2 Timotheus 4 - Yr Oraclau Bywiol - Welsh New Testament by John Williams 1842

1-22Yr ydwyf yn erchi i ti, yn ngwydd Duw, ac Iesu Grist, yr hwn á farna y byw a’r meirw, yn ei ymaddangosiad a’i deyrnas; cyhoedda y gair, bydd daer mewn amser, allan o amser, argyhoedda, cerydda, cynghora, gyda phob hirymaros ac athrawiaeth. Canys daw yr amser, pryd na ddyoddefont athrawiaeth iachus; eithr, gàn fod a’u clustian yn merwino, hwynthwy, yn ol eu chwantau eu hunain, á bentỳrant iddynt eu hunain athrawon; ac oddwrth y gwirionedd y troant ymaith, ac at chwedlau y troant. Eithr gwylia di bob amser; goddef adfyd; gwna waith efengylwr; cyflawna dy weinidogaeth. Canys myfi àr fyrder á aberthir, ac amser fy ymddattodiad i á nesâodd. Mi á ymdrechais yr ymdrech dda, mi á orphenais yr yrfa, mi á arosais yn ffyddlawn; o hyn allan rhoddwyd coron cyfiawnder yn nghadw i mi, yr hon á rydd yr Arglwydd, y Barnwr cyfiawn, i mi yn y dydd hwnw; a nid i mi yn unig, ond hefyd i bawb à garant ei ymddangosiad ef, Brysia ddyfod ataf àr fỳr; canys Demas, wedi caru y byd presennol, á’m gadawodd i, ac á aeth ymaith i Thessalonica; Crescens i Galatia, a Thitus i Ddalmatia. Luwc yn unig y sy gyda mi. Cymer Farc a dwg gyda thi, canys defnyddiol iawn yw efe i mi yn y weinidogaeth. Eithr Tychicus á ddanfonais i Ephesus. Y fantell à adewais i yn Nhroas gyda Charpus, pan ddelych, dwg gyda thi, a’r llyfrau, yn enwedig y memrwn. Alecsander, y gof copr, á wnaeth i mi ddrygau lawer; yr Arglwydd á dâl iddo yn ol ei weithredoedd; yr hwn gochel, canys efe á safodd yn ddirfawr yn erbyn ein hymadroddion ni. Yn fy ateb cyntaf, nid ymddangosodd neb gyda mi, eithr pawb á’m gadawsant. Na rodder hyn yn eu herbyn! Eithr yr Arglwydd á safodd gyda mi, ac á’m nerthodd, fel drwof fi y cyflawn‐fynegid y cyhoeddedigaeth, ac y clywai yr holl Genedloedd; a mi á waredwyd o enau y llew. A’r Arglwydd á’m gweryd i rhag pob gwaith drwg, ac á’m ceidw iddei deyrnas nefol: i’r hwn y byddo gogoniant yn oes oesoedd. Amen. Anerch Brisca ac Acwila, a theulu Onesiphorus. Erastus á arosodd yn Nghorinth; ond Trophimus á adewais yn Miletus yn glaf. Brysia ddyfod cyn y gauaf. Y mae Eubuwlus yn dy anerch, a Phuwdens, a Linus, a Chlawdia, a’r brodyr oll. Yr Arglwydd Iesu Grist fyddo gyda’th ysbryd di. Rhad fyddo gyda chwi.