Rut 4 - Qullan Arunaca

Booz chachampi Rut warmimpejj casarasipjjewa

1Booz chachajj, ucatjja marca mantañaruw kont'asir saräna, cawqharutï jakenacajj tantachasipjjerïcän ucqharu. Uca horasasti cawquïr familiattejj Booz chachajj parlcäna ucaw uca chekanjama pasascäna. Ucatwa juparojj säna:

—Jutam, acawjar kont'asim —sasa.

Ucatsti jutasinjja Booz chachan jac'aparuw kont'asïna.

2Ucatwa Booz chachajj marcanquir tunca jilïr chuyman jakenacaru jawsäna, ucanacarusti “Kont'asipjjam” saraquïnwa. Cunapachatejj jupanacajj kont'asipjjäna ucqhajja,

3Booz chachajj familiaparojj sänwa:

—Noemí warmejj Moab marcata cutt'anisinjja, Elimelec familiasan orakepa aljañwa amti.

4Nayasti acwa jumar yatiyañ munsma, jumatejj alasisin khespiyañ munasmajja, jichhpach alasim aca testigonac nayrakatana, uqhamarac aca jilïr jakenac nayrakatansa. Jumajj Elimelec chachan jac'a familiapätam laycojja, wact'tamwa orakepa khespiyañamajja. Jumatejj jan alasiña muncsta ucqhajja, nayar yatiyjjeta, jumjjarusti nayaruw wact'itu.

Uca familiasti ucjjarojj arsünwa:

—Nayasti alasïwa —sasa.

5Ucatsti Booz chachajj khanañchänwa aqham sasa:

—Sum amuyt'asim, Noemí warmin orakeptejj alasiñ munstajja, casarasiñamaraquiwa moabita Rut ijma warmimpejja, uqhamata orakejj jiwirin sutipancascañapataqui —sasa.

6Uca arunac ist'asasti uca familiajj sänwa:

—Uqhamïpanjja janiw nayajj alasisin khespiyquiristi, herenciajjaru jan walt'ayirjamätap laycu. Jumatejj alasisin khespiyañ munstajja, nayasti jumaruw khespiyañamataqui cunatejj wact'quitu ucjja churjjsma —sasa.

7Qhä urunacanjja Israel marcanjja mä sarapaw utjäna: Cunapachatejj maynejj familia luräwinaca luraña mayniru pasayjje, jan ucajj mä aljañatac parlt'äwi jan phokhaña munasinjja partepa pasayjjerïqui ucasti ch'ulla wisqhupa apsusisinwa maynir churjjerïna. Uca sarapa phokhañataquisti,

8Booz chachan familiapajj wisqhup apsusisinjja, Booz chacharuw churjjäna, aqham sasa:

—Jumaqui alasjjam —sasa.

9Ucatsti Booz chachajj, jupanacan nayrakatapanjja sänwa:

—Take jumanacaw arsurïpjjäta, nayasti jichhüruw Noemí warmit alasjjta cawquïri oraketejj Elimelec, Mahlón, Quelión sat chachanacanccäna uca.

10Uqhamaraquiw jumanacajj arsüpjjäta, nayana Rut ijmaru warmejjat catokjjañajjataqui, uqhamat orakepajj jiwiri Mahlón chachapan sutipancascañapataqui. Uqhamatsti janiw Mahlón chachan sutipajj chhaktcaniti jupanac taypinjja, ni aca marcansa armatäcaniti —sasa.

11Take ucanquirinacasti arsupjjaraquïnwa aqham sasa:

—Nanacaw take acanacat uñjapjjta. ¡Diosasti munpan, cawquïri warmitï utamaru mantancani ucasti Raquel, uqhamaraqui Lea warminacjamäpan, jiwasa Israelit jakenacajj jupanacan wawanacapäpjjtanwa! Jumasti suma aytat jakëma aca Efrata sat Belén marcanjja.

12Diosasti walja wawanacarac aca warmitjja jumatac utjaypan. Waljaniraquïpan familiamajja, cunjämatejj Fares chachan wawapajj waljanïcäna uqhama. Jupan awquip taycapasti Tamar, uqhamaraqui Judá satäpjjänwa.

13Uqhamaw Booz chachajj Rut warmimpi casarasïna. Ucatsti cunapachatï paninëjjapjjäna ucqhajja, Diosasti juparojj usur jakeptayänwa, mä wawanïñapataqui.

14Ucatsti Noemí warmirojj warminacajj sapjjänwa:

—¡Diosasti jach'achatäpan jichhüruna, mä allchhi churtam, jumaru khespiyañataqui! ¡Uca allchhimajj Israel marcana wali aytat jakëpan!

15Juparaquiw cusisiyätam, uqhamarac qhuyapayätam cunapachatejj taycäjjäta ucqhasa. Jupasti yojjch'aman wawapawa, jumarusti wali muntamjja. Yojjch'amasti jumataquejj wali asquiwa, pakallko wawat sipansa juc'ampi —sasa.

16Noemí warmisti wawaru ichtasinjja, jarphiparuw uchasïna, ucatsti uca wawarojj sum uywäna.

17Uqham uñjasinjja, uta jac'anquir warminacajj sapjjänwa:

—¡Noemïtaquejja mä wawaw naciwayi! —sasa.

Ucarusti Obed sasaraquiw sutiyapjjäna. Jupasti Isaí chachan awquipänwa, uqhamarac rey Davidan achachilaparaqui.

Davidan nayra achachilanacapa

18-22Davidan nayra achachilanacapasti, Fares chachat nayrakatarusti acanacänwa: Fares, Hezrón, Ram, Aminadab, Naasón, Salmón, Booz, Obed, uqhamarac Davidan Isaí awquipa.