1 Corinthiaid 16 - Yr Oraclau Bywiol - Welsh New Testament by John Williams 1842

1-24Ac am y casgliad, yr hwn sydd i’r saint, megys y trefnais i gynnulleidfäoedd Galatia, felly hefyd gwnewch chwithau. Y dydd cyntaf o bob wythnos, rhodded pob un o honoch beth wrtho ei hun, yn ol fel y byddo gwedi llwyddo, gàn ei ddodi yn y drysorfa; fel pan ddelwyf, na byddo casgliadau y pryd hyny. A phan ddelwyf, pa rai bynag á ddangosoch, drwy lythyrau, eu bod yn gymeradwy, y rhai hyny á ddanfonaf i ddwyn eich rhodd i Gaersalem. Neu, os cymhwys fydd i minnau hefyd fyned, hwy á gant fyned gyda mi. A myfi á ddeuaf atoch, wedi yr elwyf drwy Facedonia, (canys drwy Facedonia yr wyf yn myned;) ac, ond odid, yr arosaf, ac y gauafaf hefyd gyda chwi, fel yr hebryngoch fi, i ba le bynag yr elwyf. Canys nid yw yn fy mryd eich gweled yn awr wrth fyned heibio; ond yr wyf yn gobeithio yr arosaf beth amser gyda chwi, os caniatâa yr Arglwydd. Eithr, mi á arosaf yn Ephesus hyd y Pentecost. Canys agorwyd i mi ddrws mawr a grymus, èr hyny y mae gwrthwynebwyr llawer. Ac os bydd Timothëus wedi dyfod, edrychwch àr ei fod yn ddiofn gyda chwi; canys gwaith yr Arglwydd y mae yn ei weithio, fel finnau. Am hyny, na ddiystyred neb ef; ond hebryngwch ef mewn heddwch, fel y delo ataf fi; canys yr wyf yn ei ddysgwyl ef gyda’r brodyr. Ac am y brawd Apòlos, mi á ymbiliais lawer ag ef am fyned atoch chwi gyda’r brodyr; eithr èr dim nid oedd ei ewyllys ef i fyned yn awr, ond efe á aiff pan gaffo amser cyfaddas. Gwyliwch; sefwch yn y ffydd; ymddygwch fel dynion; ymgadarnêwch. Gwneler pob peth mewn cariad. Chwi á adwaenoch deulu Stephanas, mai blaenffrwyth Achaia ydyw, ac iddynt ymroddi i weinidogaeth y saint. Yr wyf yn attolwg i chwi, gàn hyny, frodyr, ymostwng o honoch i’r cyfryw, ac i bob un y sydd yn cydweithio a llafurio. Yr ydwyf yn llawen am ddyfodiad Stephanas, Fortunatus, ac Achaicus; canys eich diffyg chwi hwy á’i cyflawnasant, ac á esmwythâasant àr fy ysbryd i, a’r eiddoch chwithau: cydnabyddwch, gàn hyny, y cyfryw rai. Y mae cynnulleidfäoedd Asia yn eich anerch chwi. Y mae Acwila a Phriscìla yn eich anerch yn fawr yn yr Arglwydd, gyda’r gynnulleidfa sydd yn eu tŷ hwynt. Y mae y brodyr oll yn eich anerch. Anerchwch eich gilydd â chusan santeiddiol. Anerchiad Paul â’m llaw fy hun. Od oes neb nid yw yn caru yr Arglwydd Iesu Grist, efe á fydd esgymun pan ddelo yr Arglwydd. Rhad ein Harglwydd Iesu Grist fyddo gyda chwi. Fy serch innau fo gyda chwi oll yn Nghrist Iesu. Amen.