Jueces 14 - Qullan Arunaca

Sansón chachan casarasitapa

1Sansón chachasti mä urojj Timnat sat marcar sarasinsti mä filistea warmiruw uñjäna.

2Ucat utaparu purisinsti awquinacaparuw yatiyäna:

—Nayasti Timnat sat marcanjja mä suma warmi uñjanta jichhasti sart'arapipjjetaya nayasti jupampiw casarasiña munta —sasa.

3Ucat awquinacapasti saraquïnwa:

—¿Conataquisa jumajj uca filisteo jucharar jakenac taypiru warmi thakher sarta? ¿Janiti warmejj utjqui jiwas familiasa taypinjja, uqhamarac israelitanac taypinsa? —sasa.

Sansón chachasti saraquïnwa:

—Uca tawakoruw nayajj wali munta, juparuy jicjjatt'arapipjjeta warmejjataqui —sasa.

4Awquinacapajj janiw yatipcänti uqhamäñapa Diosatti jutaspa jan ucajj janicha ucjja. Ucampis jupajja thakhascänwa filisteonacampi cunjämata nuwasiñataquisa. Uca urunacajj filisteonacaw israelitanacar apnakäna uca laycu.

5Sansón waynasti, awquipampi, taycapampi uqhamaw Timnat sat marcaru sarapjjäna. Cunapachatejj marca jac'a uva yapunacar puripcäna ucqhajja mä leonawa warart'asis mistsunïna jaljjatañataqui.

6Ucatsti Diosan ajayupaw Sansón chachjjaru jutäna, mä cabritöcaspas uqhamwa leonarojj jisc'a jisc'a tucjäna. Ucampis awquinacaparojj cunatejj pascän ucjja janiw yatiycänti.

7Ucat sarasinjja cawquïr tawakorutejj muncäna ucampiw parlanïna.

8Urunaca pasatatsti Sansón chachajj wastatampiw cutt'äna uca tawakompi casarasiñataqui. Thaquita sarakawayasinsti uca jiwat león uñjiriw saräna. Jiwat león uñjasasti jicjjatänwa walja mamurayanaca tapapampi, uqhamarac uca mamurayanacan misq'ipsa.

9Uca tapatjja amparampiw misq'jja apsüna, ucatsti mank'asisaw thacnäma saräna. Ucat awquinacapar jicjjatasinsti uca misq'i churäna mank'apjjañapataqui. Ucampis janiw yatiycänti uca misq'jja jiwat leonata apsunitapjja.

10Sansón chachan awquipasti tawakor uñjiriw saräna. Ucansti Sansón chachajj mä fiesta luräna, cunjämtejj waynanacajj lurapjjerïqui uqhama.

11Ucampis filisteonacajj uñjasinjja wali ajjsarayasipjjäna, Sansón chachataquisti quimsa tunca amigonacapa irpapjjäna jupampïpjjañapataqui.

12Sansón chachasti uca quimsa tuncanirojj saraquïnwa:

—Nayasti mä jisct'a jisct'apjjäma yatjjatapjjañamataqui. Ucampis aca pakallko uru fiesta lurcasintejj chekt'apjjäta ucqhajja, nayasti sapa mayni jumanacarojj churapjjämawa linot lurat suma capa, uqhamarac fiestaru sarañataqui suma isi.

13Ucampis janitejj chekt'apcäta ucqhajja, sapa mayni jumanacawa nayarojj churapjjetäta linot lurat suma capa, uqhamarac fiestataqui suma isi —sasa.

Ucatsti jupanacajj sapjjaraquïnwa:

—Jisct'apjjetaya nanacan yatjjatapjjañanacajjataqui, nanacajj takeniw ist'asipctjja —sasa.

14Sansón chachasti yatjjatapjjañapataquejj sänwa:

“Mank'qui ucatjja mank'araquiw mistu, ucampis ch'amanïcäna ucatsti mojjsaraquiw mistsuraqui” sasa.

Ucat quimsa uru pasjjatatsti jupanacajj janiw yatjjatañ puedcjjapjjänti.

15Ucat pusi urunsti Sansón chachan warmiparojj sapjjaraquïnwa:

—Chachamaru jisct'am nanacaru uca yatjjatañäqui uca yatiyañamataqui. Jan ucasti nanacajj ninampiw phichhantapjjäma jumaru, uqhamarac awquiman familiaparu. ¡Jumanacasti nanacarojj cunanacajjatejj utjapquitu uca aparaña laycucjamaquiw jawsthapipjjestajja! —sasa.

16Ucatsti jupajj Sansón chachaparojj jachasisaw saraqui:

—¡Jumajja janiw nayarojj munquistati! ¡Jumasti nayarojj uñisistawa! Marcanquirinacajjarojja mä yatjjataña churtajja yatjjatapjjañapataqui, ucampis nayarojja cun sañtejj munqui ucjja janiw yatiyaña munquistati —sasa.

Sansón chachasti ucat saraquïnwa:

—Ucsti janiw nayajj awquejjarusa, ni taycajjarusa yatiycti, ¿ucatti jumarojj yatiyirismajja? —sasa.

17Ucatsti Sansón chachan warmipajja pakallko urpacha fiestanwa chachap jac'anjja wali jachäna. Uqham sinti jachir uñjasinsti chachapajj juparu qhuyapt'ayasaw uca yatjjatañajj cun sañtejj munqui ucjja yatiyäna. Ucatsti warmipajja janc'aquiw marcanquirinacaparojja yatiyiri saräna.

18Pakallko urunsti, janïra intejj jalantquipansti filisteonacajj Sansón chachan ucaru jutasinjja sapjjänwa:

“Janiw cunas utjquiti misc'it juq'ampi mojjsajja; janiraquiw utjcaraquiti leonat juc'ampi ch'amanejja” sasa.

Sansón chachajj saraquïnwa:

“Jumanacasti vaca kallojjampi khollisinjjaya nayarojj uca yatjjatañjja churapjjchistajja” sasa.

19Ucampis Diosan ajayupaw Sansón chachjjaru jutäna, ucatsti Sansón chachajj Ascalón sat chekaruw saräna, ucansti quimsa tunca jaquinacaruw jiwarayäna, ucanacatwa isinacapjja aparaniwayasajja, yatjjatañan atipapqui ucanacaru churañataqui. Ucatsti churawayasinjja awquipan utaparojj wali colerataw cutt'jjäna.

20Sansón chachan warmipjja mayni amigoparuwa churjjapjjäna.