Jeremia 47 - Malagasy Bible Revision Version

Faminaniana ny amin’ny Filistina

1Ny tenin’NY TOMPO izay tonga tamin’i Jeremia mpaminany ny amin’ny Filistina, fony i Farao tsy mbola namely an’i Gaza.

2Izao no lazain’NY TOMPO:

Indro, misy rano mizotra avy any avaratra

ka ho tonga ony maria

manafotra ny tany mbamin’izay rehetra ao aminy,

dia ny tanàna mbamin’izay monina ao aminy;

mitaraina ny olona,

ary midradradradra ny mponina rehetra amin’ny tany,

3noho ny fikatrokatroky ny kitron’ny soavaliny matanjaka

sy ny fikorodondrodon’ny kalesy fitondrany miady

ary ny fikotrokotroky ny kodiarany;

ary ny ray dia tsy mijery ny zanany

fa miraviravy tanana,

4noho ny hiavian’ny andro

handravana ny Filistina rehetra

sy handringanana izay sisa rehetra

ta hanampy an’i Tiro sy i Sidona;

fa horavan’NY TOMPO ny Filistina,

dia ny sisa avy any amin’ny nosy Kaftora.

5Voaharatra ny lohan’i Gaza,

ao anatin’ny fahanginana i Askelona

mbamin’ny sisa amin’ny lohasahany;

mandra-pahoviana no mbola hitetika ny tenanao ianao?

6Indrisy, ry sabatry NY TOMPO!

Mandra-pahoviana no tsy hitsaharanao?

Midira ao amin’ny tranonao ihany;

mitsahara, mijanòna.

7Hataonao ahoana no fitsahatra?

Fa NY TOMPO no nandidy azy,

eny, hamely an’i Askelona mbamin’ny eny amoron-dranomasina,

izay no efa nanendreny azy.