Nehemías 3 - Qullan Arunaca

Perka luräwinaca jaljasïwi

1Ucatsti Eliasib sat sumo sacerdotempi, uqhamaraqui sacerdote jilanacapampejja asquichapjjänawa Ovejanacan puncupa satäquis ucqha. Jupanacasti viganacwa uchapjjäna, uqhamarac puncunacsa, ucatsti perkjja asquichapjjaraquïnwa Patac sat torret kalltasina, Hananeel sat torrecama.

2Jupanac jac'ansti perkjja asquichapjjaraquïnwa Jericó marcanquir chachanaca, ucjjarusti asquicharaquïnwa Zacur sat chacharaqui, jupasti Imri sat chachan yokapänwa.

3Senaa sat chachan wawanacapajja asquichapjjaraquïnwa Chawllanacan puncupa satäquis ucjja. Jupanacasti uchapjjänwa viganaca, uqhamarac puncunacapsa uchapjjaraquïna cerrojonacapampi, uqhamarac barranacapampi cuna.

4Ucjjaru perkäqui ucsti asquicharaquïnwa Meremot sat chacha, jupasti Urías chachan yokapänwa, Cos sat chachan allchhiparaqui; ucjjarusti asquicharaquïnwa Mesulam sat chacha, jupasti Berequías sat chachan yokapänwa, uqhamarac Mesezabeel sat chachan allchhiparaqui; ucjjarüqui ucsti asquicharaquïnwa Sadoc sat chacha, jupasti Baana sat chachan yokapänwa.

5Ucjjarüqui ucsti asquichapjjaraquïnwa Tecoanquiri jakenaca, jilïri jakenacapajja jan yanapañ munapcchïna perka luririnacan sarayirinacaparusa.

6Jesana sat puncsti asquichapjjaraquïnwa Joiada sat chacha, jupasti Paseah sat chachan yokapänwa, uqhamarac Mesulam sat chachampi jupasti Besodías sat chachan yokaparaquïnwa. Jupanacasti viganacwa uchapjjäna, uqhamarac puncunacapsa uchapjjaraquïna cerrojonacapampi, barranacapamppacha.

7Ucjjaru perkäqui ucsti asquichapjjänwa Gabaonanquiri Melatías, uqhamarac Meronotanquiri Jadón ucampiraqui, uqhamaraqui Gabaonanquiri, Mizpanquiri jakenacampi, qhitinacatejj apnakatäpcäna Eufrates jawirata inti jalanta tokenquir marca apnakerina.

8Ucjjaru perkäqui ucsti asquichänwa Uziel sat chacha, jupasti kollke yänac lurirïnwa Harhaía sat chachan yokapänwa; ucjjaru perkäquis ucsti asquichänwa Hananías sata suma k'apquir kollanaca lurir chacha; jupanac paniniwa Jerusalén perka asquichapjjäna ancho perkäqui ucqhacama.

9Ucjjar perkäqui ucsti asquicharaquïnwa Refaías sat chacha, jupasti Hur sat chachan yokapa, uqhamaraqui alcaldënwa Jerusalén marcana mä chicat apnakañapana.

10Ucjjar perkäqui ucsti asquicharaquïnwa Jedaías sat chacha, jupasti Harumaf sat chachan yokapa, ucasti utapa uñcatasiraquïnwa, ucjjarüquis uca perkjja asquicharaquïnwa Hatús sat chacha, jupasti Hasabnías sat chachan yokapänwa.

11Ucjjar perkäquis ucsti, asquichapjjaraquïnwa Hornonacan torrepa satäquisa ucqhacama Malquías sat chacha, jupasti Harim sat chachan yokapa, uqhamaraqui Hasub sat chachampi jupasti Pahat-moab sat chachan yokaparaqui.

12Ucjjaru perkäquis ucjja asquichapjjänwa Salum sat chacha, phuchanacapampi, jupasti Halohes sat chachan yokapa, uqhamaraqui alcaldënwa Jerusalén marcana mä chicata apnakañapana.

13Valle Puncu satäquis ucjja asquichapjjaraquïnwa Hanún sat chacha, uqhamaraqui Zanoanquir jakenacampi; jupanacasti uchapjjaraquïnwa puncunacapjja cerrojonacapampi, barranacapamppacha, ucatsti asquichapjjaraquïnwa pusi pataca pheska tuncani metro perkampi, T'unanaca Warañ sat puncucama.

14T'una Warañ puncu satäquis ucjja asquichänwa Malquías sat chacha, jupasti Recab sat chachan yokapa, Bet-haquerem sat distrito apnakeri, ucatsti ucharaquïnwa puncunacapjja cerrojonacapampi, barranacapamppacha.

15Uma Jalsu puncu satäquisa ucjja asquicharaquïnwa, Salum sat chacha, jupasti Colhoze sat chachan yokapa, uqhamaraqui Mizpa sat distriton apnakeripa; jupajja asquichäna, utachjjataraquïnwa, uqhamaraqui puncunacaparojja uchäna cerrojonacampi, barranacapamppacha. Uqhamaraqui asquicharaquïnwa Siloé sat uma estanquen perkapa, ucasti reyin jardinapa jac'ancaraquïnwa, uqhamasti asquichänwa Davidan marcapata sarakanqui uca sarakañ maqhatañanaccama.

16Ucqharu perkäquis ucjja asquichänwa Nehemías sat chacha, jupasti Azbuc sat chachan yokapa, Bet-sur sat chicat distriton apnakeripa. Uqhamaraqui jupajj perkjja asquichäna Davidan sepulcronacapäquejja uca uñcatascama, uma imañäquis ucacama, uqhamarac soldadonacan cuartelapcamaraqui.

17Ucjjaru perkäquis ucjja asquichapjjaraquïnwa levitanaca: Rehum sat chacha, jupasti Bani sat chachan yokapa; ucjjarusti asquicharaquïnwa Keila sata distrito apnakeri Hasabías sat chacha, ucsti asquichänwa provinciapan sutiparu.

18Ucjjar perkäquis ucjja asquichapjjaraquïnwa masinacapa: Bavai sat chacha, jupasti Henadad sat chachan yokapa, jupasti Keila lugarana mä chicata distritopana apnakeripänwa;

19uqhamaraqui Ezer sat chacha jupasti Josué sat chachan yokapa Mizpa lugaran apnakeripa, asquicharaquïnwa ucjjar yakha perka, armamento imañaru maqhatañäquis uca uñcatascama.

20Uca perksti asquicharaquïnwa Baruc sat chacha, jupasti Zabai sat chachan yokapa, esquinata kalltasina Eliasib sat sumo sacerdoten utapa puncupcama;

21ucjjar perkäqui ucsti asquichänwa Meremot sat chacha, jupasti Urías sat chachan yokapa, uqhamaraqui Cos sat chachan allchhipa, jupasti asquichänwa Eliasib sacerdoten utap puncupat kalltasina uca pachpa utan tucuyapcama.

22Ucjjar perkäqui ucsti asquichapjjaraquïnwa Vallen jaquir sacerdotenaca.

23Jupanacjjarusti asquichapjjaraquïnwa Benjamín sat chacha, uqhamarac Hasub sat chachampi, utap uñcatascama. Ucat jupanacjjarusti Azarías sat chacha, jupasti Maasías sat chachan yokapa, Ananías sat chachan allchhiparaqui; asquicharaquïnwa utapäquis ucqha.

24Ucjjar perkäqui ucsti asquichänwa Binuy sat chacha, jupasti Henadad sat chachan yokapa, Azarías chachan utapat kalltasina esquina tucuycama.

25Jupjjarusti asquicharaquïnwa Palal sat chacha, jupasti Uzai sat chachan yokapa esquina perka uñcatasita, uqhamarac reyin palaciopata jach'a jilsuta torrëqui ucampi, ucasti guardian patiopanwa jicjjatasi. Ucjjar perkäqui ucjja asquichänwa Pedaías sat chacha, jupasti Faros sat chachan yokapa,

26Uma Puncu satäquis uca nayräjjcama, inti jalsu toke cunjämatï jach'a jilsuta torrëquejja ucqha. (Qhitinacatejj Ofel chekana jacapcäna ucanacasti templona sirvirinacäpjjänwa.)

27Tecoanquir jakenacasti ucjjar perkäqui ucwa asquichapjjaraquïna, jach'a jilsuta torre nayräjjata, Ofel perkäquis ucqhacama.

28Sacerdotenacasti perkjja asquichapjjaraquïnwa, sapa maynisa utap uñcatascama, Caballonacan puncupa satäquis ucqhat kalltasina.

29Jupanacjjarusti perkjja asquichänwa Sadoc sat chacha, jupasti Imer sat chachan yokapänwa, utap uñcatasi perka asquicharaquïna; uqhamaraqui ucjjar perkjja asquicharaquïnwa Semaías sat chacha, jupasti Secanías sat chachan yokapa, Inti Jalsu puncu uñjiriraqui.

30Jupjjarusti perkjja asquichapjjaraquïnwa Hananías sat chacha, jupasti Selemías sat chachan yokapa; uqhamarac Hanún sat chachampi, jupasti Salaf sat chachan sojjtïr yokapänwa. Jupanacjjarusti perkjja asquicharaquïnwa Mesulam sat chacha, jupasti Berequías sat chachan yokapa, asquichänwa utap uñcatasi perka.

31Kollke yänac luriri Malquías sat chachasti ucjjar perkäqui ucwa asquichäna, templon sirvirinacana, alaquipanacana utanacapcama, Uñarañataqui puncüquis uca uñcatascama, uqhamarac esquinana uñch'uquiñataqui utäquis ucacama.

32Ucjjar percäquis ucjja asquichapjjänwa kollke yänac luririnaca, uqhamarac alaquipirinacampi, esquinana uñch'uquiñataqui utäquis ucat kalltasina, Ovejanacan puncupa satäquis ucacama.