Ephesiaid 6 - Yr Oraclau Bywiol - Welsh New Testament by John Williams 1842

1-4Y plant, ufyddêwch i’ch rhieni yn yr Arglwydd; canys hyn sy gyfiawn. Anrhydedda dy dad a’th fam, (yr hwn yw y gorchymyn cyntaf gydag addewid,) fel y byddo yn dda i ti, a fel y byddech hirhoedlog àr y ddaiar. A chwithau, dadau, na ỳrwch eich plant i ddigio; ond dygwch hwynt i fyny yn addysg ac athrawiaeth yr Arglwydd.

5-24Y gweision, ufyddêwch i’ch meistriaid yn ol y cnawd, gydag ofn ac arswyd, yn nghywirdeb eich calon, megys i Grist. Nid â golwgwasanaeth, fel boddlonwyr dynion, ond fel gweision i Grist, yn gwneuthur ewyllys Duw o’r galon; gydag ewyllys da, yn gweithredu fel gweision i’r Arglwydd, a nid i ddynion: gàn wybod mai pa ddaioni bynag á wnelo pob un, am hyny y derbyn efe gàn yr Arglwydd, pa un bynag fyddo ai caeth ai rhydd. A chwithau, feistriaid, gwnewch yr un pethau iddynt hwy, gàn fod yn gymedrol mewn bygythio; gán wybod bod eich meistr chwithau hefyd yn y nefoedd, a nid oes derbyn wyneb gydag ef. Yn ddiweddaf, fy mrodyr, ymnerthwch yn yr Arglwydd, ac yn nghadernid ei allu ef. Gwisgwch ollarfogaeth Duw, fel y galloch sefyll yn erbyn dichellion y diafol. Oblegid nid yw ein hymdrech ni yn erbyn cig a gwaed yn unig; ond yn erbyn llywodraethau, yn erbyn awdurdodau, yn erbyn llywiawdwyr y tywyllwch hwn, ac yn erbyn ysbrydion drygionus yn y gororau nefol. Oblegid hyn, cymerwch i fyny ollarfogaeth Duw, fel y galloch wrthsefyll yn y dydd drwg, a gwedi gorphen pob peth, sefyll. Sefwch, gàn hyny, gwedi amwregysu eich lwynau â gwirionedd, a gwisgo dwyfroneg cyfiawnder; a gwisgo am eich traed barotöad efengyl tangnefedd. Ar y cwbl, wedi cymeryd i fyny darian y ffydd, â’r hwn y gellwch ddiffoddi holl bicellau tanllyd y fall. Cymerwch hefyd helm yr iechydwriaeth, a chleddyf yr Ysbryd, yr hwn yw gair Duw. A phob rhyw ymbil a deisyfiad, gweddiwch bob amser mewn ysbryd; ac èr mwyn hyn yma, byddwch wyliadwrus gyda phob dyfal‐bara a deisyfiad dros yr holl saint: – yn enwedig drosof fi, fel y rhodder i mi hyawdledd drwy agoryd fy ngenau yn hŷ, i hysbysu dirgelwch yr efengyl; dros yr hon yr wyf yn gènad mewn cadwyn; fel y traethwyf yn hŷ am dani, fel y mae yn gweddu i mi draethu. Yn mhellach, fel y gwypoch chwithau hefyd fy helynt, beth yr wyf yn ei wneuthur, Tychicus, brawd anwyl, a gweinidog ffyddlawn yn yr Arglwydd, á hysbysa i chwi bob peth; yr hwn á ddanfonais atoch èr mwyn hyn yma, fel y caech wybod ein helynt ni, a fel y dyddanai efe eich calonau chwi. Tangnefedd i’r brodyr, a chariad gyda ffydd, oddwrth Dduw Dad, a’r Arglwydd Iesu Grist. Rhad fyddo gyda phawb y sydd yn caru ein Harglwydd Iesu Grist mewn cywirdeb.