Salmos 132 - Qullan Arunaca

Davidatac Diosan arsüwinacapa(Davidan maqhatäwi k'ochupa)

1-2Tatay, Jacobon ch'aman Tatitupa,

Davidat amtasiquimaya,

llaquinacapat amtasiraquim; takpach chuymamp juramento luratapat amtasiquimaya:

3“Janiw utajjar mantcäti,

janiw samart'añataquis iquintcäti,

4janiw nayranacajj ch'irmthapcäti,

janiraquiw iccäsa,

5Tatitutac mä chekawja jicjjatañcama,

Jacobon take atipir Diosapatac mä utjäwi jicjjatañcama” sasa.

6Efrata chekawjan arust'äwit ist'apjjta,

Jaar oraken uc jicjjatapjjaracta.

7Tatitun kollan utapar mantapjjañäni,

jupan nayrakatapar konkort'asipjjañäni.

8Tatay, kollan arcampiy sartasim,

samarañam kolluruy jutam.

9Sacerdotenacamajj cusisiñ isimp isthapisipjjpan,

jumar iyawsirinacajj cusisiñat art'asipjjpan.

10David uywatamar munatam laycujj,

janiquiy ajllit reyimataquejj mays uñtamti.

11Tatitojj juramentompiw David chacharojj arsüna,

uca arsutapatsti janiw may amtcaniti:

12“Juman allchhinacamat mayniruw reyi konuñamar kont'ayä.

Wawanacamatejj arust'äw arunacajjar phokhapjjani, yatichäw arunacajjar phokhapjjaraquin ucajja,

wawanacaman wawanacapas wiñayaw reyi konuñaman kont'asipjjaraquini” sasa.

13Tatituw Sión kollurojj ajllisi,

ucawjan jacañataquiw jupajj chhijllasi, aqhäm saraqui:

14“Acaw wiñayatac nayan utjäwejjajja;

acawjan jacä, nayar cusisiyatap laycu.

15Mank'añanacaparojj asquinacampiw phokhantä,

jan utjirin jakenacaparusti mank'ampiw sisarayä.

16Sacerdotenacaparojj khespiyasiñ isimpiw isthapiyä,

arquirinacaparusti cusisiñampiw art'asiyä.

17Davidan ch'amap wasitat sartayä,

ajllit reyejjataquejj mä khan khantayarapï.

18Timanacaparusti p'enk tucuñampiw isthapiyä,

juparusti intjam c'ajayä” sasa.