Jeremías 7 - Qullan Arunaca

Jeremiasajj templon parli

1Tatitusti wasitatwa Jeremiasarojj parläna ucatsti saraquïnwa:

2“Tatitun templopa puncuru sayt'asim ucatsti aca arunaca yatiyaraquim: Judá orakenquir take jakenaca, qhitinacatejj aca puncunac toke Tatitur yupaychañataqui mantapcta ucanaca, ist'apjjam aca arunaca.

3Cuntejj Tatitojj sisqui ucanaca, jupasti take ch'amaniwa, Israelan Diosaparaquiwa. Asquichasipjjam sarnakäwinacama, uqhamaraqui luräwinacamsa, nayasti ucatjja jumanacarojj aca oraken jacayasipcämawa.

4Janiraqui qhitinacatejj c'arinac parlapjje ucanacarojj alcatasipjjamti, qhitinacatejj sapjje: ‘¡Tatitun templopaw ucanqui, Tatitun templopaw acanqui sasa, ucanacarojja!’

5“Jumanacatejj sarnakäwinacamsa, uqhamaraqui luräwinacamsa asquichasipjjäta ucapachajj, maynit maynicamas chekaparu uñjasipjjäta ucapachasa;

6janiraqui yakha marcat jutirinacarus sinti irnakayapjjätati, ni wajchanacarusa, ni ijmanacarusa, ni jan juchani jakenacarusa aca chekanjja jiwayapjjätati, ni yakha diosanacarusa yupaychapjjaraquïtati, ucanacampisti jumanacpachaquiw aynacht'apjjasmajja.

7Nayajj aca orakeruw jaytasipcäma jacasipjjañamataqui, cawquïri oraktï nayrapacha awquinacamaru churcäyäta wiñayataqui ucaru.

8“Jumanacajj c'ari arunacaruquiw iyawsapjjtajja, uca arunacasti janiw cunataquis jumanacataquejj walïquiti.

9Lunthatapjjta, jake jiwayapjjta, wachok juchan sarnakapjjta, c'ari juramentonac lurapjjta, Baal diosarusti inciensonaca loktasipjjta, ucatsti yakha diosanacarusa yupaychapjjaracta, ucanacampejj janiw cuna lurañanacamas utjquiti,

10take ucanac lurasinsti aca nayan templojjaru, cawquïritï nayaru loktatäqui, ucarojj jutapjjaractawa, naya nayrakataru uñstañataquejja. Ucatsti amuyasipjjaractawa, ucanjja arjjatatäsipcasmasa uqhama ucat take uca jan walinacjja lurasipcaraquisma, ucatsti nayajj uca luratanacamjja janiw juc'ampi uñjcäti.

11¿Jumanacasti amuyapjjtati, aca nayaru loktata templojj lunthatanacan putupäcaspas uqhama? Nayasti take ucanacwa uñjta. Naya Tatituw take ucanacjja arsta.

12Silo sisqui uca chekan nayan ajllit kollan utajjaru sarapjjam, cawqui chektejj nayajj nayrakata ajlliscta jacasiñataqui uca chekaru, ucatsti uñjapjjaraquim cuntejj uca chekampi lurcta uca, Israel marcajjan ñankha luratanacap laycu.

13Nayasti mayampi mayampwa jumanacarojj ñankha luratanacamatjja ewjjapjjsma, ucampisa jumanacajj janiw nayarojj ist'apquistati, ni jaysapcaraquistasa. Naya Tatituw acjja arsta.

14Ucatwa jichhajj cuntejj Santuariojjampi Silo chekanjja lurcta, uqhamaraquiw jichhajj aca nayaru loktata templompejj luräjja, uca templsti jumanacaruw churapjjsma, uqhamaraqui nayrapacha awquinacamarusa, jumanacasti uca temploruw wali alcatasipjjaractajja.

15Jumanacarusti, naya nayrakatatjja jayaruw jakonucupjjäma, cunjämatejj jilanacamaru lurctjja uqhama, Efrainan wawanacaparu.’

Israelan jan take chuymätapa

16“Jumasti Jeremías, jan aca marcataqui Tatitut mayimti, jan nayarojj achict'asquistati jupanacataquejja. Jan juc'ampi parljjestati, janiw nayajj ist'cämati.

17¿Janit jumajj uñjcta cuntejj Judá marcanacansa uqhamaraqui Jerusalén callenacansa lurapqui ucjja?

18Wawanacajj lawa apthapipjje, awquinacasti nina nactayapjje, warminacasti masa waquichapjjaraqui, tortanaca lurañataqui, ucatsti ucanacjja, cawquïrirutejj Alajjpacha Mama sapqui uca diosaruw loktapjjaraqui. Uca luratanacapampejj ñankhachapjjetuwa, uqhamaraqui yakha diosanacaru vino loktasitanacapampisa.

19Ucampisa nayaru ñankhachañat sipansa, jupanacpachaw juc'ampi ñankhachasisipqui, jupanacataquisti mä p'enkaraquiwa. Naya Tatituw ucjja arsta.

20Ucatwa, naya Tatitojj arsta, sapjjaracsma, take colerasiñajjwa aca chekaru puriyanï, jakenacjjaru, animalanacjjaru, kokanacjjaru uqhamaraqui cosechanacamjjarusa. Colerasiñajjasti jan jiwarquir ninjamaw naqhani.”

21Take ch'amani Tatitusti, Israelan Diosapa, marcaparojj siwa: “Take sacrificionaca, uqhamaraqui loktasïwinacsa loktasisipcaquim, uqhamaraqui uca loktasita aychanacsa mank'asipcaquim.

22Ucampisa cunapachatejj nayajj nayrapacha awquinacamaru Egiptot apsunta ucapachasti janiw nayajj cunsa uca loktasiñanac toketjja jupanacarojj siscti ni maycaractsa.

23Ucampisa jupanacarojj saraquïyätwa nayaru ist'apjjañapa; uqhamatwa nayajj jupanacan Diosapäyäjja, jupanacasti nayan marcajjaraquïniwa sasa. Ucatsti saraquïyätwa cunjämtejj nayajj siscta uqhamar sarnakapjjañapa, uqhamat take cunas sumaqui sarañapataqui.

24Ucampisa janiw nayarojj ist'apquituti ni jaysapcaraquitusa, jan ucasti kala chuymanacapar jaysasaquiwa ñankha lurañanacaru catuyasjjapjjejja. Nayaru uñtañcamayasti, nayatjja maysaruw uñtapjjänjja.

25Cunapachatejj nayra awquinacapajj Egiptot mistunipcäna ucat jichhacamasti, nayajj jumanacarojj maynit mayniruwa profetanacjja qhitanipjjsma.

26Ucampisa jumanacajj janiw nayarojj jaysapquistati, ni ist'apcaraquistasa, jan ucasti juc'ampi khoru chuymaniw sarnakapjjtajja nayra awquinacamatsa juc'ampi.

27“Jumasti Jeremías, take acanac jupanacarojj saraquim, janisay ist'asipcpan; jach'at art'am, janisay jaysapcchïtam ucasa.

28Saraquim: ‘Aca marcajj janiw Tatitu Diosaparojj jaysañ munquiti, janiraquiw chekachayasiñsa munquiti. Cheka chuymampi sarnakañasti jupanacatjja k'ala chhaktatäjjewa’ ” sasa.

Jerusalenan yakha diosanacaru yupaychapjjatapa

29¡Jerusalén, ñic'utam mururasim ucatsti liwtam!

¡Wasara kollu patanacansti llaquiscañ k'ochunac k'ochuraquim!

Tatitusti jakenacamataquejj coleratawa,

apanucjjaraquiwa, jaytjjaraquiwa.

30Tatitusti siwa: “Judá orakenquir jakenacasti mä jan walwa lurapjje nayaru ñankhachquiri: uca ajjtascañ c'ari diosanacapwa nayar loktat templorojj uchasjjapjje, uqhamat templojja k'añuchapjje.

31Ben-hinom vallensti Tofet sat nina phichhaña chekaruraquiw altar waquichapjje, ucan imill wawarusa jan ucajj yokall wawarusa naqhantayañataqui, nayasti janipuniw jupanacarojj ucanac lurapjjam siscti, ni amtäwejjansa ucanacajj utjcaraquïnti.

32Ucatwa jichhajj naya Tatitojj arsta, mä uruw purinini, cunapachatejj uca chekarojj janiw Tofet, Valle de Ben-hinom siscjjapjjaniti jan ucasti Jiwarayañ Valle sasaw sisjjapjjani. Tofet chekanwa jiwatanacarojj imjjapjjaraquini, jan juc'ampi orakejj imañataqui utjcjjatapata.

33Aca jakenacan janchinacapsti jach'a jamach'inacaw mank'apjjani, uqhamaraqui monte animalanacasa, janiw ucanacar qhiti chhuctayiris utjcaraquiniti.

34Judá oraken marcanacapatsti, uqhamaraqui Jerusalén callenacatsa cusiscañ fiesta k'ochunacsa, casarasiñ k'ochunacsa chhaktayäwa; take marcpachasti ch'usa wasararu tucutaraquïniwa” sasa.