Jeremías 33 - Qullan Arunaca

Mä suyt'äwit yatiyäwi

1Jeremiasajj guardian patiopana presöscäna ucapachaw Tatitojj Jeremiasarojj wasitat parljjayäna aqham sasa:

2“Naya, qhititejj aca orake lurcta, ucatsti suma cimientopjjaru utt'aycaracta, ucaw sisma:

3Nayar art'asita, nayasti ist'araquïmawa, ucatsti cunanactejj jumajj jan yatcta, uñjcaracta ucanacwa uñacht'ayaraquïma.

4-5Naya, Israelan Diosapasti, mä yatiyäwinacanïtwa jumataquejja, Jerusalén marcanquiri utanac toketa, uqhamaraqui Judá orakenquiri reyinacan utanacap toketsa, cawquïrinacatejj k'ala tincuyatäcani ucanacata. Jumanacan caldeonac toke espadampi nuwasiñataqui sayt'asiñ chekana aptatäcan aca marcar nuwantañataqui, ucar mistutanacamasti inamayaquïniwa; jiwatanacampiquiw phokhantasipjjätajja. Nayawa jach'a colerasiñajjana, jupanacarojj jiwarayä; nayasti aca marcatjja maysaruw uñtjjta, walja ñankhanaca lurapjjatap laycu.

6Ucampisa kollapjjaraquïmawa, c'umara tucuyapjjaraquïma, ucatsti chekpachanaracwa sumana jan qhitin cun sata sarnakasjjapjjäta.

7Judá marcana, uqhamaraqui Israelan sarnakäwipsa sumaruw tucuyjjaraquï, ucatsti wasitatwa jupanacarojj sayt'ayjjä: cunjämäpcäntejj kalltanjja uqhamäjjapjjañapataquiraqui.

8Cuna juchanactejj naya toke lurapcän take ucanacatsti k'omachjjaraquïwa, take ñankhanaca lurapcän ucanacatsti jupanacarojj perdonjjaraquïwa, uqhamaraqui nayataqui sayt'asitanacapatsa.

9Jerusalenasti nayataquejj cusiscañäniwa, sumana uñjata, jach'achataraqui take marcanac nayrakatana aca orakenjja. Cunapachatejj jupanacajj ist'apjjani, cuna asquinactejj Jerusalenanquir jakenacjjaru apancä uqhamaraqui jach'aptañanacsa, churcäjja ucapachan uca yakha marcanacajj ajjsarañat qhathatipjjani.”

10Tatitojj siwa: “Jumanacajj sapjjtawa: ‘Aca chekajj wasararu tucutawa, janiraquiw jakenacas ni uywanacas utjquiti,’ sasa; Jerusalén marcan callenacapasa, Judá oraken marcanacapasa ch'usaquiwa, janiraquiw ucanjja qhitisa, ni jakenacasa, uywanacasa jacapquiti, sasa. Jichhajj waliquiwa, acanwa suma fiesta k'ochunacajj ist'asini;

11cusisiña k'ochunacaw ist'asini, casarasirin k'ochunacapaw ist'asini, ucatsti sapjjaraquiniwa: ‘Take ch'amani Diosaru yuspagarapjjam, Tatitusti sumawa, munasiñapas wiñayataquiraquiwa’ sasa. Templorusti yuspagaraña ofrendanac apanipjjaraquini. Jïsa, nayaw asquiru tucuyä aca marcan sarnakäwipjja. Cunjämäcäntejj kalltanjja uqhamäñapataqui. Naya Tatituw ucjja arsta.”

12Take ch'amani Tatitojj siwa: “Aca marcana, cawqhatejj jichhajj wasararu tucuyatäqui, jan jakeni, jan uywanacani, take marcanacana, wasitatwa pastonacajj utj-jjani, cawqharutejj awatirinacajj wasitat uywanacapa anaquipjjani.

13Kollu tokenquiri marcanacansa, kota irana pampa orake tokenacansa, Néguev orakensa, Benjamín tribun orakepansa, Jerusalén marca thiyanacansa, Judá orakenquir marcanacansa, awatirinacarojj uñjatäjjaniwa tamanacapa jaqhusipquiri. Naya Tatituw ucjja arsta.”

14Tatitojj siwa: “Mä uruw purinini, cunapachatejj take bendicionanac Judá marcaru uqhamaraqui Israelaru churañataqui arscäyäta uca urojja.

15Uca uru purincani ucapachasti Davidataquejj mä jupan wawapwa utjayaraquëjja, juparaquiw aca marcanjja asquimpi chekapampi utjayani;

16uca urunacanjja Judá orakejj sumaquiw sarnakasini, Jerusalén marcasti jan qhitin cun sataraquiw jacasiraquini. Aca sutimpiw uca wawarojj sutichapjjaraquini: ‘Tatituw jiwasan atipjañasajja’ sasa.

17Naya, Tatitusti, saractwa: Davidan wawanacapatjja utjapuniniwa mayni Israelan tronoparu kont'asirejja,

18uqhamaraqui Leví tribut jutiri sacerdotenacas utjapuniniwa, sapa uru nayaru loktäwinaca loktañataquejja, grano loktäwinaca nayan sutejj-jjaru naqhayañataqui, uqhamaraqui yakha loktäwinaca nayaru loktañataquisa.”

19Tatitusti wasitatwa Jeremiasaru parläna ucatsti saraquïnwa:

20“Naya Tatituw sista: Phokhasipuniniwa cuna arust'äwtejj nayajj urumpisa, arumampisa lurcta ucanacajja, uqhamat urus arumasa horasaparu puriniñapataqui.

21Uca quipcaraquiwa: Cuna arust'äwtejj David uywatajjampi lurcta ucajj phokhasipuniniwa, ucatsti mayni jupan wawapa tronopar kont'asirejj utjapuniniwa, uqhamaraqui sacerdotenacampi arust'äwiru mantatajjasti phokasipuniniwa, Leví tribunquiri wawanacapampejja.

22David sirvirejjan wawanacaparusti uqhamaraqui nayaru sirviri Leví tribunquirinacarusa waljaptayäwa, alajjpacha warawaranacjama, uqhamaraqui kota iramanquiri ch'allanacar uñtata jan qhitinsa jact'cayaraquïniwa” sasa.

23Tatitusti Jeremiasarojj parljjayascaquïnwa, aqham sasa:

24“¿Amuytati cunjämsa jakenacajj parlapjje nayan Judá orakeru, uqhamaraqui Israelaru apanucutajjatjja? ¡Ucatwa marcajjarojja jisc'achañampi uñjapjje, janiraquiw mä marcarjamas uñjapquiti!

25Jichhasti naya Tatituw sista: Nayasti urumpi arumampiw mä arust'äwiru mantta, uqhamaraqui cuna casta leyinacatejj alajjpachsa, acapachsa apnakcaspa ucanacwa uscuracta.

26Jichhasti janipuniw apanuccäti Jacobon wawanacaparojja, David uywatajjan wawanacaparusa, jupanac taypitsti utjayaraquïwa mayni mistuñapa, Abraham, Isaac, Jacob ucanacan wawanacaparu apnakañapataquejja. Nayaw jupanacatjja qhuyapayasëjja, sarnakäwinacapsti asquiruw tucuyjjaraquejja.”