Colossiaid 4 - Yr Oraclau Bywiol - Welsh New Testament by John Williams 1842

1Y meistriaid, rhoddwch i’ch gweision yr hyn sy gyfiawn ac uniawn, gàn wybod bod i chwithau Feistr yn y nefoedd.

2-18Dyfalbarêwch mewn gweddi, gan wylied ynddi gyda diolchgarwch; àr yr un pryd gàn weddio drosom ninnau, àr i Dduw agori i ni ddrws ymadrodd i draethu dirgelwch Crist, oherwydd yr hwn, yn wir, yr ydwyf fi mewn rhwymau; fel yr amlygwyf ef, megys y dylwn draethu. Rhodiwch mewn doethineb tuagat y rhai sydd oddi allan, gàn ennill amser. Bydded eich ymadrodd bob amser yn weddus, wedi ei bereiddio â halen, gàn wybod pa fodd y dylech roddi ateb i bob un. Fy holl helynt i á hysbysa Tychicus i chwi, brawd anwyl, a ffyddlawn weinidog, a chydwas yn yr Arglwydd; yr hwn á ddanfonais i atoch yn un swydd, fel y gwybyddai eich helynt chwi, ac y dyddanai eich calonau chwi; gydag Onesimus, brawd ffyddlawn ac anwyl, yr hwn sydd o honoch chwi. Hwy á hysbysant i chwi bob peth à wneir yma. Y mae Aristarchus, fy nghydgarcharor, yn eich anerch; a Marc, nai Barnabas, am yr hwn y cawsoch orchymynion: os daw efe atoch, derbyniwch ef; – ac Iesu, yr hwn á elwir Iustus; y rhai ynt o’r enwaediad. Y rhai hyn yn unig ydynt gydweithwyr â mi dros deyrnas Duw, y rhai á fuont yn gysur i mi. Y mae Epaphras, yr hwn á ddaeth oddwrthych chwi, gwas i Grist, yn eich anerch; gàn ymdrechu yn wastadol drosoch mewn gweddiau, àr i chwi sefyll yn berffaith ac yn gyflawn yn holl ewyllys Duw. Canys yr wyf yn dyst iddo ei fod mewn llafur mawr drosoch, a thros y rhai yn Laodicea, a’r rhai yn Hierapolis. Y mae Luwc, y meddyg anwyl, a Demas, yn eich anerch. Anerchwch y brodyr yn Läodicea; a Nymphas, a’r gynnulleidfa yn ei dŷ ef. A gwedi darllen y llythyr hwn i chwi, perwch ei ddarllen hefyd yn nghynnulleidfa y Läodiceaid; a darllen o honoch chwithau yr un o Läodicea. A dywedwch wrth Archippus, “Edrych at y weinidogaeth à dderbyniaist yn yr Arglwydd, àr i ti ei chyflawni hi.” Anerchiad Paul, a’m llaw fy hun, Cofiwch fy rhwymau. Rhad fyddo gyda chwi.