ROMANOS 6 - Mam of Todos Santos -- Guatemala Unicode

Tuꞌnj kmojbabl kiib tuya Cristo otzen cyaj jknaabl aj il te ootxa

1Katzen juꞌ ttena ja t-xtalbil Dios at mas tipemal twitz il, jeyꞌ, kape nxiꞌ cybisena tiꞌj tuꞌn tbint mas il cyuꞌna, cuma tuj cywitza cꞌajbel cyila te Dios tuꞌntzen tyeecꞌante jaj te Dios t-xalbil at mas tipemal.

2¿Pero tikentzen tzakpiꞌn koꞌ tjakꞌ tcawbil il tuꞌn Cristo ka nuk kajx tuꞌn kmeltzꞌaj juntl maj tuꞌn tbint il kuꞌn? ¿Mimpa tzꞌel cyniꞌya tiꞌj o cyim tej knaabl aj il?

3Cytzkiꞌntl tzuna tej kocslan tiꞌ Cristo Jesús, octzen koꞌ junxsen tuyaxin. Attzen kmojbabl kiib tuyaxin. ¿Pero mimpa tzꞌel cyniꞌya tiꞌj tuꞌn kmojbabl kiib tuyaxin, tisenxsen e xiꞌ koꞌ tuyaxin tej tcyimxin?

4Tuꞌn tzunj kmojbabl kiib tuya Cristo, otzen cyaj jknaabl aj il te ootxa tuj cyamecy tuꞌnxin. Bix tisen e jatz itzꞌjxin juntl maj tuj cyamecy tuꞌn tipemal Kman Dios, jax juꞌx o tzꞌitzꞌj jun kchunkꞌlal acꞌaj.

5Jaxte at jun acꞌaj kchunkꞌlal, cuma at kmojbabl kiib tuya Cristo yaaꞌn nuk oꞌcx tej tcyimxin, sino jax juꞌx tej tjatz itzꞌjxin tuj cyamecy. Juꞌ tzunj at kchunkꞌlal acꞌaj.

6Qꞌuelel kniyꞌ tiꞌj jaan jknaabl aj il e cyim tuya Cristo twitz cruz. E cub byet-xin tuꞌntzen tbaj tilel cykil il, tuꞌntzen miꞌntl ko ten tjakꞌ tcawbil il.

7Tisentzen jun xjal cyimne miꞌn tentl tjakꞌ tcawbil juntl xjal, cuma otk cyim, jax juꞌx koꞌ, yaaꞌn etoꞌ tjakꞌ tcawbil il ka at kmojbabl kiib tuya Cristo. Tzakpiꞌn koꞌ tiꞌ tcawbil il, cuma tuꞌn kmojbabl kiib tuya Cristo, o cyim jknaabl aj il.

8Cuma e cyim knaabl aj il tuꞌn kmojbabl kiib tuya Cristo, jaxte cꞌajbel kmojbabl kiib tuyaxin tuꞌn at kchunkꞌlal acꞌaj tuyaxin, cuma yaaꞌn nuk oꞌcx e cyimxin, sino jax juꞌx e jatz itzꞌjxin juntl maj tuj cyamecy.

9Tuꞌn kmojbabl kiib tuyaxin, mlay ko aj meltzꞌaj tjakꞌ tcawbil cyamecy, cuma ktzkiꞌn e jatz itzꞌjxin juntl maj tuj cyamecy bix mlay cyimxin, cuma jcyamecy mintiiꞌtl tcawbil tibajxin.

10Miꞌn cyimxin juntl maj, cuma tej tcyimxin, e baj tilel il te junx maj. E cyaj il tuꞌnxin tuj cyamecy, bix itzꞌjxin tuꞌn tajbenxin te Dios.

11Jax juꞌxse ke. Qꞌuelel kniyꞌ tiꞌj tuꞌn kmojbabl kiib tuyaxin o cyaj kkꞌoꞌn kil, bix at kchunkꞌlal acꞌaj tuꞌn kajben te Dios.

12Entonces, qꞌuelel cyniꞌya tiꞌj miꞌn ko tentl tjakꞌ tcawbil il. Juꞌ tzunj, key hermano, miꞌn cyakꞌ cyiiba juntl maj tjakꞌ tcawbil il. Miꞌn txiꞌ cyiiꞌna jtajbil cyxumlala yaaꞌn baꞌn.

13Miꞌn txiꞌ cykꞌoꞌna ambil te cyxumlala tuꞌn tbinchan kaꞌ, sino juꞌ cykꞌaꞌ cyiiba tuꞌn cyajbena te Dios. Nejl e tenkey tjakꞌ tcawbil cyamecy, pero jaꞌlewe o kꞌoj acꞌaj cychunkꞌlala tuꞌn Dios. Juꞌ tzunj cykꞌoꞌnc cyipena tuꞌn tajben cyxumlala te Dios tuꞌn tbint baꞌn tuꞌn.

14Ja te Dios cxeꞌl cynimana, cuma yaaꞌn eteꞌtla tjakꞌ tcawbil il. Nejl tej cykꞌon cyiiba tiꞌ jun ley tuꞌn cycleta, e chicꞌajaxsen at nim tipemal il cyibaja. Pero jaꞌlewe mintiiꞌtl tipemal il cyibaja, cuma tuꞌn t-xtalbil Dios o chi tzakpeta tiꞌj tej toc chkꞌetkey te nimlte tleyxin tuꞌntzen cycleta.

Il tiꞌj tuꞌn kbinchante baꞌn cuma te Dios koꞌ

15Kapetzen tuj cywitza baꞌn tuꞌn tbint il kuꞌn, cuma o kiikꞌ t-xtalbil Dios, bix juꞌ tzunj mintiiꞌtl il tiꞌj tuꞌn t-xiꞌ kniman ley. Pero yaaꞌnxsele tumel ka nxiꞌ cybisena juꞌwa.

16¿Mimpa tzꞌel cyniꞌya tiꞌj ka cykꞌon cyiiba tuꞌn t-xiꞌ cynimana jun xjal, jatzen xjalja cꞌoquel te cyaawey? Jax juꞌx tuya il. Ka cykꞌon cyiiba tuya il, cykꞌontzen cyiiba tjakꞌ tcawbil il, bix cxeꞌl tiiꞌn ejeeꞌy tuj cyamecy. Pero ka cykꞌon cyiiba tuꞌn cynimana Dios, ja tzunxin cyaawey, bix chi elela jiquen twitzxin.

17Chjonte Dios miꞌn chi tentla tjakꞌ tcawbil il, sino o cynimana tuya cykil cycꞌuꞌja jxnakꞌtzbil jaxxix e pon cyxola.

18O chi tzakpeta tjakꞌ tcawbil il. O chi oca tuj tcwent Dios tuꞌn tbint baꞌn cyuꞌna.

19Cyiw chꞌin tuꞌn tel cyniꞌya tiꞌj nyola. Juꞌ tzunj ma txiꞌ ntzꞌiꞌbena cyey otk tzꞌoc il te cyaawey nejl. Ajben cyxumlala tuꞌn tbint kaꞌ cyuꞌna, bix nim min e xiꞌ cynimana ley. Jawnex e jaw cyila. Pero yaltzen jaꞌlewe iltzen tiꞌj cꞌajbel cyxumlala tuꞌn tbint jun baꞌn cyuꞌna. Ka ma bint cyuꞌna juꞌwa, nchi ajben tzuna te Dios.

20Nejl tej cytena tjakꞌ tcawbil il, mintiiꞌ cyaja te tuꞌn cyxiꞌ lpey tiꞌj baꞌn.

21¿Titzen e cycamey tej cybinchana il? Mintiiꞌ, cuma oꞌcx ma takꞌ cychꞌixewa jaꞌlewe tiꞌj e bint cyuꞌna nejl, bix cuma at tuꞌn cyxiꞌy tuj cyamecy tuꞌn.

22Pero yal jaꞌlewe o chi etz kꞌiꞌna tjakꞌ tcawbil il. Tjakꞌtzen tcawbil Dios eteꞌy, bix o kꞌoj cyey tuꞌn cycub tena sakxix bix tuꞌn at cychunkꞌlala mintiiꞌ tbajlel.

23Qꞌuelel kniyꞌ tiꞌj kej xjal nchi ajben tjakꞌ tcawbil il, jatzen chojbil cyej cycyamecy. Pero kej xjal cykꞌon cyiib te Dios, nkꞌontzen Dios cychunkꞌlal mintiiꞌ tbajlel tuꞌnj at cymojbabl cyiib tuya Kaaw Cristo Jesús.