Jeremías 42 - Qullan Arunaca

Jakenacajj Jeremiasaruw mayipjje Diosat mayiñapataqui

1Take jilïrinacasti, Carea jaken Johanán yokapa, uqhamaraqui Osaías jaken Azarías sat yokapa, take jakenacampi jisc'a jach'a,

2jupanacasti Jeremías profetaru jac'achasisinsti sapjjaraquïnwa:

—Maya jumat mayipjjäma, janiquiya janiw sapjjestati. Tatitu Diosamaru mayirapipjjeta nanaca juc'a jakenaca kheparapcta ucanacataqui, nayrajj waljanïpjjäyätwa, jichhasti juc'aniquëjjapjjtwa cunjämtejj jumajj uñjctajja uqhama.

3Tatitu Diosamarusti saraquim, cawqui cheksa nanacajj sarapjjä, cunsa lurapjjä ucanac toketjja —sasa.

4Jeremías chachasti jupanacarojj saraquïnwa:

—Waliquiwa. Nayaw jumanacataqui Diosamat mayirapipjjäma, cunjämtejj sapquista uqhamarjama, ucatsti yatiyjjapjjaraquïmawa cuntejj Tatitojj sisquitani take ucanaca, jan cunsa imt'asa —sasa.

5Uqhamasti jupanacajj Jeremiasarojj sapjjaraquïnwa:

—Tatitu Diosamaw chekpacha testigöni nanacataqui janitejj nanacajj cuntejj jupajj siscätam uca arunacaru phokhapcä ucapachajja.

6Walïnisa, jan walïcanisa jupan arunacapajja, Tatitu Diosasarupuniw jiwasajj jaysañäni, qhitirutejj jichhajj maqhatctan ucaru uqhamat take cunas jiwasataquejj walt'añapataqui —sasa.

Tatitun arunacapa Jeremiasan mayitaparu

7Tunca urunaca pasjjepansti Tatitojj Jeremiasaruw parläna,

8Jeremiasasti Johanán sat jakeruw jawsayaraquïna, cawquïritejj Carea jaken yokapäqui ucaru, uqhamaraqui cawquïri jilïrinacatejj jupampi chicäpcän ucanacaru, take jakenacaru jisc'at jach'acama,

9saraquïnwa: “Israel Dios Tatitupasti, qhitirutejj jumanacajj mayirapipjjeta sapquista ucasti siwa:

10‘Jumanacatejj aca oraken kheparaña munasipcsta ucajj, nayajj jumanacarojj jach'aruw aptapjjäma; janiw tucjapcaraquïmati, jan ucasti nayaw ayruntapjjäma, janiraquiw jiq'inucupcämati, uca jan walt'añanaca apayanitajjatsti walpun amtaracta.

11Babilonianquiri reyirojj jan ajjsarapjjamti, jumanacajj juparojj walpun ajjsarapjjtajja. Jan juparojj ajjsarapjjamti, nayasti jumanacampïsctwa jumanacar munañapat khespiyañataqui. Naya, Tatituw, ucjja arsta.

12Nayasti jumanacatjja qhuyapt'ayasipjjämawa, jupasa jumanacatjja qhuyapt'ayasipjjaraquïtamwa, ucatsti aca pachpa orakeparuw cuttayanjjapjjaraquïtpa.’

13“Ucampisa jumanacatejj jan aca marcaru kheparañ munapcsta, jan ucasti Tatitu Diosamarojj jan ist'aña munapcstati,

14sapjjaraquïta: ‘Egiptor jacasiriqui sarjjañäni, ucaw sumajja, ucansti janiw guerra uñjcañäniti, janiraquiw trompetan phust'asitapsa ist'caraquiñäniti, janiw mank'atsa jiwarcaraquiñäniti’ sasa.

15Uqhamajj jichhajj aca arunac ist'apjjam, qhitinacatejj aca Judá orakeru kheparapjjta ucanaca, cuntejj Israelan Tatitu take ch'amani Diosapajj sisqui uca: ‘Jumanacatejj Egiptoru jaquiri sarañ munapjjapunïta ucapachasti,

16cuna guerrarutejj jumanacajj wali ajjsarapjjta uqhamaraqui uca jach'a mach'aru ajjsarapcta ucajj pachpa Egiptonwa jumanacaru jicjjatapjjätam, ucatsti uca pachpa orakenwa jiwarapjjaraquïta.

17Take qhitinacatejj Egiptoru sarjjañ munapjje take ucanacasti uca pachpa Egipton guerran jiwarapjjani, mank'atjama uqhamaraqui cunayman casta usunacampi. Janiw ucanjja maynis jaccjjaniti, janiraquiw maynis khespitäcaniti cuna jach'a t'akhesiñtï apayancä ucatjja.’

18“Israelana Diosapa take ch'amani Tatitusti siwa: ‘Cunjämatejj colerasiñajjampi khoruchasiñajjampejja ninjam jumanacataqui aktänjja, take qhitinacatejj Jerusalén marcan jacapcäna take ucanac toke, uqhamaraquiw jumanac tokejj colerasiñajjajj aktani, jumanacatejj Egiptor sarapjjäta ucapachajja. Jumanacajj jakensa uñtcaña maldecitäpjjätawa, ajjsarcaña tucjataw uñjasipjjaraquïta, janiraquiw mayampsa aca orakjja uñjapcjjätati’ sasa.

19Jumanacarusti, qhitinacatejj Judá orakeru kheparasipcta ucanacarusti, Tatitojj sapjjtamwa, ‘Jan Egiptor sarapjjamti’ sasa. Jichhasti sum ist'apjjam, nayaw ucjja jumanacaru yatiyapjjsma.

20Jumanacajj mä jach'a pantjasïwi lurapjjtajja. Jumanacpachaw mayipjjesta nayan Tatituru jisct'añajjataqui, sapjjaraquïyästawa: ‘Tatitu Diosasat mayim nanacataqui, ucatsti yatiyapjjaraquita cuntejj jupajj siscani uca, nanacan arsutaparu phokhapjjañanacajjataqui’ sasa.

21Nayasti jumanacarojj yatiyapjjsmawa, cuntejj Tatitu Diosamajj jumanacar yatiyañataqui sisquitu ucanacjja, ucampisa jumanacajj janiw ist'añ munapctati.

22Jichhajj uca laycu yatipjjam, jumanacajj guerranacana, uqhamaraqui mank'atjamaw cunayman casta usunacampi jiwarapjjaraquïta, cawquïri orakerutejj jaquiri sarapcäta ucana.”