1 Timotheus 1 - Yr Oraclau Bywiol - Welsh New Testament by John Williams 1842

1-2 Paul, Apostol i Iesu Grist, drwy orchymyn Duw ein Hiachawdwr, a’r Arglwydd Iesu Grist ein gobaith; at Dimothëus fy mab cynnwynol yn y ffydd: Rhad, trugaredd, a thangnefedd oddwrth Dduw ein Tad, ac oddwrth Grist Iesu ein Harglwydd.

3-20Megys y deisyfais arnat aros yn Ephesus, pan oeddwn yn myned i Facedonia, fel y gorchymynit i rai beidio dysgu dim yn amgen: na rhoi coel i chwedlau, ac achau anorphen, y rhai sydd yn peri dadleuon yn hytrach na chyflawni goruchwyliaeth Duw, yr hon sy drwy ffydd; (a dyben y gorchymyn hwn yw cariad, o galon bur, a chydwybod dda, a ffydd ddiffuant: oddwrth yr hyn bethau y gwyrodd rhai, ac y troisant ymaith at ofersiarad. Gan ewyllysio bod yn athrawon o’r gyfraith, heb ddeall na pha bethau y maent yn eu dywedyd, nac am ba bethau y maent yn taeru. Nyni á wyddom, yn wir, mai da yw y gyfraith, os arfer dyn hi yn gyfreithlawn. Gan wybod hyn, nad i’r cyfiawn y gosodwyd y gyfraith, ond i’r rhai digyfraith ac annarostyngedig, i’r annuwiolion a’r pechaduriaid, i’r rhai ansantaidd a halogedig; i dadleiddiaid, a mamleiddiaid, i leiddiaid dynion, i buteinwyr, i wrywgydwyr, i ladron dynion, i gelwyddwyr, i anudonwyr, ac od oes dim arall yn wrthwyneb i athrawiaeth iachus; yn ol efengyl ogoneddus y bendigedig Dduw, am yr hon yr ymddiriedwyd i mi. Ac yr ydwyf yn diolch i Grist Iesu ein Harglwydd, yr hwn á’m cymhwysodd i, am iddo fy nghyfrif yn ffyddlawn, gàn fy ngosod yn y weinidogaeth, yr hwn oeddwn o’r blaen yn gablwr, ac yn erlidiwr, ac yn drahâus. Eithr mi á gefais drugaredd, am i mi yn ddiarwybod ei wneuthur drwy annghrediniaeth. A rhad ein Harglwydd ni á ymhelaethodd yn ddirfawr, yn nghyd â’r ffydd a’r cariad y sy drwy Grist Iesu. Gwir yw y gair ac yn haeddu pob derbyniad, ddyfod Crist Iesu i’r byd i gadw pechaduriaid, o ba rai pènaf ydwyf fi. Eithr, o achos hyn y cefais drugaredd, fel ynof fi, y pènaf o bechaduriaid, yr arddangosai Iesu Grist bob hirymaros, yn gynllun i’r sawl à gredont rhagllaw ynddo ef, èr bywyd tragwyddol. Ac i’r Brenin tragywyddol, anfarwol, anweledig, i Dduw yn unig, y byddo anrhydedd a gogoniant, yn oes oesoedd. Amen.) Y gorchymyn hwn yr ydwyf yn ei roddi i ti, fy mab Timotheus, yn ol y prophwydoliaethau à gerddasant o’r blaen am danat, fel y gellit drwyddynt hwy filwrio y filwriaeth dda; gàn gadw ffydd a chydwybod dda; yr hon á fwriodd rhai ymaith, ac o ran y ffydd á wnaethant longddrylliad: o ba rai y mae Hymenëus ac Alecsander, y rhai á draddodais i’r gwrthwynebwr, fel drwy gerydd y dysgid iddynt beidio cablu.