1 Samuel 16 - Qullan Arunaca

Davidajj reyitac yakhachatawa

1Tatitusti Samuelorojj saraquïnwa:

—¿Cunapachcamas uqham llaquitaqui sarnakäta uca Saúl reyi laycojja? Janiw nayajj muncjjti jupan Israel marcjjaru reyiquïscañapjja. Jichhajj sartasim, ucat uca wajjraru aceitempi phokhantam, ucatsti Isaí chachan utapar sarañamwa munta, Belén chekaru, nayasti mayni wawaparuw ajllista reyïñapataqui —sasa.

2—¿Cunjämsa jichhasti saräjja? ¡Saúl reyitejj saratajj yatinejja, jiwaychitanejjaya! —sasaw Samuelojj säna.

Tatitusti saraquïnwa:

—Mä kachu vaca kallu irpjjarusiwayam, ucatsti ‘Sacrificio loktiriw sarä’ sasa saraquim.

3Ucatsti Isaí chacharojj uca sacrificio loktäwirojj jawsayaraquim, ucat nayaw sascäma cunatejj lurañamäqui ucjja. Qhitirutejj nayajj siscäma ucaru reyitac yakhacham —sasa.

4Samuelosti cuntejj Tatitojj siscatayna ucanacwa luraraquïna. Cunapachatejj Belenar purcän ucqhasti, marcatjja jilïri jakenacaw mistunipjjäna jupar catokañataqui, mä juc'a ajjsarapjjaraquïnwa, jisct'apjjaraquïnwa:

—¿Sumancaña munasati juttajja? —sasa.

5—Jïsa, uqhamawa. Tatitur mä sacrificio loktiriw jutta. Jichhajj k'omachasipjjam ucatsti nayampi chica sacrificio loktir sarapjjaraquim —sasaw Samuelojj saraquïna.

Ucat janc'aquiraquiw Samuelojj Isaí chachampiru, yokanacapampiru k'omachäna, ucat sacrificio loktiri sarañataquiw jupanacarojj jawsaraquïna.

6Cunapachatejj jupanacajj purjjapjjän ucqhajj Samuelojj Eliab uñjasajj sänwa: “Acapunïpachaw cawquïri jaktejj Tatitojj reyïñapataqui ajllisqui ucajja” sasa.

7Ucampis Tatitojj sänwa: “Jan jumajj uñnakapataqui, uqhamarac jach'a tansätapatacsa ajllimti, nayajj ucanacjja maysaruw apanuctjja. Janiw cuntejj jakejj uñcatqui uqhamäcaniti; jakejj uñnakacwa uñjejja, ucampisa nayajj jaken chuymapwa yatiractjja, ucwa uñjaractjja.”

8Uca Isaí chachajj Abinadab ucaruw jawsayanïna, ucat Samueloruw uñstayaraquïna; ucampisa saraquïnwa:

—Janiraquiquiw acäquiti Tatitun ajllitapajja —sasa.

9Ucat Isaí chachajj Sama sat yokaparuw irpcataraquïna; ucampisa Samuelojj saraquïnwa:

—Janiw acarus ajlliscaraquiquiti —sasa.

10Isaí chachajj pakallko yokanacapwa Samuelorojj uñstayäna, ucampisa Samuelojj yatiyjjänwa, Tatitojj uca pakallkonitjja jan maynirus ajllitapa.

11Ucat Isaí jakerojj jisct'äna:

—¿Janit juc'ampi yokanacamajj utjcjje? —sasa.

—Sinti sullcäqui ucaw utjasqui, jupasti oveja awatiriwa —sasaw Isaí chachajj saraquïna.

—Irptayanim. Jupan puriniñapcamajja janiw cunatejj lurañasäqui ucjja lurcañäniti —sasaw Samuelojj saraquïna.

12Isaí chachajj uca sullca yokaparu jawsiriwa qhitäna. Ucat uca sullquïristi suma wila ajanunïnwa, wali suma uñnakt'aniraqui.

Ucat Tatitojj Samuelorojj saraquïna:

“Acapï reyitaqui ajllitäñapäqui ucajja. Jichhajj sartasim, ucatsti juparojj reyïñapataqui yakhachjjam” sasa.

13Ucat Samuelojj janc'aquiw aceiten wajjra aptasinjja, jilanacap nayrakatanwa uca waynarojj reyïñapataqui yakhachjjäna, jupasti David satänwa. Ucat ucsarusti Tatitun ajayupaw jupjjancäna. Ucatsti Samuelojj jupanacatjja sarjjänwa, Ramá sisqui uca chekaru.

Davidajj Saúl chachan sirviripawa

14Ucañcamasti Tatitun ajayupajj janiw Saúl reyimpïcjjänti, Tatitun qhitanita mä ñankha ajayuw juparojj t'akhesiyäna.

15Ucatwa juparu sirvirinacajj sapjjäna:

—Cunjämatejj jumajj uñjtajj, tata, Diosan qhitanita mä ñankha ajayuw jumarojj t'akhesiyasctam.

16Ucampisa jumajj sirvirinacamaru saraquim, qhititejj arpa tocañ yatqui uca thakapjjañapataqui, uqhamat cunapachatejj jumaru uca ñankha ajayojj t'akhesiycätam ucqhajj, uca arpa toquirejj toct'añapataqui, uqhamat jumajj sumaqui jicjjatasïta.

17—Uqhamajj qhititejj suma toct'añ yatqui uca thakhapjjam, ucat irpanirapipjjeta —sasaw Saúl reyejj saraquïna.

18Ucat jupanacat maynejj arsu:

—Nayajj uñjtwa, Belenanquir Isaí chachan mayni yokapaw suma toct'añ yati; uqhamarus guerran nuwasiñataquejj jan ajjsaririwa. Cunapachatejj cunsa parli ucqhajj, wali suma amuyumpiw parli, uqhamarac wali suma uñnakt'ani waynawa. Tatitusti jupampiraquiwa —sasa.

19Ucat Saúl reyejj mä qhitanacwa Isaí chachan ucar qhitäna, aqham sapjjañapataqui: “Ovejanaca awatirïqui uca David yokamaru nayan ucaru qhitanita” sasa.

20Ucat Isaí chachajj David yokaparojj Saúl reyin ucaruw qhitanïna. Jupampi chicasti mä asno irpayaraquïna, t'ant'as qhumt'ata, mä lip'ichi wayaka vinompi, mä cabritompi cuna.

21Uqhamaw Davidajj Saúl reyin nayrakataparu uñstäna, ucat jupar sirviraquïna. Saúl chachasti wali Davidarojj munasiraquïna, ucat jupan yanapiripatwa uchasiraquïna.

22Saúl reyejj mä ewjja Isaí chachan ucarojj ewjjaraquïna, Davidan kheparañapataqui achict'asisa, Davidan wali suma waynätap laycu.

23Uqhamasti cunapachatejj uca Tatitun qhitanita ñankha ajayojj Saúl reyiru t'akhesiycän ucqhajj Davidajj arpa toct'arapirïna. Ucampiw Saúl reyejj cutjtasa waliquëjjaraquirïna uca ñankha ajayusti jupatjja jithektjjaraquirïnwa.