COLOSENSES 3 - Mam of Todos Santos -- Guatemala Unicode

1Key ocslal, cuma e jatz itzꞌj Cristo juntl maj tuj cyamecy, jax juꞌx cyey, tuꞌnj cymojbabl cyiiba tuyaxin, o chi jatza tuyaxin tuya jun acꞌaj cychunkꞌlala. Juꞌ tzunj, cykꞌoꞌnc cycꞌuꞌja tiꞌ Cristo tuj cyaꞌj, jaaꞌ kꞌuklexin tuj tmankꞌab Dios.

2Chi jyona alcye taj Dios. Miꞌn tzꞌoc cykꞌoꞌna tajbel oꞌcx jat te twitz txꞌotxꞌ,

3cuma ejeeꞌy tisen jun cyimne ma tzakpet tiꞌj tikꞌch at twitz txꞌotxꞌ. At cychunkꞌlala tuya Cristo. Bix cychunkꞌlala acꞌaj tuya Cristo, yaaꞌn chicꞌaj jaꞌlewe, cuma eꞌwen Cristo tuya Dios.

4Jaxin Kꞌol cychunkꞌlala te junx maj, bix oj tyeecꞌanxin tiibxin juntl maj, cchicꞌajaxeltzen ka jawnexsenxin, bix chi temela tuyaxin oj tcawenxin.

Jun ootxa kchunkꞌlal bix jun acꞌaj kchunkꞌlal

5Juꞌ tzunj, oj taj cyxumlala jkaꞌ, cybyom tzuna ja tajbil lu. Tisen tzunj, ka taj cyxumlala tuꞌn cyjyona pajbaj, miꞌn cyakꞌa amleꞌn te cyxumlala. Miꞌn chi jaw meltzꞌaja xinak tuya xinak, xuuj tuya xuuj. Miꞌn nuk tzꞌoc takꞌ xuuj te xinak, bixse xuuj tiꞌ xinak. Miꞌn tzꞌoc cybiꞌna cyxumlala oj taj jcyachbila yaaꞌn tumel. Bix miꞌn tzꞌoc cykꞌaꞌbena tikꞌch at, cuma oj cyaja tikꞌch at, bix yaaꞌn Dios, tisencꞌa nchi nimana cywitz sant.

6Miꞌn chi binchana kej il lu, cuma ctzaal tkꞌoꞌn Dios castiwa cyibaj kej xjal nbint cyuꞌn juꞌwa.

7Nejl, tej aj ilkey, e bint kej il lu cyuꞌna.

8Pero jaꞌlewe, ocslalkey. Juꞌ tzunj, cykꞌoꞌncja kej il lu. Miꞌn tzaj cykꞌoja. Miꞌn chi kꞌojla cyiꞌ xjal. Cybajsancꞌaja cyiicꞌbila cyiꞌ xjal. Miꞌn chi yolena kaꞌ cyiꞌj xjal, bix miꞌn tzꞌoc cykꞌoꞌna xmucchbil cye xjal. Miꞌn txiꞌ cykbaꞌna tzꞌil yol.

9Bix miꞌntl chi ẍtakꞌena cyxola, cuma ma chi ela tjakꞌ tcawbil cynaabla kaꞌ nuk taj tuꞌn tbint kaꞌ cyuꞌna.

10Ma kꞌoj jun acꞌaj cynaabla e bint tuꞌn Dios, bix cyakꞌanan Dios tuꞌn toc ja acꞌaj cynaabla lu junx tuyaj texxin tnaabl, tuꞌntzen telxix cyniꞌya tiꞌjxin.

11Bix cuma at jun acꞌaj cynaabla, yaaꞌntzen il tiꞌj ka aj griegokey bix ka yaaꞌn aj griegokey. Judío lokey, yaaꞌnle judíokey, jun wikxitl-le xjalkey, ajnintzle xjalkey, tjakꞌle tcawbil juntl xjal eteꞌy, cawel lokey, yaaꞌn il tiꞌj. Nuk oꞌcx ja te Cristo il tiꞌj. Bix jaxin at cyuya cykil ocslal.

12At jun acꞌaj cynaabla. T-xjal Dioskey bix sakxixkey bix n-oc cyakꞌa te Dios. Juꞌ tzunj il tiꞌj chi yeecꞌala cyanema cyiꞌ juntl, bix tuꞌn cykꞌona xtalbil cye juntl, bix tuꞌn miꞌn jaw cyniman cyiiba, sino tuꞌn t-xiꞌ cyiiꞌna jun cynaabla maans, bix tuꞌn tten cypasensyey.

13Tziyꞌx cyuꞌna cyxolxa oj at cypaltela. Oj nbinchan jun ocslal jun kaꞌ cyiꞌja, cynajsam til. Tisen te junx maj ma cub tnajsaꞌn Cristo cyila, jax juꞌx cyey, cynajsam cyil juntl ocslal.

14Bix mas il tiꞌj twitzj cykilca, jaj tuꞌn toc cyakꞌ cyiiba cyey, cuma tuꞌn tkꞌakꞌbil cycꞌuꞌja ctemel cymojbabl cyiiba.

15Cykꞌonx cyiiba tuꞌn cytena tuj ttz̈yal tuya cykil ocslal, cuma e tscyꞌo Dios ejeeꞌy tuꞌn cytena junx. Bix cykꞌonx chjonte te Dios.

16Cykꞌoꞌnc cyipena tiꞌj tuꞌn tnojxsen cyanema tuya xnakꞌtzbil tiꞌ Cristo. Tuꞌn tbint jlu, cyxnakꞌtzam tyol Dios cyxolxa tuya cynaabla, bix cykꞌonx cynaabla cyxolxa. Bix oj cybitzena tiꞌ salmo bix tiꞌ bitz bix tiꞌ tyol Dios, chi bitzela tuya nim chjonte te Dios tuj cyanema.

17Bix cykilcaj ncub cybinchaꞌna bix nxiꞌ cykbaꞌna, cybinchama tisencꞌa tyolel Kaaw Jesúskey. Bix cykꞌonxa chjonte te Kman Dios tuꞌnxin.

Ti tten tnaabl jun ocslal cyxol xjal

18Key xuuj, cxeꞌl cyyeecꞌana cynimbila twitz cychmila, cuma ocslalkey, bix juꞌ taj Kaaw.

19Key xinak, cꞌoquel cyakꞌ cyxuꞌla cyey. Miꞌn chi yolena cyiw cyexuj.

20Yaltzen cyey cwal, cxeꞌl cybiꞌna cymana bix cytxuy tuj cykilca, cuma ntzalaj Dios cyiꞌja oj nchi nimana cymana bix cytxuy.

21Yaltzen cyey mambaj bix txuybaj, miꞌn tzꞌoc cyilena cycwala ka mintiiꞌ kaꞌ ma bint cyuꞌnkꞌa, tuꞌntzen miꞌn baj cycꞌuꞌjkꞌa.

22Key akꞌanal, cxeꞌl cybiꞌna taaw cyaakꞌena twitz txꞌotxꞌ tuj cykilca. Chi akꞌanala tuj tumel yaaꞌn nuk oꞌcx oj at cypatróna te cyeyꞌlte cyey, sino seyꞌx chi akꞌanala, bix tuya cykil cycꞌuꞌja. Chi akꞌananx yaaꞌn nuk tuꞌn cyela baꞌn cywitz cypatróna, sino tuꞌn t-xiꞌ cyyeecꞌana cynimbila twitz Dios.

23Cykilcaj akꞌuntl nbint cyuꞌna, cybinchama tuya cykil cycꞌuꞌja, tisenxsen nchi akꞌanana tuya Kaaw bix yaaꞌn nuk jaj nchi akꞌanana cyuya cypatróna.

24Amale mint tzin cykꞌoꞌn cypatróna jun cykaba, pero chi akꞌanana baꞌn, cuma cytzkiꞌntla ctzaal tkꞌoꞌn Kaaw jun baꞌn cychojbila te t-xel jcyajbela. Ja Kaaw Cristo jxjal nchi ajbena te.

25Pero kej xjal ma chi binchan kaꞌ tuj cyaakꞌen, ccyiikꞌeltzen jun cycastiwa tuꞌn Cristo. Tuj twitzxin min-al jun xjal mas nintzaj twitz juntl oj t-xiꞌ tcyeꞌyenxin cyaakꞌen xjal.