞌj.

2Oꞌcx jwe waj tej ntena cyxola, jaj tuꞌn t-xiꞌ nkꞌumena tpocbalj tcyimlenj Jesucristo, jxin Kcawel e cyim twitz cruz tiꞌ kil.

3Tej npona kbaltej tyol Dios cyey, e cub ttz̈i wiꞌja tuꞌn miꞌn paltex tkꞌumj cykil tyol Dios wuꞌna cyey.

4Jnyola e xiꞌ nkbaꞌna cyey yaaꞌn tisen tyol jun xjal mas baꞌn tuꞌn, tisenj cye nmak xjal tuya jawnex cyyol. Jweya nyola nuk tuꞌn tipemal Dios bix tuꞌn Espíritu Santo,

5tuꞌntzen e cub cyiꞌja tuꞌn tke cycꞌuꞌja tiꞌ Kaaw, yaaꞌn tuꞌn mas baꞌn cyuꞌn xjal, sino tuꞌn tipemal Dios.

Tuꞌn Espíritu Santo n-el kniyꞌ tiꞌ Dios

6Oj nyolena cyxolj ocslal ya n-el cyniyꞌ tiꞌj, nchin yolena tiꞌ jun yol yaaꞌn te twitz txꞌotxꞌ. Jyol lu min tzꞌel baꞌn tuj cywitz kej nenel te twitz txꞌotxꞌ. Ejeeꞌ nenel ocslaꞌnke cyuꞌn xjal jaꞌlewe, pero chi xeꞌl tuj il.

7Ja tumel lu te Dios. Pero nimxe tyem mintiiꞌ tumel kuya, cuma jun tumel tuj ewjel taꞌ tuꞌn Dios. Pero ya chicꞌajte te ke. Tej tumel lu tuꞌn Dios atte jatxe tuj tneel, jaj tuꞌntzen kclet te junx maj.

8Chꞌixcꞌa yaaꞌn entera cawel te twitz txꞌotxꞌ min el cyniyꞌ tiꞌj ja lu. Tisen tzunkej cawel tuj Jerusalén, nuket el cyniyꞌ tiꞌj, mintetle e cub cybyoꞌn nintzaj Kaaw Jesús twitz cruz.

9Juꞌ tzunj at tumel tuj tyol Dios tej ttz̈i cyjulu: “Bajx cylaꞌ xjal bix bajx cybiꞌ xjal bix bajx tzula tuj cycꞌuꞌj xjal jun chunkꞌlal o tbincha Dios cye kej xjal n-oc takꞌ Dios tiꞌ cyanem,” tz̈i tyol Dios.

10Yaltzen ke ejooꞌ ocslal, qꞌuelel kniyꞌ tiꞌj ti o baj tnincꞌuꞌn Dios, cuma at Espíritu Santo te Dios kuya, bix ttzkiꞌn Tspirit Dios ti niyꞌ tuj tcꞌuꞌj Dios.

11Yaltzen cye xjal, nuk ja xjal n-el tniyꞌ tiꞌj ti niyꞌ tuj tcꞌuꞌj. Ya tuꞌn tel tniyꞌ tiꞌj ti niyꞌ tuj tcꞌuꞌj juntl xjal, mlay. Jax juꞌx te Dios. Ja Tspirit Dios itzkilte ti niyꞌ tuj tcꞌuꞌj Dios bix nuk ja itzkilte.

12Bix ja tzunj Espíritu Santo o kiikꞌ te Dios. Yaaꞌn etoꞌ tjakꞌ jcawbil cynaabl xjal te twitz txꞌotxꞌ, sino etoꞌ tjakꞌ tcawbil Espíritu Santo o kiikꞌ. Bix tuꞌn Espíritu Santo qꞌuelela kniyꞌ tiꞌj ti niyꞌ tuj tcꞌuꞌj Dios, tuꞌn tel kniyꞌ tiꞌj alcyej tumel at tuꞌn Dios kiꞌj bix alcyej t-xtalbil Dios tzul te ke.

13Oj t-xiꞌ nkꞌumena jun jaxxix yol cye kej ncheꞌx lpe tiꞌ Espíritu Santo, yaaꞌn cynaabl xjal te twitz txꞌotxꞌ tuya nintzaj yol, sino tnaabl Espíritu Santo tzin nkꞌumena.

14Pero ja tzunkej xjal te twitz txꞌotxꞌ, min cyocsla t-xnakꞌtzbil Tspirit Dios, cuma te cye nuk jun tzcaj yol tuj cywitz. Bix mlayx tzꞌel cyniyꞌ tiꞌj, cuma mintiiꞌ Espíritu Santo at cyuya te onlte cye.

15Pero ke nkoꞌx lpe tiꞌj Espíritu Santo, n-el kniyꞌ tiꞌj alcyej jaxxix. Pero kej xjal te twitz txꞌotxꞌ, min cheꞌx lpe tiꞌj Espíritu Santo, bix min tzꞌel cyniyꞌ tiꞌj alcyej jaxxix. Juꞌ tzunj mlay chi oc ten tuꞌn tbaj cycyeꞌyen knaabl, cuma min tzꞌel cyniyꞌ kiꞌj.

16Tz̈i tyol Dios cyjulu: “¿Alj yaaꞌn ocslal twitz txꞌotxꞌ qꞌuelel tniyꞌ tiꞌj tnaabl Kaaw? ¿Bix alj cꞌoquel xnakꞌtzante? Min-alx jun,” tz̈i tyol Dios. Perotzen ke, n-el kniyꞌ tiꞌj tnaabl Cristo. Juꞌ tzunj kej te twitz txꞌotxꞌ mlay tzꞌel cyniyꞌ kiꞌj.