2 Samuel 13 - Qullan Arunaca

Amnón jaken Tamar warmiru jan wali luratapa

1Davidan wawapa, Absalonasti mä suma cullacanïnwa, wali suma uñnakt'ani, Tamar sat sutini. Uqhamïpansti Amnón sat jakejj, cawquïritejj Davidan yokapäcaraquïna ucajja, uca Tamar tawakorojj walpun munapayatayna,

2uqhama munapayasasti usuntaraquitaynawa. Tamar cullacapasti janiraquiw ucacamajj chachjja uñt'cataynati ni chachanacampi sarnakañsa yatcaraquitaynati; ucatwa Amnón jakejj cullacaparojj jan cun lurañsa puedcaraquïnti.

3Ucampisa uca Amnón jakejj mä amigonïnwa, ucasti sinti sallka jakeraquïnwa; uca amigopasti Jonadab satänwa, Simea jaken yokaparaquïnwa, uca Simeasti Davidan jilaparaqui.

4Ucatwa Jonadab jakejj jisct'äna Amnón jakerojja:

—¿Cunas camachtam, jach'a jilïri? ¿Cunatsa uqham urut ururu juc'ampi aynacht'ata uñjasta? ¿Janit nayar yatiyquitasma? —sasa.

Amnón jakesti saraquïnwa:

—Absalón jilajjan Tamar cullacaparuw walipun munta —sasa.

5Ucatsti Jonadab jakejj saraquïnwa:

—Uqhamajj iquiñar mantam, ucatsti usuta tucuraquim. Cunapachatejj awquimajj jumar uñjir jutani ucapachajja, awquimarojj saraquïtawa: ‘Tamar cullacajjaru nayar uñjañapataqui qhitanita, aca pachpanaraqui phayarapitpan nayan uñjcata, uqhamat nayajj cuntejj jupajj churquitani uca mank'asiñajjataqui’ sasaw säta.

6Amnonasti iquiñaruw mantjjäna, ucatsti usutaw tucuraquïna. Cunapachatejj reyejj jupar uñjir saräna ucapachasti, Amnonajj saraquïnwa:

—Tamar cullacajjar qhitanita, jupasti aca pachparu jutasin pä torta lurt'arapitpan, jupa pachpa nayaru mank't'ayaraquitpan —sasaw achict'asïna.

7Uqhamasti Davidajj Tamararojj qhitaraquïnwa aqham sasa:

—Amnón jilaman utapar saram, ucatsti mank'a phayt'arapiraquim —sasa.

8Tamarasti Amnón jilapan utaparuw saräna, uca Amnonasti iquiñancascaraquïnwa. Ucatsti jac'u aptäna, masa waquicht'asinjja uca pachpanwa tortanacjja lurt'araquïna, uqhamaraqui phayt'araquïna.

9Sartén catusinsti uca pachpanwa loktaraquïna, ucampisa Amnonajj janiw mank'añ muncänti, cawquïri jakenacatejj ucanccän ucanacarusti: “Mistupjjam” sasaw saraquïna.

10Cunapachatejj takeni mistuwayjjapjjän ucqhasti Amnonajj Tamar cullacaparojj saraquïnwa: “Utajj mankharu mank'a apanim, juma pachpa mank't'ayita” sasa.

Tamarasti cuna tortanactejj phayt'catayna ucanaca apasinsti pachpa Amnonan iquiñ utaparuw aparaquïna,

11ucampisa cunapachatejj mank'a apt'ata mantascän uqhamaruw Amnón jakejj catuntaraquïna, ucatsti saraquïnwa:

—Jutam, cullaca, nayampi iquintam —sasa.

12Ucampisa Tamarajj saraquïnwa:

—Janiw, jilata, jan uqham nayar jan wal luristati, uqham lurañajj janiw Israel marcanjja utjquiti. ¡Jan uca ñankha luramti!

13¿Cawquiruraqui nayasti p'enkachjatasti saririststi? Jumasti Israel marcanjja mä jan chuyman jaket uñt'ataraquïsmawa. Uqhamajj reyimpi parlam, nayasti ucjja achict'asiracsmawa, jupasti nayan juman warmimäñajjataquejja janipuniw jan muncanitejja —sasaw Tamar tawakojj säna.

14Ucampisa Amnón jakejj janiw ist'cänti, cunjämatejj jupajj Tamar tawakot sipansa juc'ampi ch'amanïnjja, ch'amampiquiw liwnokasin Tamarampejj iquintjjäna.

15Uqhama warmt'asjjatatsti Amnón jakejj Tamar cullacaparojj walpun uñisrantjjaraquïna, cunjämtejj juparojj warmipataqui muncän ucat sipansa juc'ampwa uñisjjäna. Ucatsti saraquïnwa:

—Mistum acata, saram —sasa.

16Tamarasti saraquïnwa:

—¡Munat jilajja, janiw nayajj acat mistcäti. Acat nayar jakonucutamajj cuntejj nayampi lurctas ucat sipansa juc'ampi jan walïspawa! —sasa.

Ucampisa Amnón jakejj janiw juparojj ist'añ muncänti,

17ucat sipana uywatapar jawsasinjja saraquïnwa:

—¡Aca warmi acat wayunucum, ucatsti puncjja sum jist'antaraquim! —sasa.

18Uywatasti, Tamararojj nuqhunucjjänwa, puncjja sumaracwa jist'antjjäna. Tamarajj mä suma isimpi ist'ataraquïnwa, cunjämatejj uca tiempojj reyin phuchanacapajj ist'asirïcän uqhama.

19Ucatsti uca suma isipa ch'iyanokasisinsti p'ekepjjaru khellampi willjatasisinsti jacht'asisaw sarjjäna thaquinjama amparapampi p'ekep catt'asa.

20Ucatwa Absalón jilapajj jisct'äna:

—¿Amnón jilamat aqhamjja lurtam? Uqhamächi ucapachasti, jan cunsa parlamti, munat cullaca, jupajj jilamawa. Jan aca toketjja sinti llaquisimti —sasa.

Tamarasti uqham apanucuta uñjasisajj Absalón jilapan utapanwa jicjjatasïna.

21Cunapachatejj David reyejj take acanaca ist'äna ucapachasti walipuniw colerasïna; ucampisa Amnón wawaparojj janiw uca luratapatjja juchañchcänti, jilïri wawapätapa, uqhamarac sinti munatätap laycu.

22Absalón jilapasa Amnonarojj janiraquiw cunsa siscänti aca toketjja, Tamar cullacaparu uqham jan wali luratapata wali colercchïna ucasa.

Absalonajj Amnonar uca jan wali luratapat phoksusi

23Pä mara pasjjatatsti, Absalonan jakenacapan Baal-hazor sisqui uca chekan ovejanacapat t'awra yawisipcäna, ucasti Efraín marca jac'ancaraquïnwa; Absalonasti reyin take wawanacaparuw mank'añataqui jawsayaraquïna.

24Uqhamarus reyir uñjiriw sararaquïna, ucatsti saraquïnwa:

—Jichhajj jakenacajjajj t'awra yawisipqui, nayajj muniristwa, juma, jach'a reyejj, uqhamaraqui oficialanacamas nayaru tumpt'apjjañama —sasa.

25Ucampisa reyejj saraquïnwa:

—Janiw, munat wawajja, takeni nanacajj sarapquiristti, inampis jumarojj sinti gastasiyapjjerisma —sasa.

Absalonasti reyin jutañapataquejj sascaquïnwa; ucampis reyejj janiw sarañ muncänti, uqhamaraqui bendicionapsa churaraquïnwa.

26Ucatwa Absalonajj saraquïna:

—Janitejj, juma, jach'a reyejj, sarirjamäcstajja, uqhamajj Amnón jilajjaquisay sarpanjja —sasa.

—¿Cunatsa Amnón jilaman sarañapjja munta? —sasaw reyejj jisct'araquïna.

27Ucampisa Absalonajj sascaquïnwa Amnonan sarañapataqui, ucatwa reyejj Amnonampiru uqhamaraqui mayni wawanacapampiru qhitäna.

Absalonasti mä suma mank'äwi, reyitacjamaraqui waquichayataynajja,

28uywatanacaparusti saraquitaynawa: “Walpun amuyapjjäta, cunapachatejj Amnonajj vinompi niya machantasjjani, ucapachasti nayaw sapjjäma: ‘Jiwayapjjam’ sasa, ucatsti jumanacajj jiwayapjjätawa. Jan jupar jiwayañjja ajjsarapjjamti, nayan arunacajjawa. Uqhamasti ch'amañcht'asipjjam, jan ajjsarapjjamti” sasaw Absalonajj säna.

29Uqhamasti, Absalonan arunacaparu phokhasinsti, uywatanacapajj Amnonarojj jiwayapjjänwa. Uqhamasti ucanac uñjasajj reyin take wawanacapasti sartasinjja mulanacapar lat'jjatasinwa jaltjjapjjäna.

30Cunapachatejj thaquinjam sarasipcäna ucapachasti, Davidarojj niyaw yatiyapjjaraquitayna Absalonan Amnonaru jiwayatapjja, uqhamaraqui take wawanacaparu jiwarayatapa, jan mayninirus jilt'ayatapa.

31Uc ist'asinsti reyejj isinacapwa ch'iyanokäsïna, orakeruw liwitattaraquïna. Take cawquïri oficialanacapatejj ucanccäna ucanacasti isinacapjja ch'iyanokasipjjaraquïnwa;

32ucampisa Davidan jilapa Simea jaken Jonadab yokapasti arsuraquïnwa:

—Jach'a reyejj, jan amuycpati take wawanacapan jiwaratapjja. Janiw takeni jiwarapquiti jan ucasti Amnón saparuquiw jiwayapjjejja, uqhamwa Absalonajj amtaraquitayna, cunürutejj Amnonajj Tamar cullacaparu jan wali lurcatayna ucürutpacha.

33Uqhamasti, jach'a reyejj, jan amuycpati take wawanacapas jiwaratäcaspa uqhamjja. Amnón sapaquiw jiwatajja —sasa.

34Absalonan jaltañapcamasti, cawquïri waynatejj uñch'uquirit uscutäcän ucasti, Horonaim thaquinjama, kollu thiyanjama walja jakenacaru sarakasinquirwa uñjäna. Ucatwa uñch'uquirejj jach'a reyiru yatiyiri sararaquïna walja jakenacaru Horonaim thaquinjama sarakasinquiri uñjasina.

35Ucatwa Jonadabajj reyirojj saraquïna:

—Niyaw reyin wawanacapajj jutasqui cunjämatejj aca sirviripajj arscäna uqhamarjama.

36Uqhama jupan parlaña tucuyataparusti, reyin wawanacapajj purintanjjapjjänwa, ucatsti wali jach'at jachapjjäna, wararipjjaraquïna. Reyisa, uqhamaraqui ucan take sirvirinacapasa walipuniw jachapjjäna.

37-38Absalonasti jaltjjaraquitaynawa, jupampi chicasti Gesur marcan reyipa, Amiud jaken yokapa Talmai sapaquiw Absalonampi chicajj saratayna, ucansti quimsa maraw khepararaquïna. Davidasti sapüruraquiw jachäna Amnón wawapan jiwatapatjja,

39ucampisa cunapachatejj chuymapajj utt'jjäna ucapachasti, walpuni munäna Absalón wawaparu uñjañjja.