1 Thessaloniaid 5 - Yr Oraclau Bywiol - Welsh New Testament by John Williams 1842

1-11Pa fodd bynag, am yr amserau a’r prydiau, frodyr, ni raid i chwi ysgrifenu o honof atoch: oblegid gwyddoch eich hunain yn berffaith, bod dydd yr Arglwydd yn dyfod fel lleidr yn y nos. – Pan ddywedant, Tangnefedd a diogelwch, yna y mae dinystr disymwth yn dyfod àr eu gwarthaf, fel gwewyr esgor àr un à fo beichiog; a ni ddiangant hwy ddim. Ond chychwi, frodyr, nid ydych mewn tywyllwch, fel y dalio y dydd hwnw chwi megys lleidr. Chychwi oll, plant y goleuni ydych, a phlant y dydd: nid plant y nos, na phlant y tywyllwch ydym ni. Am hyny ynte, na chysgwn, megys ereill; eithr byddwn effro a gwyliadwrus. Canys y rhai à gysgant, y nos y cysgant; a’r rhai à feddwant, y nos y meddwant. Eithr nyni, gàn ein bod yn blant y dydd, byddwn wyliadwrus, wedi ymwisgo â dwyfroneg ffydd a chariad; a gobaith iechydwriaeth yn lle helm. Canys ni phènododd Duw nyni i ddigofaint, ond i gaffael iechydwriaeth, drwy ein Harglwydd Iesu Grist, yr hwn á fu farw drosom, fel pa un bynag á wnelom ai bod yn effro ai cysgu, y byddom byw gydag ef. Oherwydd paham, dyddenwch eich gilydd, ac adeiledwch eich gilydd, megys hefyd yr ydych yn gwneuthur.

12-22Ac yr ydym yn attolygu i chwi, frodyr, gydnabod y rhai y sydd yn llafurio yn eich plith, ac yn eich llywodraethu chwi yn yr Arglwydd, ac yn eich addysgu; a gwneuthur cyfrif mawr o honynt mewn cariad èr mwyn eu gwaith. Byddwch dangnefeddus yn eich plith eich hunain. Hefyd, yr ydym yn eich cynghori, frodyr, rhybyddiwch y rhai afreolus, dyddenwch yr isel eu hysbryd, cynneliwch y gweiniaid, byddwch ymaröus wrth bawb. – Gwyliwch na thalo neb ddrwg am ddrwg i neb, eithr yn wastadol dilynwch yr hyn sy dda, tuagat eich gilydd, a thuagat bawb. Byddwch lawen yn wastadol. – Gweddiwch yn ddibaid. – Yn mhob dim diolchwch; canys hyn yw ewyllys Duw, drwy Grist Iesu, tuag atoch chwi. – Na ddiffoddwch yr Ysbryd. – Na ddirmygwch broffwydo. – Profwch bob peth. – Deliwch yr hyn sy dda. – Ymgedẅwch rhag pob rhith drygioni.

23-28A Duw yr heddwch ei hun á’ch santeiddio yn gwbl oll; a chadwer eich holl ddyn, yr ysbryd, a’r enaid, a’r corff, yn ddiargyhoedd, hyd ddyfodiad ein Harglwydd Iesu Grist. Fyddlawn yw yr hwn à’ch galwodd; yr hwn hefyd á’i gwna. Frodyr, gweddiwch drosom. – Anerchwch y brodyr oll â chusan santaidd. Yr wyf yn eich tyngedu drwy yr Arglwydd, ar ddarllen y llythyr hwn i’r holl frodyr santaidd. Rhad ein Harglwydd Iesu Grist fyddo gyda chwi.