Ezequiel 14 - Qullan Arunaca

Yakha diosanacar yupaychañjjata arsüwi

1Israel marcatsti walja jilïri jakenacaw nayaru jutapjjäna, Tatitur jisct'añajjataqui.

2Uqhamasti Tatitojj nayarojj saraquitänwa:

3“Aca jakenacajj yakha diosanacar yupaychañaruw catuyasjjapjje, cunatejj jucharu puriyqui uca uñcatataquïsipcaraquiwa. ¿Ucatti nayajj iyawsäjja jupanacan nayar jisct'asitanacapjja?

4Jichhajj jupanacampi parlam ucatsti saraquim: ‘Aqham siw Tatitojja: Take israelitanacatejj yakha diosanacar yupaychañaru uscusipjjani, jucharu puriyqui ucanaca uñcatataquïsipcaraquini, ucat profetan ucaru jisct'asiri jutapjjaraquini, ucanacarusti nayajj kawkha c'ari diosanacapatejj utjqui ucarjamaraquiw arusjjatäjja.’

5“Cawquïri israelitanacatejj nayat jithektjjapjje yakha diosanacaru yupaychañataqui, ucanacarusti nayaw chuymapa llamct'araquëjja.

6Ucat jichhajj israelitanacaru saraquim: ‘Aqham siw Tatitojja: Nayan ucaru cuttanjjapjjpan; yakha diosanacapsti apanucjjapjjaracpan, uca ajjtascañ luräwinacapsa apanucupjjaracpan.’

7Mä israelita jaketejja, jan ucajj mä yakha marcat jutir jakesa, Israel oraken jaccasa, nayat sarakasa yakha diosanacar yupaychañaru catuyasjjani, jucharu puriyqui ucanaca uñcatatäsipcani, ucat mä profetaru jisct'asiri sarapjjaraquini, ucanacarusti naya quipcaw jisct'anacaparojj arusjjataraquëjja.

8Uca jakempisti nayajj jiquintasïwa, takeninsa uñjcañwa mutuyaraquëjja takenis ucat parlapjjañapataqui, uca jakerusti marcajjatjja chhaktayaraquïwa. Ucapachaw jumanacajj yatipjjäta nayan Tatitütajja.

9“Mä profetatejj c'ari yatiyäwinac churani ucajja, nayaw uca profetarojj uqhama yatiyañapataqui lurtjja, ucampisa uca profetarojj mutuyasin Israel marcajjat chhaktayaraquëjja.

10Jisct'asir jakesa, uca profetasa juchanacapatjja panpachani mutuyatäniwa.

11Uqhamat Israel marcajj jan nayat juc'ampi jithektjjañapataqui, janiraqui uca ñankha lurañanacampisa k'añuchasiscañapataqui. Jupanacajj nayan marcajjäniwa, nayasti jupanacan Diosaparaquïyäwa. Naya Tatituw ucjja arsta.”

Jerusalén marcan mutuyäwi catokañapajj waquisitapa

12Tatitusti nayan ucaru jutasinjja, saraquituwa:

13“Mä marcatejj naya toke sartani, jucha lurasa, janiraqui take chuymampi arcquitaniti, uca marcatakesti amparajj aytä mutuyañataqui, cuna mank'aña imasitanacapatejj utjqui ucanacsa apakaraquïwa. Uca marcjjarusti mach'a apayaniraquëjja, jakenacasa, uywanacasa mank'atjamawa jiwarapjjani.

14Uca marcantejj Noé, Daniel uqhamaraqui Job ucanacatejj jacapjjaspajja, uca quimsaniquiw khespipjjaspa asqui jakenacäpjjatap laycu. Naya Tatituw ucjja arsta.

15“Nayatejj mä marcaru cunayman monte animalanac qhitirista, uca marcan utjir jakenacaru jiwarayapjjañapataqui, uca marcjja ch'usa wasararu tucuyapjjaspa, uqhamat uca chekjja jan qhitis ajjsarañatjja pasañ muncaspati, uca animalanacar ajjsaratap laycu.

16Uca marcantejj uca quimsa jakenacajj jacapjjaspa, ucanacajj janiw yokanacaparusa, phuchanacaparusa khespiyapcaspati; jupanacaquiw khespipjjaspajja. Naya Tatituw ucjja arsta jacañajj laycu juramento lurasa.

17“Nayatejj guerranaca aca marcjjaru apayanirista, uqhamaraqui uywanacana, jakenacana jacañanacapsa apakañataqui arsuraquirista ucapachajj,

18uca quimsa jakenacatejj ucan jacapjjaraquispa, ucqhasti janiw yokanacaparusa, phuchanacaparusa khespiyapcaspati; jan ucasti jupanacaquiwa khespiyasipjjaspajja. Naya Tatituw ucjja arsta jacañajj laycu juramento lurasa.

19“Aca marcjjarutejj cunayman usunaca apayanirista, colerasiñajjanjja jiwaña waratataraquirista, jakenacsa, uywanacsa jiwarayaraquirista,

20ucantejj Noé, Daniel, uqhamaraqui Job ucanacajj jacapjjaspa, ucapachajj janiw yokanacaparusa, phuchanacaparusa khespiyapcaspati; jupanac sapaquiw asqui jakenacäpjjatap laycu khespiyasipjjaspajja. Naya Tatituw ucjja arsta jacañajj laycu juramento lurasa.

21“Naya Tatitusti arstwa: Cunapachatejj Jerusalén marcjjaru nayajj pusi jach'a ajjsarcañ mutuyäwinaca apayanï ucqhajj juc'ampi jan walt'cañäniwa; guerranaca, mach'anaca, ajjsarcañ animalanaca, cunaymani usunaca apayancä, jakenacarusa, uywanacarusa jiwaraycä ucapachajja.

22Mä kawkhaniquiw ucanjja kheparapjjani, uca chekatjja yokanacapampi, phuchanacapampiw mistunjjapjjaraquini. Cunapachatejj jupanacajj jumanacan ucaru jutapjjani, ucapachaw jumanacajj uñjapjjäta cunjämtejj sarnakapcatayna uqhamaraqui cunanactejj lurapcatayna take ucanaca. Ucatsti cuna mutuyäwtejj Jerusalén marcjjaru apayancta ucatsti chuymachasjjapjjaraquïtawa.

23Cunjämtejj jupanacajj sarnakapcatayna, cunanactejj lurapcatayna ucanac yatisasti chuymachasipjjaraquïtawa. Ucapachaw jumanacajj amuyapjjäta, cuna mutuyäwinactejj Jerusalén marcjjaru apayancta ucanacjjatjja waquisirïtapa. Naya Tatituw ucanacjja arsta.”