Galatiaid 5 - Yr Oraclau Bywiol - Welsh New Testament by John Williams 1842

1-26Sefwch, gàn hyny, yn y rhyddid â’r hwn y rhyddâodd Crist ni, a na ddalier chwi drachefn yn iau caethiwed. Wele, myfi, Paul, wyf yn dywedyd wrthych, os enwaedir arnoch, ni lesâa Crist ddim i chwi. Ac yr wyf yn tystio, yn mhellach, wrth bob dyn à enwaedir, ei fod ef yn ddyledwr i wneuthur yr holl gyfraith. Chwi á giliasoch ymaith oddwrth Grist, y rhai ydych yn ymgyfiawnâu drwy y gyfraith; chwi á syrthiasoch ymaith oddwrth rad. Eithr nyni, drwy yr Ysbryd, ydym yn dysgwyl am y gobaith y sydd oddwrth gyfiawnâad drwy ffydd. Canys yn Nghrist Iesu ni all enwaediad ddim, na dienwaediad; ond ffydd, yn gweithio drwy gariad. Chwi á redasoch yn dda; pwy á’ch rhwystrodd chwi, fel nad ufyddâech i’r gwirionedd? Y darbwylliad yma ni ddaeth oddwrth yr hwn à’ch galwodd chwi. Y mae ychydig lefain yn lefeinio yr holl does. Yr wyf yn hyderu am danoch drwy yr Arglwydd, na syniwch chwi ddim yn wahanol i mi; ond yr hwn sydd yn eich blino á ddwg y gosbedigaeth, pwybynag yw. Minnau, frodyr, os enwaediad yr wyf fi yn awr yn ei gyhoeddi, paham ym herlidir eto? Yn wir tỳnwyd ymaith dramgwydd y groes. Mi á fỳnwn, yn wir, pe tòrid ymaith y rhai sydd yn eich gwyrdroi chwi. Canys i ryddid ych galwyd chwi, frodyr; yn unig nac arferwch y rhyddid hwn yn achlysur i’r cnawd; ond drwy gariad, gwasanaethwch eich gilydd. Canys yr holl gyfraith á gyflawnir drwy un gorchymyn, sef drwy hwn, “Câr dy gymydog fel ti dy hun.” Ond os cnoi a thraflyncu eich gilydd yr ydych, gwyliwch na ddyfether chwi gàn eich gilydd. Dywedyd yr wyf, gàn hyny, rhodiwch yn ol yr Ysbryd, a ni chyflawnwch drachwant y cnawd. Canys y mae y cnawd yn chwennychu yn erbyn yr Ysbryd, a’r Ysbryd yn erbyn y cnawd, a’r rhai hyn á wrthwynebant eu gilydd, fel nad ydych yn gwneuthur bethbynag á ewyllysiech. Ond os gàn yr Ysbryd ych arweinir, nid ydych dàn gyfraith. Hefyd, amlwg yw gweithredoedd y cnawd, y rhai yw, – Puteindra, aflendid, anlladrwydd, delwaddoliaeth, swyngyfaredd, gelyniaethau, cynhenau, gwynfydau, llidiau, ymrysonau, ymbleidiau, ymranau, cenfigenau, llofruddiaethau, meddwodau, gloddestau, a chyffelyb i’r rhai hyn; am y rhai, yr wyf fi yn awr yn rhagddywedyd wrthych, megys y dywedais i chwi hefyd o’r blaen, na chaiff y rhai sydd yn gwneuthur y cyfryw bethau etifeddu teyrnas Duw. Eithr ffrwyth yr Ysbryd yw cariad, llawenydd, tangnefedd, hirymaros, cymwynasgarwch, daioni, ffyddlondeb, addfwynder, cymedrolder: yn erbyn y cyfryw bethau nid oes cyfraith. Heblaw hyny, y rhai ydynt eiddo Crist, á groeshoeliasant y cnawd, a’i wyniau a’i chwantau. Gan ein bod ni yn byw yn yr Ysbryd, rhodiwn hefyd yn ol yr Ysbryd. Na fyddwn wagogoneddgar, gàn gyffroi ein gilydd, gàn genfigenu wrth ein gilydd.