Proverbios 24 - Qullan Arunaca

-19-

1Jucharar jakenacatjja jan envidiasimti,

janirac jupanacamp chica sarnakañsa munamti,

2jupanacajj jan wali lurañanacatacwa lup'isipqui,

ucatsti jan wali lurañanacatacwa parlapjjaraqui.

-20-

3Yatiñ cancañampiwa utajj lurata,

cimientonacapasa ch'iqhi cancañampiwa uchantataraqui.

4Ucatjja uta mankherojja yatiñampiw phokhantataraqui,

jila alani muncaña yänacampi.

-21-

5Wali ch'aman jaket sipansa, yatiñan jakewa juc'amp jilanquejja;

ch'amanïñata sipansa yatiñ cancañawa juc'amp luraspajja.

6Wali suma amuyt'äwinacampiwa guerran nuwasiñajj waquisi,

walja ewjjerinacampiwa atipjañajj utjaraqui.

-22-

7Jan yatiñan jakejj tribunalanjja, janiw cun sañsa yatquiti,

jupan yatiñ cancañapajj jayancatap laycu.

-23-

8Jan walinacaqui lup'ir jakejj

“Jan wali amtir jake” sasa sutichatäniwa.

9Jan amuyt'an jakesti jucha lurañacwa munasqui;

¡jan yäkasir jakesti, uñisitawa jakenacanjja!

-24-

10T'akhesiña horasantejj mayjt'asïta ucapachajja,

juc'a ch'amaniquiwa jicjjatasjjäta.

-25-

11Jiwañataqui juchañchatäqui ucanacarojj khespiyam;

khespiyam jan walt'añancqui ucanacarojja.

12Jumajj sascamsa: “Janiw cunsa yatcäyätti” sasa,

ucampis Tatitojj chuymamjja uñt'iwa,

yatiraquiwa cunjämattejj khespiyascasamäna ucsa.

Tatituwa sapa mayni jakenacarusa luratapatjama churi.

-26-

13Munat wawajjay, misq'iy mank'am, ucan sumätap laycu;

mallt'am, jumataquejj sumawa.

14Uqhama misq'jamäniwa jumataquejja yatiñ cancañasa, uñt'añasa;

jumatejj ucanac jicjjatäta ucajja,

suma tucuyäwi jicjjatäta,

ucatsti suyt'äwimajja janipuniw tucjatäcaniti.

-27-

15Jucharar jake, jan amtamti asqui jake contra jan wali lurañanaca,

janiraqui utaparusa jan walinacjja luramti;

16asqui jakejj pakallk cutis aynacht'canejja, cutjtascaquiniwa,

ucampis jucharar jakejj jan walt'añapanjja k'alawa aynacht'ani.

-28-

17Cunapachatejj uñisirimajj jan walt'cani, uqhamarac aynacht'cani ucqhajja,

jan cusisimti, janirac fiestsa luramti.

18Tatitutaquejj uqham luratamajja janiw sumäcaniti,

ucatsti jupan colerapajj jupjjatjja saraktaniwa.

-29-

19Jan colerasimti jucharar jakenac laycojja,

janiraqui ñankha jakenacatjja envidiasimti.

20Jucharar jakejj janiw suma tucuyäwi jicjjatcaniti;

¡jucharar jakejj mä lamparjamawa jiwt'awayjjani!

-30-

21Munat wawajjay, Diosarusa, reyirusa ajjsaram;

uñisirinacamampejj jan mayachasimti.

22Jupanacan tucusiñapajj acatjamatwa purinini,

ucatsti Diosampi, reyimpi mutuycani ucjja janiw qhitis yatquiti.

Yatiñan jakenacan yakha säwi arunacapa

23Acanacajj yatiñan jakenacan säwi arunacaparaquiwa:

Tribunalanacanjja takenirusa chekaparu uñjatäñapawa waquisi.

24Qhititejj juchan jakeru sani: “Janiw juchanïctati” sasa ucarojja,

jakenacajj ñankhachaniwa, marcanacasa juparojj uñisiraquiniwa.

25Ucampis qhitinacarutejj mutuyapcani ucanacajja cusisitaw jacapjjani,

jakenacasa jupanacarojj bendiciraquini.

26Qhititejj cheka suma arunac arsqui ucajja,

lacatsa suma jamp'atcaspa uqhamawa.

27Ankan negociomäqui ucjja tucuyam,

pampan lurañanacamäqui ucjja luram,

ucatwa utama lurasismajja.

28Masim contrajj jan amanutjja testigota sayt'amti,

janiraqui c'ari arunacjja khanañchamti.

29Janipun cunapachas lup'imti: “Cunjämtï nayar lurquitojja,

uqhamaracwa nayajj luraraquëjja” sasa.

30Jayra jaken yapu jac'apwa pasawayta,

pisi amuyt'an jaken uva yapup jac'a.

31Ucatsti yapupwa uñjta ch'aphinacampi chhaktayata,

kala uyupasa liju tucjataraqui.

32Uqham uñjasinsti chuymajjanjja amthapistwa;

uc uñjasinsti aca yatichäwi yatekta:

33jumajj juc'ampis ict'ascactawa,

amparanacamsa khomjjarusiscactawa sum iquiñataqui,

34uccañcamasti pobrernucstañawa acatjamata catuntätam,

mä muyuycu jakjama wali ch'amampi.