SAN MATEO 23 - Mam of Todos Santos -- Guatemala Unicode

Tej tyole Jesús tiꞌj cymodo txꞌolbal ley bix kej fariseo yaaꞌn baꞌn(Mr. 12:38-40; Lc. 11:37-54; 20:45-47)

1Bix e xiꞌ tkbaꞌn Jesús cye tnimal xjal bix cye t-xnakꞌatzxin:

2—Ke txꞌolbal ley bix ke fariseo, cye cyaakꞌen tuꞌn cykꞌonte xnakꞌtzbil tiꞌj tley Moisés.

3Juꞌ tzunj, cykilcaj ntzaj cykbaꞌn tuꞌn tbint cyuꞌna, cynimanx bix cybinchanx. Pero miꞌn cybinchay tisenj cye tzin cybinchaꞌn, cuma min nbint cyuꞌn tisenj tzin cykbaꞌn.

4Nimxsen ley cyiw nbint cyuꞌn tuꞌn tjaw cyiken xjal, pero mintiiꞌ nbint cyuꞌn tuꞌn t-xiꞌ cyonen ke xjal tuꞌn tbint ley cyuꞌn.

5Cykilcaj nbint cyuꞌnxin, nuk oꞌcx tuꞌn toc cycyeꞌyen xjal. Ncub cytzꞌiꞌbenxin tyol Dios twitz jun piẍ tzꞌuꞌn bix n-oc cyẍpoꞌnxin tiꞌ twiꞌ cywitz bix tiꞌ cykꞌab, tuꞌntzen toc cycyeꞌyen xjal cynimbil tiꞌ ley. Bix n-oc cykꞌoꞌnxin punc ttxaꞌn cyxbalenxin tuꞌn tchicꞌajax ka jiquenkexin tuj ley.

6Bix cyajxin tuꞌn cycub kexin tuj tneel kꞌukbil tuj nin waabj. Oj cyponxin tuj camon jaaꞌ, nuk jaj kꞌukbil mas jawnex ncheꞌxxin jyolte.

7Juꞌx oj ncheꞌxxin tuj plaza, cyajxin oj cyoc kꞌolben ke xjal cyexin tuya nim nimbil, bix tuꞌn toc cykꞌoꞌn xjal cybixin Xnakꞌtzal.

8Pero cyey, miꞌn tzꞌoc cykꞌoꞌna cyiiba tuꞌn toc cykꞌoꞌn xjal cybiy Xnakꞌtzal, cuma junx Xnakꞌtzal cyey at, jaj Scyꞌoꞌn tuꞌn Dios, bix cykilcakey cyitzꞌen cyiiba tjakꞌ tcawbilxin.

9Bix miꞌn tzꞌoc cykꞌoꞌna tbi jun xjal te cymana tzalu twitz txꞌotxꞌ, cuma junx Cymana at tuj cyaꞌj.

10Bix miꞌn tzꞌoc cykꞌoꞌna cyiiba tuꞌn toc cykꞌoꞌn xjal cybiy tneel te cye, cuma junx nejenel cyey at, jaj Cristo.

11Kej xjal n-oc cykꞌon cyiib tiꞌj tuꞌn cyajben cye niyꞌtl, ejeeꞌtzen mas jawnex cyxola.

12Alj xjal njaw tniman tiib, cꞌoquel te chꞌin. Bix alj xjal n-oc tkꞌon tiib te chꞌin, ckꞌojel te tuꞌn toc te nim.

13Yaltzen cyey txꞌolbal ley bix aj fariseo, ¡ay xsunkey! Xmeletzꞌkey. Tzin cylomoꞌna tlemel jaaꞌ cywitz xjal cyaj tuꞌn cyocx tuj tcawbil Dios. Cycyꞌiy tuꞌn cyocxa, pero amale cyajat niyꞌtl xjal tuꞌn cyocx, pero n-oc cyipena tiꞌj tuꞌn miꞌn chi ocx.

14¡Ay xsunkey txꞌolbal ley bix fariseo! Xmeletzꞌkey, cuma nchi kanena nim chojbil jaaꞌ cye viuda, tuꞌntzen ka min xchjet cyuꞌn viuda, n-eltzen cyiiꞌntla cyjaxuj, tzinxsen chi naꞌna Dios nim tyem cywitz xjal nuk tuꞌn tcub naj cybinchbena cywitz xjal. Juꞌ tzunj, mas cycastiwiya cwel cyibaja cywitzj cwel cyibaj niyꞌtl xjal.

15¡Ay xsunkey txꞌolbal ley bix fariseo! Xmeletzꞌkey, cuma nbaj cybetena mar bix twitz txꞌotxꞌ cyxol jun wikxitl xjal tuꞌn tocx jun xjal tuj cyxnakꞌtzbila, bix oj tocx xjal tuj cyxnakꞌtzbila, mas aj il n-oca cywitza, bix mas nxiꞌ tuj il cyuꞌna tuꞌn t-xiꞌ tuj kꞌakꞌ.

16¡Ay xsunkey kꞌol tumel cye xjal pero tisen mos̈key! Tzin cykbaꞌna ka yaaꞌn nimxix tajben nin tja Dios te jurament tuꞌn tcywix tyol jun xjal. Pero ka ma tzaj kꞌoꞌn tipemal tyol jun xjal tuꞌn oro tuj tja Dios te jurament, iltzen tiꞌj tuꞌn tjapan baj tiꞌ tyol, tz̈ikey.

17¡Mintiiꞌ cynaabla, bix mos̈key! ¿Alcye mas xjan? ¿Japa oro, bix ka nintzaj tja Dios jaaꞌ taꞌ Dios? Mas il tiꞌj Dios, bix xjan oro nuk oꞌcx cuma tocx tuj tja Dios.

18Jax juꞌx tzin cykbaꞌna ka yaaꞌn nimxix tajben altar te yol te jurament tuꞌn tcywix tyol jun xjal. Mas tipemal oybil tibaj altar tuꞌn tcywix tyol, bix juꞌ tzunj, ka ma tzaj kꞌoꞌn tipemal tyol jun xjal tuꞌnj oybil te jurament, iltzen tiꞌj tuꞌn tjapan baj tiꞌ tyol, tz̈ikey.

19¡Mos̈key! ¿Alcye mas il tiꞌj? ¿Japa altar te Dios, bix ka oybil tibaj altar oyet te Dios? Mas il tiꞌj Dios, bix xjan altar nuk oꞌcx cuma tocx tuj tja Dios.

20Juꞌ tzunj, yaaꞌn il tiꞌj ka ma cywix tyol jun xjal tuꞌnj altar te Dios te jurament bix ka tuꞌnj oybil, cuma tuꞌn Dios te altar tzin tkꞌoꞌn tipemal tyol.

21Bix ka ma cywix tyol jun xjal tuꞌn tja Dios te jurament, tuꞌn Dios tuj tja Dios tzin tkꞌoꞌn tipemal tyol.

22Bix ka ma cywix tyol jun xjal tuꞌn yol tiꞌj cyaꞌj te jurament, tuꞌn Dios ncub ke tuj tkꞌukbil tzin tkꞌoꞌn tipemal tyol.

23¡Ay xsunkey txꞌolbal ley bix fariseo! Xmeletzꞌkey, cuma nchi kꞌona tlajan paꞌ te alwent bix anís bix comino, pero min tzꞌoc cykꞌon cyiiba tuꞌn tbint ja mas il tiꞌj tzꞌiꞌben tuj ley cyuꞌna. Min tzꞌoc cykꞌon cyiiba te onlte cye xjal bix tuꞌn toc cykꞌakꞌen cycꞌuꞌja cyiꞌj bix tuꞌn cybeta baꞌn tuya Dios. Tumel tuꞌn t-xiꞌ cykꞌoꞌna tlajan paꞌ te Dios, pero yaaꞌn tumel ma cyaj cycyeꞌyena jniyꞌtl tzꞌiꞌbet tuj ley.

24Amale mint tzꞌel cyniꞌya tiꞌj ti jilel mas il tiꞌj tuꞌn tbint, pero tzin cykbaꞌna cye xjal alcye tuꞌn tbint cyuꞌn. Tisen mos̈ kꞌil xjalkey. Ejeeꞌy tisen jun xjal nxiꞌ twaaꞌn, bix ka ma cnet jun us tuj twa, n-eltzen tiiꞌn. Pero ka at jun tz̈ej tuj twa, min tzꞌel tniyꞌ tiꞌj.

25¡Ay xsunkey txꞌolbal ley bix fariseo! Xmeletzꞌkey, cuma ejeeꞌy tisen jun xjal n-oc tkꞌoꞌn tiꞌj tuꞌn tel ttxjoꞌn tiꞌjxe jun vaso bix ka jun lak. Pero yajtzen tuj tcꞌuꞌj lak, ncyaj tzꞌil. Jax juꞌx cyey, nim nbint cyuꞌna cywitz xjal tuꞌn tchicꞌajax ka sakkey. Pero tuj cyanema, nuk alakꞌ xjalkey, bix nuk kaꞌ cyaja tuꞌn tbint.

26Ejeeꞌy fariseo mos̈, il tiꞌj tuꞌn ttxjet cyanema, tuꞌntzen tsakxix te junx maj.

27¡Ay xsunkey txꞌolbal ley bix fariseo! Xmeletzꞌkey. Tisen cyjayel anemkey. Tocse txun cyiꞌj panteón, bix cyeca cyiꞌjxe. Pero tuj cycꞌuꞌj, nuk nojne tuꞌn cybakel anem, bix nuk kꞌeyne at cyuj.

28Jax juꞌx cyey, tzin cyyeecꞌan cyiiba cywitz xjal tisencꞌa jiquenkey. Pero tuj cyanema, nojnekey tuya xmeletzꞌbil bix jyaaꞌn baꞌn.

29¡Ay xsunkey txꞌolbal ley bix fariseo! Xmeletzꞌkey, cuma njaw cybinchaꞌna cypanteón tyolel Dios te ootxa, bix nbaj cybinchaꞌna cypanteón tuꞌn tcyaj mejor cycyeꞌnc.

30Tzin cykbaꞌna: “Nuket etoꞌ tuj tyem tej cyten kiyꞌjil, mintle e tzaj konen cye kiyꞌjil tuꞌn tcub cybyoꞌn ke tyolel Dios,” tz̈ikey.

31Pero oj nxiꞌ cykbaꞌna ka cychmana kej xjal e byonte ke tyolel Dios, tzin cykbaꞌna ka junx cynaabla cyuyaj cyiyꞌjila byol tyolel Dioske.

32At-x chꞌintl tuꞌn tpon baj twiꞌ j-akꞌuntl e tzyet cyuꞌn cyiyꞌjila te ootxa. Juꞌ tzunj, japanx baj twiꞌ cyuꞌna jmin o japan baj cyuꞌn cyiyꞌjila.

33¡Lbajkey! Mlay chi coꞌpja tuꞌn miꞌn cheꞌxa tuj kꞌakꞌ.

34Tuꞌn tpon baj twiꞌj akꞌuntl e tzyet cyuꞌn cyiyꞌjila, jeyꞌ, cxeꞌl nsmaꞌna mas tyolel Dios cyuyey, cyuyax kej at cynaabl, cyuyax ke tzꞌibel tyol Dios. Cyxoltzen kej lu at juun cwel cybyoꞌna twitz cruz. At juuntl cxeꞌl cykꞌoꞌna tzꞌuꞌn cyiꞌj tuj camon cyjay, bix at juuntl pjel yaset cyuꞌna tuj cykilca tnom.

35Bix oj tbint cyuꞌna juꞌwa, cwel cychjoꞌna cykilca cycublen xjal jiquen, jatxe tcublen Abel, hasta tejxe tcub Zacarías, tchman Berequías, jtyolel Dios e cub cybyoꞌna tuj tja Dios tiꞌjxe altar twitz tneel xjan cwart.

36Jaxxix cxeꞌl nkbaꞌna cyey, ejeeꞌy judío te jaꞌlewe chi iklte nim castiwa tuꞌn tlaj kej il lu―tz̈i Jesús cye fariseo.

Oc qꞌuixba tcꞌuꞌj Jesús cyiꞌj xjal aj Jerusalén(Lc. 13:34-35)

37Bix e xiꞌ tkbaꞌntl Jesús:

—Key aj Jerusalén, aj Jerusalén, ¿tikentzen nchi cub cybyoꞌna ke tyolel Dios? ¿Bix tiken nchi cub cybyoꞌna tuꞌn xak kej xjal nxiꞌ tsmaꞌn Dios cyuyey? Nim maj o wajbeꞌya tuꞌn nclonteya ejeeꞌy, tisen nchi ocx clet tal jun ttxu eyꞌ tjakꞌ t-xiicyꞌ, pero cycyꞌiy inayena.

38Jeyꞌ, cyjel tcyeꞌyen Dios cytanema, bix min-al xjal cyjel tuj.

39Cxeꞌl nkbaꞌna cyey, oj ncyima, miꞌn tzꞌoc cycyeꞌyena nwitza juntl maj hasta ojxe tpon jkꞌij oj t-xiꞌ cykbaꞌna: “Chjonte te Dios tiꞌj ja xjal lu tzul smaꞌn tuꞌn Dios te cawel,” tz̈i cybela―e xiꞌ tkbaꞌn Jesús.