2 Corinthiaid 2 - Yr Oraclau Bywiol - Welsh New Testament by John Williams 1842

1-11Hefyd, mi á benderfynais hyn ynof fy hun, na ddeuwn drachefn atoch gyda thristwch. Oblegid pe bawn yn eich tristâu chwi, pwy yw yr hwn à’m gwnai i yn llawen, oddeithr yr hwn à dristâwyd genyf fi? Am hyny, mi á ysgrifenais hyn yma atoch, fel pan ddelwn, na chawn dristwch oddwrth y rhai y dylwn lawenâu ynynt; gàn hyderu am bawb o honoch, bod fy llawenydd i yn llawenydd i chwi oll. Canys o drallod mawr a chyfyngder calon, yr ysgrifenais atoch â dagrau lawer; nid fel y tristâid chwi, eithr fel y gwybyddech y cariad sy genyf yn dra helaeth tuag atoch chwi. Ac os tristâodd rhyw un fi, ni’m tristâodd i, oddigerth drwy ran o honoch chwi, fel na byddo i mi osod baich arnoch chwi oll. Digon i’r cyfryw un y gosbedigaeth yma, à roddwyd gàn y nifer mwyaf. Yn gymaint ag y dylech, yn y gwrthwyneb, yn fwy parod faddau iddo a’i ddyddanu, rhag llyncu y cyfryw un gàn ormod tristwch. Am hyny, yr wyf yn attolwg i chwi, gadarnâu eich cariad tuag ato ef. Canys èr mwyn hyn hefyd yr ysgrifenais, fel y gwybyddwn y prawf o honoch, á ydych yn ufydd yn mhob peth. I’r hwn yr ydych chwi yn maddau dim iddo, yr wyf finnau hefyd yn maddau; a minnau, os maddeuais ddim, i’r hwn y maddeuais, èr eich mwyn chwi y maddeuais, yn mherson Crist; fel na’n sòmer gàn Satan; canys nid ydym heb wybod ei ddichellion ef.

12-17Hefyd, pan ddaethym i Droas i fynegi efengyl Crist, ac agoryd i mi ddrws gàn yr Arglwydd; ni chefais lonydd yn fy ysbryd, am na chefais Ditus fy mrawd: gàn hyny, gwedi canu yn iach iddynt, mi á aethym ymaith i Facedonia. Eithr i Dduw y byddo’r diolch, yr hwn yn wastad sydd yn peri i ni oruchafiaeth yn Nghrist; a’r hwn sy trwom ni, yn gwasgaru arogledd y wybodaeth am dano ef yn mhob lle: canys perarogl Crist ydym ni, drwy Dduw, yn mhlith y rhai cadwedig, ac yn mhlith y rhai colledig. I’r naill, yn wir, yr ydym yn arogl marwolaeth yn dybenu mewn marwolaeth; ond i’r lleill, yn arogl bywyd yn dybenu mewn bywyd; a phwy sy gymhwys i’r pethau hyn? Pa fodd bynag, nid ydym ni megys llawer, y rhai sydd yn cymysgrywio gair Duw; eithr yn wir o gywirdeb, ïe, yn wir o Dduw, yn ngwydd Duw, yr ydym ni yn llefaru yn Nghrist.