APOCALIPSIS 13 - Mam of Todos Santos -- Guatemala Unicode

Caꞌba xinak kaꞌxsen cycyeꞌnc tisen jun jil ntzaj nim txobajil kiꞌj

1Yajcꞌatltzen bix in cub weꞌya tibaj ttxa tzꞌaꞌn ttziiꞌ mar, bix e wila jun kaꞌxsen jil njatz tuj mar. At laaj tcache bix wuuk twiꞌ. Tjax juun corona twiꞌ jaca juun tcache. Bix tzꞌiꞌbec yasbil te Dios tiꞌ juun twiꞌ.

2Tcyeꞌncjil tisen jun tiire. Tkenjil tisen tken jun oso, bix ttzijil tisen ttzi jun león. Bix e xiꞌ tkꞌoꞌn dragón nim tipemaljil bix tajwaleljil tuꞌn tcawenjil.

3Bix e wila jun twiꞌjil tisencꞌa otk tiikꞌ jun is̈jnin tuꞌn tcyimjil. Pero e kꞌanj twiꞌjil. Juꞌ tzunj, cykilca xjal twitz txꞌotxꞌ e jaw kleeꞌke tiꞌjjil, bix oc lpeke tiꞌjjil.

4Bix a jaw cynimsaꞌn ja dragón otk txiꞌ tkꞌoꞌn tipemal tejil. Jax juꞌx e jaw cynimsaꞌn jajil. E xiꞌ cykbaꞌn:

—Min-al tisen jil. Min-al jacꞌa bint t-xcye tiꞌjjil tuj jun kꞌoj―tz̈i ke xjal.

5Bix e kꞌoj tejil jun tnaabljil tuꞌn tjaw niman tiibjil bix tuꞌn tyasenjil tiꞌj Dios, bix tuꞌn tcawenjil cyaꞌwnak xjaw tuya caꞌba.

6Bix oc tenjil yasel tiꞌj Dios bix tiꞌ tbi bix tiꞌj tja bix cyiꞌj kej najl tuj cyaꞌj.

7E kꞌoj tejil tuꞌn tkꞌojjil cyiꞌj ocslal bix tuꞌn tcub cyiꞌj tuꞌnjil. Bix e kꞌoj toclenjil te tuꞌn tcawenjil tibaj cykilca wik tiyꞌjil xjal bix cykilca wik xeꞌchel bix cykilca wik yol bix cykilca tnom.

8Bix cykilca xjal twitz txꞌotxꞌ cjawel cynimsaꞌn jajil, kej yaaꞌn tzꞌiꞌben cybi tuj uꞌj te chunkꞌlal jatxe tbintlen twitz txꞌotxꞌ, jatxetzen tcub ttzꞌiꞌben Dios cybi kej xjal at tuꞌn cyclet tuꞌnj tcyimlen Jtal Carnel.

9Cyjkom cyẍquina tuꞌn tel cyniꞌya tiꞌj kej yol lu.

10Alcyej ocslal ma kꞌumj cyiꞌj tuꞌn cyocx tuj tzeeꞌ, il tiꞌj chi oquex tuj tzeeꞌ. Bix alcyej ocslal ma kꞌumj cyiꞌj tuꞌn cycub byet tuꞌn espada, il tiꞌj tuꞌn cycub byet tuꞌn espada. Juꞌ tzunj, il tiꞌj tuꞌn cyten ocslal cyiw tuj cyocslabl bix tuꞌn tten cypasensya.

11Tbajlenxitltzen jlu, e wila juntl jil njatz twitz txꞌotxꞌ. At caꞌba tcachejil tisen tcache jun tal carnel, pero e yolenjil tisen junjil dragón.

12Junx taꞌ tipemaljil tuyaj jil tneel, bix najbenjil te tyoleljil tneel. Taakꞌenjil tcab tuꞌn tbinchantejil tuꞌn tjaw cynimsaꞌn cykilca xjal najl twitz txꞌotxꞌ ja jil tneel e tiikꞌ jun jawnex is̈jnin tuꞌn tcyim pero e kꞌanj.

13Jax juꞌx tzin tyeecꞌanjil jawnex tipemaljil, hasta tuꞌn tcuꞌtz kꞌakꞌ twitz cyaꞌj tuꞌnjil cywitz xjal.

14Cyuꞌnj techel lu nkꞌoj tejil tuꞌn tbint tuꞌnjil twitz jil tneel, nsbunjil cye xjal najl twitz txꞌotxꞌ. Nxiꞌ tkbaꞌnjil cye xjal tuꞌn tcub cybinchaꞌn jun tsant jil tneel e tiikꞌ jun is̈jnin tuꞌn tcyim tuꞌn jun espada pero e cyaj itzꞌj.

15Bix e kꞌoj tipemal jil tcab tuꞌn tocx tkꞌoꞌn t-xew tsant jil tneel, tuꞌntzen tbint tyolen tsant. Bix e tkba tsant tuꞌn tcub tbyet ejeeꞌj xjal min e jaw cynimsaꞌn tsant.

16Bix e tkba jil tcab tuꞌn toc jun techel tiꞌj cymankꞌab bix ka tiꞌj tibaj cywitz cykil xjal. Ajnintzleke, jawnexleke, kꞌinaleke, mebeleke, tzakpiꞌnleke, akꞌanal-leke, cykilca il tiꞌj cꞌoquel jun techel cyiꞌj.

17E tkbajil tuꞌn miꞌn cylokꞌon xjal bix tuꞌn miꞌn cyqꞌueyen ka min ma tzꞌoc techel jil tneel cyiꞌj. Jatzen techel tbijil, jatzen tajlal tbijil.

18Cꞌoquel cycꞌuꞌja tiꞌj jlu. Alcyekej at cynaabl, chi ximanx tiꞌj alcyej tajlal tzin techlaꞌn jil. Jtajlal tzin techlaꞌn jil, jatzenj tajlal tzin techlaꞌn jun xjal, jatzen tajlal wukak syent tuya oxcꞌal tuya wukak.