JUDAS 1 - Mam of Todos Santos -- Guatemala Unicode

Cꞌojlaꞌn koꞌ tuꞌn Dios

1Key Hermano.

Inayena Judas. Jun t-akꞌanal Jesucristo kena, bix titzꞌen Santiago kena. Bix nxiꞌ ntzꞌiꞌbena j-uꞌj lu te cyey ocslal, ejeeꞌy t-xjal Kman Dios, ejeeꞌy n-oc cyakꞌa te Dios, bix ejeeꞌy cꞌojlaꞌn tuꞌn Cristo twitz il.

2Jaxit Kman Dios tzaj kꞌonte cyey jun tkꞌakꞌbil tcꞌuꞌjxin cyibaja, bix tuꞌnxit-xin chi temeley tuj ttz̈yal, bix tuꞌnxit-xin at jun tkꞌakꞌbil cycꞌuꞌja cyxola.

Il tiꞌj tuꞌn toc kipen tuꞌn miꞌn chꞌixpet kocslabl cuma at nim xjal kxol nocx cytzꞌilsaꞌn jun jaxxix yol

3Key hermano, at tcublel ntzꞌiꞌbena jun uꞌj cyey tiꞌj coꞌpbil ke tiꞌ kil, tuꞌntzen tel mas cyniꞌya tiꞌj tzunj kocslabl. Nimcꞌa waja e xiꞌ ntzꞌiꞌbena cyey tiꞌj coꞌpbil ke, bix otk tzyet ttzꞌibj wuꞌna, pero mlay chin xcyeya tiꞌj cuma at juntl mas il tiꞌj. Bix ja tzunj mas il tiꞌj, juꞌtzen cyjulu. O cyaj tkꞌoꞌn Dios tyol tuj tzinen te ke ocslal, bix tajxin tuꞌn t-xiꞌ kniman tyolxin. Juꞌ tzunj cxeꞌl ncubsaꞌn nwitz cyey tuꞌn cykꞌoꞌnc cyipena tuꞌn miꞌn chꞌixpet cyocslabla tuya ẍtakꞌ xnakꞌtzbil.

4Nxiꞌ nkbaꞌna juꞌwa cuma cyxola chebe chebe o chi ocx juun xjal n-ocx cytzꞌilsaꞌn tuꞌn ẍtakꞌ cyyol kxnakꞌtzbil o kiikꞌen tuꞌn Kaaw Jesús. Nchi yolenxin tisen ocslalkexin, pero yaaꞌn jax. Tzin cykbaꞌn baꞌn tuꞌn kbinchan cykil il cuma cwel tnajsaꞌnte Dios, tz̈i cybel. Bix tzin cykbaꞌn mintiiꞌ il tiꞌj tuꞌn toc kocslaꞌn tyol Jesucristo, bix yaaꞌn oꞌcx jaxin Kaaw. Pero mintzen tkbaꞌn kxnakꞌtzbil juꞌwa. Kej nxiꞌ cyiiꞌn jun cynaabl juꞌwa chi pon tuj castiwa, jaj castiwa o byan tuj tyol Dios kaape ootxa.

5Cxeꞌl nkꞌoꞌna cyey oxe tumel tiꞌ kej kiyꞌjil min e cybi Kaaw bix e xiꞌke tuj castiwa. Tneel tumel, amale cytzkiꞌnta ti tten cypocbal kej kiyꞌjil, ctzaal nnaꞌna cyey ti e baj cyej kiyꞌjil tej tetz tcolpan Kaaw ejeeꞌxin tuj txꞌotxꞌ te Egipto. Tej cytenxin tuj tzkij txꞌotxꞌ, min oc ke cycꞌuꞌjxin tiꞌ Kaaw, bix juꞌ tzunj Kaaw e cyaj kꞌonte cyexin tuj cyamecy tuj ja lugar, bix e cub bajkexin cykilcakej min e cybi.

6Tcab tumel, at cab cyxol ke tsanjel Dios tuj cyaꞌj jatxe ootxa min e cybi tcawbil Dios bix juꞌ tzunj o txiꞌ cyxooꞌn cyaakꞌen tuj cyaꞌj, bix yaaꞌn eteꞌtl tuj cyaꞌj. Mlay chi pon tuj cyaꞌj juntl maj, sino tiꞌjxe cyaꞌj tuj klolj eteꞌ, bix Dios cꞌuꞌlcye joocꞌtzen npon jawnex kꞌij tuꞌn cyxiꞌ tuj cycastiwa te junx maj.

7Toxen tumel, naꞌn kuꞌn ti e baj cye tnom te Sodoma bix Gomorra bix cye cabtl tnom cyiꞌj. Ke xjal cyuj ja tnoma e cybincha nim kaꞌ. Nim e yas̈enke, hasta xinak tuya xinakx. Kaꞌxsen el tuj twitz Dios. Juꞌtzen e tzaaꞌ tkꞌoꞌn Dios kꞌakꞌ cyibaj, biꞌx e cub bajke te junx maj. Ejeeꞌ tzunj lu te jun tumel te ke jaꞌlewe at jun kꞌakꞌ te junx maj jaaꞌ chi pomela kej xjal min cybi Dios.

8Cykilke tzunkej lu e cybincha il bix e xiꞌke tuj castiwa. Juꞌxsen chi xeꞌl tuj castiwa kej eteꞌcx cyxola min cybi Kaaw Jesús. Tisen kej aj il te ootxa baꞌn eꞌla tuj cywitzj e cub cybinchaꞌn pero yaaꞌn baꞌn, juꞌx jaꞌlewe. Kej ẍtakꞌ eteꞌcx cyxola tuj cywitz baꞌn tuꞌn cybinchan il bix mintiiꞌ cycastiwa tiꞌj tuj cywitz. Nim kaꞌ nbint cyuꞌn. N-el cyxooꞌn tcawbil Cristo, bix juꞌx n-oc cyilen ke tsanjelxin.

9Jatxe ootxa mi nuk ja mas nintzaj tsanjel Dios tuj cyaꞌj, Miguel tbi, e ttzuy tcawbil Dios jun maj tej tkꞌojxin tuya taaw il. E xiꞌ tkbaꞌn taaw il te Miguel t-xumlal ktzan Moisés te texxin, yaaꞌn te Dios. Pero Miguel mintiiꞌxix e tkba te taaw il, sino nuk e xiꞌ tkbaꞌnxin: “Jaxit Dios cꞌoquel ila tey,” tz̈ixin te taaw il. Min oc tile Miguel ja taaw il, cuma tcyꞌixin tziyꞌ nejlxin twitz toclen Dios.

10Pero ejeeꞌtzen ẍtakꞌ cyxola min ncub cybisen tiꞌj toclen Dios juꞌwa. Nuk nchi yolenxin xmucchbil tiꞌ alcyej min tzꞌel cyniyꞌ tiꞌj. Oꞌcx n-el cyniyꞌxin tiꞌj laꞌ alcye taj cychuꞌlxin, bix nxiꞌ cynimanxin alcye taj cychuꞌlxin, tisen ke alimaj nxiꞌ cyniman alcye taj cychuꞌljil. Pero ja tachbil cychuꞌlxin lu chi xeꞌl tiiꞌn ejeeꞌxin tuj castiwa.

11Juꞌ tzunkexin tisen Caín jatxe ootxa. Tcyꞌixin e bint tisenj taj Dios. Bix juꞌ tzunkexin tisen Balaam. Nuk pwak e tajbexin. Bix juꞌ tzunkexin tisen Coré. Oꞌcx e tajbexin tuꞌn tocxin cyiw tiꞌ tley Dios. ¡Ax lo kej xina cyxola tzin cybinchaꞌnxin tisen kej xin nchi byan ootxa! cuma nbint cyuꞌn tisen Caín bix Balaam bix Coré jatxe ootxa, bix chi xeꞌl tuj castiwa tisen tzunkej xin te ootxa o cheꞌx tuj castiwa.

12Oj nchi chmeta te waaꞌl bix te iyꞌsalte santa cena, eteꞌcxxin ẍtakꞌel cyxola. Min ncub cybisenxin tiꞌj ti elpenina santa cena, sino nuk ncub cybisenxin nuk jaj cyexin tuꞌn cynojxin. Mintiiꞌ tzin cyyeecꞌaxin jun cynimbilxin tiꞌj. Juꞌ tzunj jun chꞌixbajil n-ocx cykꞌoꞌnxin cyiꞌja oj nchi chmeta tuꞌn cynimantey santa cena. Bix mintiiꞌ baꞌn cyajbeꞌna, tisen jun muj min najben oj tiyꞌ kibaj tuꞌn cykꞌiꞌk pero mintiiꞌ jbal tzin tkꞌoꞌn. Bix jun tzeeꞌ tken loꞌpj oj min takꞌ twitz min najben, bix il tiꞌj cjawetz lequet tlocꞌ tuꞌnx tcyim junx maj, juꞌtzen chi pomel tuj castiwa jxjal cyxola min cybi tyol Dios.

13Bix tisen tswaqueyil mar ncyaj t-xooꞌn tzꞌis twitz txꞌotxꞌ, juꞌx xsunkej xjal lu nuk n-ul cykꞌaꞌtz jun tkaꞌyel oj cyocxin cyxola. Bix tisen kej cheꞌw iken tjeeꞌ nchi el tzꞌak twitz cyaꞌj mintiiꞌ cylugar tuꞌn cyweꞌ bix jun rato chi ocx baj tuj jun nintzaj klolj, juꞌxsen ejeeꞌj ẍtakꞌ yaaꞌn tuj tumel eteꞌxin bix chi pomel baj tuj castiwa.

14Juꞌ e tkba Enoc jatxe ootxa. Enoc te twuukan xeꞌch elnin itzꞌj tiꞌ Adán. E tkba Enoc cyjulu: “Tzul Kaaw cyuya nim tajlal tsanjel Dios tuj cyaꞌj, miles y miles cybaj,

15te cyeyꞌlte cykil xjal kej baꞌn bix kej min, bix te kꞌolte castiwa cyibaj kej xjal kaꞌ tuꞌn kaꞌ e cybincha bix tuꞌn cyiw nchi juben yol tiꞌ Dios,” tz̈i Enoc tuj uꞌj. Cyiꞌjtzen xjal tisen kej ẍtakꞌ cyxola e yolena Enoc.

16Juꞌ tzunj, kej o chi ocx cyxola yaaꞌn kꞌiꞌnxix tyol Dios cyuꞌn. Ejeeꞌ tzunja tisen kej cyiw cynaabl ootxa. Min n-oc ke cycꞌuꞌj tiꞌ Dios, sino nuk nchi txololonx tuꞌn. Oꞌcx at cygane tiꞌj cyex cyajbil. Nim nchi yolen te nimbil cyiib. Tzin cyyeecꞌan cywitz baꞌn cye xjal, pero tuj cyanem, min, cuma nuk tuꞌn cycaman cyiꞌ cabtl te cye.

Cjawel jlet jun wik xjal kxol te xmucchalte tyol Dios

17Pero yaltzen key, hermano, tzulcꞌa chꞌin tuj cycꞌuꞌja cyyol ke t-xel Kaaw Jesucristo cyey.

18Chꞌima maj e cykba cyey cyjulu: “Tzul jun kꞌij chi ul cyxola jun wik xjal te xmucchatlte tyol Dios. Oꞌcx nuk tikꞌch jun cyajbil yaaꞌn baꞌn cbinel cyuꞌn,” tz̈i ke t-xel Jesús ke nejl.

19Otzen chi ul jlet cyxolj jun wik xjal. Ejeeꞌ tzunja nchin kꞌonte kꞌoj cyxola tuꞌn cypaxa. Nuk jaj kaꞌ te twitz txꞌotxꞌ lepchke tiꞌj, cuma mintiiꞌ Espíritu Santo cyuya.

20Jatzen cyey, hermano, miꞌntzen chi oca tisen kej lu, sino cykꞌoꞌnc cycꞌuꞌja tiꞌj tuꞌn tbint tajbil Dios, tuꞌntzen cycywixa tuj kocslabl, cuma ja jun kocslabl sakxix twitz Dios. At Espíritu Santo cyuyey, bix jatzen kꞌilte cyey oj cynaꞌna Dios.

21Miꞌn cyaj cycyeꞌyena Dios, cuma n-oc kakꞌ te Dios. Qꞌuiyax cyuꞌna tuꞌn t-xiꞌ cyiiꞌna kocslabl hasta mancꞌbil kꞌij, cuma at tkꞌakꞌbil tcꞌuꞌj Kaaw Jesucristo kiꞌj, bix tzulxin juntl maj kꞌolte jun kchunkꞌlal te junx maj.

22Pero cyxola at juun ocslal n-oc cybiꞌn cyyol ẍtakꞌ xjal tzin cykbaꞌn baꞌn tuꞌn kbinchan cykil il. Chꞌixcꞌa tcub cyiꞌj tuꞌn cyxiꞌ lpe cyiꞌj. Cxeꞌltzen cyonen cyey ejeeꞌj yaaꞌn cyiw tuj cyocslabl tuꞌntzen miꞌn cheꞌx lpe cyiꞌj ẍtakꞌ.

23Bix at juuntl ocslal cyxola ya ma cheꞌx lpe cyiꞌj ẍtakꞌ xjal. Cꞌoquel cyipena cyiꞌj tuꞌn cyaj meltzꞌaj tuj jiquen be, tisen n-etz cykiten key tuj kꞌakꞌ. Pero at juun mayꞌx cheꞌx tzꞌak tuj il. Cꞌoquel cykꞌoꞌna lastim cye, pero qꞌuelel cyxooꞌnja tzin cybinchaꞌn, tisen n-el cyxooꞌna jun xbalen mintiiꞌtl tajbel bix tzꞌilxsen. Cycꞌojlaꞌtl cyey cyiib tuꞌn miꞌn chi cub tzꞌaka tuj cyila tisenj cye.

Njaw tnimsaꞌn Judas tbi Dios

24Pero Kman Dios at tipemal te cꞌojlalte cyey tuꞌn miꞌn chi cub tzꞌaka tuj il, bix at tipemalxin tuꞌn t-xiꞌ tiiꞌnxin ejeeꞌy sakxixkey bix aleyrekey twitzxin, jawnex Diosxin, laꞌ alcye jun kꞌij.

25Jaxin oꞌcx jun Dios. Min-al juntl at. Bix jaxin coꞌpbil te ke tuꞌn Kaaw Jesucristo. Tbanelxix Dios, bix nimxsen tipemal at, bix tibaj cykil tcawbil. Nimjxit tbi te cykil tyem. Juꞌxit tzuna. Oꞌcx nyolja.