Gálatas 3 - Qullan Arunaca

Leyiti jan ucajj iyawsañacha khespiyi

1¡Cunja pisi chuymanïpjjtasa, jumanacajj Galacianquirinaca! ¿Qhitis jumanacarojj c'arintapjjtam chekpach Tatitun arunacaparu jan jaysapjjañamataquejja? Nanacajj yatichapcsma ucqhajja uñacht'ayapjjsmawa pachpa Jesucristo ch'accatataru.

2Jichhajj sapjjetaya: ¿Diosan Ajayupjja Moisesan leyiparu phokhatanacam laycuti catokapjjta, jan ucajj cuntejj ist'apcta ucaru iyawsapjjatam laycucha?

3¿Cunjämats jumanacajj aqham pisi chuymanïpjjta? ¿Ajayun ch'amapampi kalltcasina ucjja jumanacan ch'amanacamampiti phokhachañ amuyapjjta?

4¿Ucatak t'akhesitanacamajj inamayaquëjjeti? ¡Añchaquit mä cunataquis asquicaspa!

5Cunapachatejj Diosajj Ajayup churapjjtam, ucatsti jumanac taypin milagronacraqui luri ucjja, ¿cunats uqham luri? Janiw ucjja lurquiti leyirjama phokhatanacam laycu, jan ucasti ist'apcta uca arunaca iyawsatanacam laycuwa ucjja luri.

6Cunjämtejj Abrahamajj Diosar iyawscänjja, Diosasti iyawsatap laycuquiw asquit catokaraquïna.

7Ucatpï jumanacajj yatipjjañamajja Abrahaman chekpach wawanacapajja iyawsañanïpjjewa.

8Jan judiöpquis ucanacarus Diosajj catokañapäcäna, iyawsañanïtap laycu ucanacatjja nayratpachaw Kellkatajj khanañchi. Nayratpacharaquiw Abrahamarojj aca suma yatiyäwi yatiyi: “Take marcanacaw juma toke bendecitäpjjani” sasa.

9Uqhamajj qhitinacatejj iyawsañanïpqui ucanacajj iyawsir Abrahamamp chica bendecitäpjjewa.

10Qhitinacatejj Moisesan leyiparu catuyasipqui ucanacajja maldicitäpjjewa. Kellkatansti aqham siwa: “Take qhitinacatejj ley libron kellkatäqui ucanacarjama janipun phokcchi ucajja, maldicitäpjjewa.”

11Khanaquïsquiwa, janiw qhitis Diosampejj catokatäquiti leyiru phokhatap laycojja. Kellkatanjja aqham siwa: “Qhititejj Diosampi catokatäqui ucajja iyawsañ tokew jacani.”

12Moisesan leyipasti janiw iyawsañamp phokhañaquïquiti, jan ucasti aqham siwa: “Qhititejj acanac phokqui ucajja, uca phokhatap tokeraquiw jacani.”

13Cristojj leyin maldicionapatwa khespiyistu, jupajj juchanacas laycu maldicitaraquïnwa, Kellkatanjja aqham siwa: “Maldicitäpan take qhititejj mä lawaru warccatatäqui ucajja” sasa.

14Acajj lurasïnwa cuna bendiciontejj Diosajj Abrahamaru arscäna ucajj Jesucristo toke churasiñapataqui, jan judiöpquis ucanacaru, uqhamarac cawquïr Ajaytejj Diosajj churañatac arscäna ucjja, iyawsañ toke catokañasataqui.

Leyimpi Diosan arsüwipampi

15Jilatanaca, jacañjjat amuyt'ayapjjäma: Cunapachatejj mä jakejj mä arust'äwi luri ucqhajja, sutipampiw kellkanti, ucsti janiw qhitis ina ch'usar tucuycaspati, janiraquiw yapjjatcaraquispasa.

16Jichhajj, Diosajj arsuwayiwa Abrahamaru, uqhamarac wawaparusa. Kellkatanjj janiw sisquiti: “Wawanacama” sasa walja jakenacäcaspas uqhama, jan ucasti siwa: “Uqhamarac wawamarusa” sasa, acasti mä sapa jakeru sañacwa muni, ucasti Cristowa.

17Cuntejj sisctjja ucajja acawa: Diosajj mä arust'äwjja Abrahamampiw lurawayi, ucsti Diosaw khanañchawayi. Moisesan leyipasti pusi patac quimsa tuncani mara pasatatwa churatäna, ucasti janiw ina ch'usaru tucuycaspati qhä arust'äwjja, ni Diosan arsutapsa jan cuna asquiru tucuycaspati.

18Diosatejj Moisesan leyipat catokatäñasa churistaspa ucajja, janiw arust'äcjjaspati. Chekpachansa Diosaw Abrahamaru arsuwayi inac churañataqui.

19Uqhamajj ¿cunataquis Moisesan leyipajj asquïspa? Khepatjja yapjjatasiwa juchanac khanañchañataqui, cawquïrtejj Diosajj arscäna “wawamarusa” sasa ucan jutañapcamaquiw Moisesan leyipajj sirvïnjja. Leyejj angelanac tokew khanañchatäna, ucasti Moisés tokew lurasiraqui.

20Ucampis mä sapa jakequïtap laycojja janiw yakha sumancthapiyirejj munascjjeti, Diosasti mä sapaquiwa.

Leyin amtäwipa

21¿Acasti Moisesan leyipajj Diosan arsutap contrawa sañti muni? Janiw cunäquipansa uqhamäquiti. Leyitejj jacañ churasapäna ucajja, cuntejj leyejj sisqui ucarjama phokhatap laycuw Diosajj catokestasapänjja.

22Ucampis cunjämtejj Kellkatanjja sisqui: “Takeniw juchampi preso catutäpjje” sasa, ucajj uqhamawa qhitinacatejj iyawsapqui ucanacajj Jesucristo toke catokapjjañapataqui iyawsatap laycu, cuntejj Diosajj arsuwaycäna uqhamarjama.

23Janïra aca iyawsäwi jutquipanjja, leyejj preso catjjäsistäna, iyawsäwin uñstaniñapcama suyasina.

24Uqhamajj leyejj mä wawa uywirjamänwa. Mä wawarjamaw uywawayistu Criston jutañapcama, jupar iyawsasinjja Diosampi catokatäñasataqui.

25Jichhajj Cristor iyawsañ urojj purinjjewa, janiw uywirin amparapancjjtanti.

26Jumanacajj iyawsañ token takeniw Diosan wawanacapäjjapjjta, Cristo Jesusamp mayachatäpjjatanacam laycu.

27Take jumanacajj Cristompi mayachasiñataqui bautisasipjjta ucanacajja, jupampejj mä isimpi isthapitäpcasmas uqhamäpjjtawa.

28Jupancjjasinjja janiw utjcjjeti judiosa, griegosa, esclavosa, libresa, chachasa ni warmisa. Cristo Jesusar mayachatäjjasinsti take jumanacajj mayaquëjjapjjtawa.

29Jumanacatejj Cristoncapjjsta ucajja, Abrahaman wawanacapäpjjaractawa, cuntejj Diosajj arsuwaycäna ucsa catokapjjaraquïtawa.