2 TIMOTEO 3 - Mam of Todos Santos -- Guatemala Unicode

Cynaabl xjal cyuj kej mancꞌbil kꞌij

1Timoteo, wajtzen tzꞌel tniꞌya tiꞌj cyej mancꞌbil kꞌij chi ultzen tuya nim pena, bix wajtzen tzꞌel tniꞌya tiꞌj tiiꞌn cynaabl xjal cyuj kej kꞌija.

2Ke xjal nuk ejeeꞌx cꞌoquel cyakꞌ cye, nuk pwak ccyajbeꞌ, cꞌoquel cykꞌon cyiib te nintzaj cywitz xjal, qꞌuiyel tuj cycꞌuꞌj ka nintzajke, bix nim chi oquel chiꞌl tiꞌ Dios, miꞌn tzꞌoc cybiꞌn cyman, ya mintiiꞌtl cybanel, bix ya miꞌn tzꞌoc tocl tyol Dios tiꞌ cywiꞌ,

3mintiiꞌtl cyanem, bix ya miꞌn tzꞌoc kꞌaꞌben cycꞌuꞌj tiꞌ juntl xjal, nuk chi cwel ten xtzꞌiml yol, mlay bint cytzyunte cyiib bix ya miꞌn cycuyatl tuꞌn toc juntl xjal te tzyulcye, chi oquel te yuwin, bix cyaj kꞌojxse cykilj baꞌn,

4cxeꞌl cykꞌoꞌn jun cyuya tuj tkꞌab juntl xjal, bix cyxooꞌ cyiib, axse chi elela tuj cywitz, bix cxeꞌl cyjyoꞌn laꞌ alcye cyaj, yaaꞌntl Dios cyjyaꞌ.

5Bix at xjal cꞌoquel cykꞌon cyiib te ocslal Dios nuk tiꞌ cycyeꞌyenc, pero mintiiꞌ tipemal cyocslabl, cuma nuk ten cyuꞌn.

Tisen kej xjal caꞌba cywitz tisen kej lu matzen chi akꞌ jawel jlet jaꞌlewe. Mintzentiiꞌ toclena cyiꞌj xjala,

6cuma cyxol tzunj xjala tocxa cabtl chi oquex tiyꞌ cyuj jaaꞌ te yolel tiꞌ tyol Dios pero jun wikxitl cye cyaj. Tisen tzunj, at xuuj baꞌn tcub cycꞌuꞌj cyuꞌn ka jax cyxnakꞌatz, cuma ke cyej xuuj naꞌcke bix chtꞌol cynaabl tuꞌn cyil, bix cuma ke cyej xuuj cykilcye yol n-oc cybiꞌn.

7Ejeeꞌtzen xuuj nuk nchi xnakꞌtzanx, pero mlay pon cnetj jax tyol Dios cyuꞌn.

8Ke cyej yajlal xjal, juꞌtzen ke cyeja tisen kej xin tchman cawel te Egipto nejl, jxin Janes bix Jambres, e cub bint jun techlal cyuꞌnxin tisenj te Moisés, pero bix oc meltzꞌajkexin kꞌojlel tiꞌ Moisés. N-oc cyxnakꞌtzaꞌn cyej xjal caꞌba cywitz ocslabl, pero nchi oc meltzꞌajxin kꞌojlel tiꞌj jax yol, cuma at ttzacaj cynaablxin, bix min tzꞌel cyniyꞌxin tiꞌj alcye jax.

9Nuk jaaꞌx chi pomela weꞌxin tuya cyyolxin, pero cwa mlay chi eltlxin baꞌn tuꞌn tcub tcꞌuꞌj nimtl xjal cyuꞌnxin, cuma tisen kej xin chmambaj te Egipto cwa cycub tzꞌakxin, jaxse juꞌx kej xjala lwewa cchicꞌajaxel cyẍtakꞌbil.

10Pero tey, yaaꞌn juꞌy. Mayꞌx tzꞌel tey tniyꞌ tiꞌj we nxnakꞌatz, bix ti tten weya nnaabl, bix ti waja, bix ti tten kꞌuklec ncꞌuꞌj tiꞌ Dios, bix nimxse ncꞌuꞌja, bix tiiꞌn takꞌ Dios n-oc we, bixse wipemala tuꞌn tiyꞌx wuꞌna,

11bix tiiꞌnj ttzyet ntzyuja, bixse qꞌuixcꞌaj nuk tiꞌjcꞌa tyol Dios. Ttzkiꞌntl tzuna tikꞌch e baj we bix tikꞌch qꞌuixcꞌajel in iꞌya cyuj tnom te Antioquía, Iconio, bix Listra. Pero jaxse Dios e coꞌpante we tuj cykil il.

12Jaxse alj ma tajbe txiꞌ lpe tiꞌ Jesús qꞌuiyaxse tchyonel tuꞌn.

13Pero tzunkej xjal kaꞌ bix kej yajlal xjal mas pjel cyyajlaꞌn xjal bix ejeeꞌxsen qꞌuelel paꞌnte mas cyiib tiꞌj jax tyol Dios.

14Pero amale cykilet ja lu pjel, weꞌcꞌaxix tey tuj cykilj ma tcana, bix ma tzꞌoc ke tcꞌuꞌja tiꞌj, cuma ttzkiꞌntl tzuna min baj kxnakꞌtzaꞌn key tuya nicꞌbil yol,

15bix ttzkiꞌntla jatxe tuj tcwalela ti toc tuꞌn tyol Dios. Jatzen tyol Dios ckꞌolte tnaabla tuꞌn tiyꞌ tilbila tiꞌj, bix tzin tyeecꞌan alcyej tbeyel coꞌpbil tuj tkꞌab il, tiꞌj kꞌuklec kcꞌuꞌj tiꞌ Jesús.

16Cykilj e cuꞌx cytzꞌiꞌben xjal tuj tyol Dios, cykilte oc t-xjikꞌen Dios. Ja te Dios e xiꞌ kꞌonte cynaabl xjal te tzꞌiblcꞌate, yaaꞌn ke cye xjal e kbante. Juꞌ tzunj najbente te xnakꞌtzabl tej jaxxix, bix tuꞌn toc chꞌiquet jkaꞌ, bix tuꞌn tel kniyꞌ tiꞌj tkaꞌyel te nincꞌul kchunkꞌlal, bix tuꞌn kbaj xnakꞌtzet te kajbelel te Dios,

17bix tuꞌntzen jun t-xjal Dios baꞌn tbint tuꞌn, bix tuꞌn binne tten tuj cykil taakꞌen Dios.