Deuteronomio 11 - Qullan Arunaca

Diosan jach'a cancañapa

1“Jumanacasti Tatitu Diosamarojj munapjjam, ucatsti ewjjanacapjja phokhapjjaraquim, leyinacapa, arsutanacapa camachi arunacapsa.

2Uñt'apjjam jichhüruna Diosaman yatichäwinacapjja, cawquïrtejj wawanacamajj jan uñt'apqui ni uñjapcaraquisa. Sum uñjapjjaraquim jach'a cancañapa uqhamaraqui ch'amapsa.

3Cawquïri unanchanactï, jach'a uñacht'äwinacampi lurqui Egipto marcana faraón rey contra uqhamaraqui take jakenacapataqui,

4ucatsti cunjämtï lurqui egipcio ejercitoru, caballonacaparu, nuwasiñ carronacaparu uqhamaraqui cunjämsa Mar Rojo sat umanacaru chhaktayäna, cunapachatï jupanacajj jumanacaru khepat arctanipjjayätam ucqhajja. Diosaw jupanacarojj jan mayampitaqui t'unjäna.

5Uqhamaraqui amtasipjjam take cunanactï jumanacataqui lurqui wasarana aca chekar jumanacar puriyaniñcama.

6Ucatsti cunjämsa luraraquïna Datán, Abiram sat Eliab chachan wawanacaparojja, qhitinacatï Rubenan wawanacapäcaraqui; cunjämsa orakejj jist'artäna take familiaparu carpanacaparu mank'antasa, take cunanacatï utjcäna ucanacamppacha, ucsti take Israel marcaw uñjäna.

7Jumanac quipcaw testigöpjjta take cuna jach'a luräwinactï Diosajj lurqui ucanacatjja.

Diosan churat oraken bendicionanac utjatapa

8“Jumanacasti take camachi arunaca jichhüruna churapcsma ucanacjja phokhapjjamaya, uqhamat ch'amanïpjjañamataqui uca orakenac catuntasipjjañamataquejja.

9Ucatsti walja maranaca jacapjjañamataqui uca orakena, cawquïrtï Diosajj arupampi arsüna jumanacan awquinacamaru uqhamarac wawanacaparu churañataqui, cawqha orakentï leches misq'is umjam jalasqui ucana.

10Cawquïri oraktï jumanacajj catuntapcäta ucajj janiw Egipto orakjamäquiti, cawqhattï jumanacajj mistunipcta. Qhä orakenjja jumanacajj yapuchapjjäyätawa, ucatsti cayumpiraquiw karpapjjäyäta, cunjämatï huertanacan lurasqui uqhama.

11Ucampis cawquïri oraktï catupcäta ucajj wali kollunacani, vallenacaniwa, alajjpachat sarakanir jallumpi karpataraqui.

12Uca oraksa Diosaraquiwa imaraqui, marpacharaquiw jupajj uñch'uquiniraqui.

13“Jumanacatï Diosan camachi arunacapa jichha uruna churapcsma ucanaca phokhapjjäta, ucatsti Tatitu Diosamaru munapjjaraquïta, take chuymampi yupaychapjjaraquïta take jacañamampi ucqhajj,

14juparaquiwa horasapar apayanipjjätam nayra jallsa khepa jallsa, jumanacan trigo, aceite, vino apthapipjjañamataqui.

15Uqhamaraquiw nayajj pampanacamana take casta pastonac jilayä uywanacamataqui, uqhamat jumanacajj suma mank'ata sarnakapjjañamataqui.

16Ucampis jan jumanacpacha engañasipjjamti, janiraqui Diosata armasimti ni yakha diosanacarus yupaychapjjamti ni jupanacarus alt'asipjjaraquimti,

17jan ucasti Diosaw jumanacatac colerasispa, janiraquiwa jallunacsa puriycaniti, ucatsti janiraquiwa orakenjja cunas achcaniti, janc'aquiw jumanacajj jiwarapjjaraquïta cawquïri suma oraktï Diosajj churapcätam ucana.

18“Ucatsti aca arunacajja chuymanacamaru, p'ekenacamaru uchapjjam, uqhamaraqui amparamarusa, paramarusa, mä chimpur uñtata uchasipjjam.

19Uqhamaraqui wawanacamarojj yatichapjjam uca arunacata utamanccasina, thaqui sarcasina, uqhamaraqui iquintañataqui, iquiñat sartañataquisa.

20Ucatsti kellkantaraquïtawa uta mantañan postenacaru, uqhamaraqui utaman puncunacaparusa;

21uqhamata jumanacasa, wawanacamasa walja maranaca jacapjjañamataqui cawquïri oraktï Diosajj awquinacamaru churañatac arscäna ucan walja urunaca jacapjjañamataqui, cunjämäquitï alajjpachajj acapach orakjjana uqhama.

22“Jumanacatï aca camachi arunaca suma imapjjäta, phokhapjjaraquïta, ucatsti suma chuymampirac Tatitu Diosamaru munapjjäta, uqhamaraqui suma iyawsañampi thaquipansa arcapjjäta ucqhajj,

23Diosasti jumanacan nayräjjanacamatjja take uca marcanacaruw jakonucuni, ucatsti jumanacajj uca walja marcanaca, wali ch'amani marcanaca catuntapjjäta.

24Cawqharutï jumanacan cayunacamajj tact'ani ucanacajj jumanacancaniwa. Orakenacaman korpasïwinacapajj lokatatasiniw wasara chekata Líbano sat chekacama; ucatsti Eufrates sat jawirata Mar Mediterráneo sat jach'a kotacama.

25Janiraquiw cawquïri marcas jumanac contra sayt'añ puedcaniti. Jumanacan Tatitu Diosamaw uca marcanacar ajjsaraña, qhathatiña uscuntani, cawqha chekanjamtï pasapcäta ucanacanjja, cunjämtï Diosajj arupampi arscänjja uqhamar phokhasa.

26“Jichha urunwa nayajj bendicionampita maldicionampita ajllisiñanacamatac churapjjsma.

27Bendicionsti catokapjjätawa, jumanacatejj Tatitu Diosaman camachi arunacapa phokhapjjäta, cawquïrtejj jichha urun churapcsma ucanaca, ucapacha;

28maldicionsti catokapjjaraquïtawa, jumanacatejj yakha jan uñt'at diosanacaru arcasina, Tatitu Diosan camachi arunacaparu jan phokhapcaraquïta, ucatsti thaquipatsa sarakapjjaraquïta, cawquïri ewjjanactejj jichhüruna churapcsma ucanacata, ucapacha.

29“Cunapachatejj Diosamajj puriyapjjätam uca orake catuntapjjañamataqui ucqhajj, bendicionjja uchapjjätawa Gerizim sat kolluna; maldicionsti, Ebal sat kollunaraqui.

30Aca kollunacasti jicjjatasiw Jordán jawirat qhursa tokena, inti jalanta tokeru sarañäquis ucsana, cananeonacas pampa oraken jacapqui ucqhana, Gilgal sat orake uñcatasina, More sat chekana, encinas kokanacäquis uca thiyana.

31Jumanacasti niyaw Jordán jawira maqhatañataquïsipcta, ucatsti cawquïri oraktï Tatitu Diosamajj churapcätam uc catuntapjjäta. Cunapachatejj jumanacajj catuntapjjäta uqhamaraqui ucan jacapjjäta ucqhajj,

32take chuymampiya cawquïri leyinactï uqhamaraqui arsutanactï churapcsma ucarjam sarnakapjjam.