1 Crónicas 25 - Qullan Arunaca

Instrumentonac toquirinacampi, k'ochurinacampi

1Ucatsti Davidampi, uqhamarac ejerciton jilïrinacapampejja utt'ayapjjänwa Asaf, Hemán, Jedutún uca chachanacan wawanacaparojj mä asqui luräwinac lurapjjañapataqui, jupanacasti Diosan arunacapwa jutir urunacatjja yatiyapjjerïna arpampi, salteriompi, uqhamarac platillonacampi toct'asa. Qhitinacatejj uca lurañanacanïpjjäna ucanacan listapajja acanacawa.

2Asaf chachan wawanacapasti acanacänwa: Jacur, José, Netanías, Asarela ucanaca. Jupanacarusti sarayänwa Asaf awquipa, juparaquiw jutir urunacatjja Diosan arunacapa yatiyaraquïna, reyin mayitaparjama.

3Jedutún chachan sojjta wawanacapasti acanacänwa: Gedalías, Zeri, Jesaías, Simei, Hasabías, Matatías ucanaca. Jupanacarusti Jedutún awquiparaquiw sarayaraquïna, uqhamarac juparaquiw jutir urunacata Diosan arunacapa yatiyaraquïna arpa toct'asisa, Diosar yuspagarasa, uqhamarac jupar yupaychasinaraqui.

4Hemán chachan wawanacapasti acanacänwa: Buquías, Matanías, Uziel, Sebuel, Jeremot, Hananías, Hanani, Eliata, Gidalti, Romanti-ezer, Josbecaza, Maloti, Hotir, Mahaziot ucanacaraqui.

5Take acanacaw Hemán chachan wawanacapänjja, reyer sirviñana uñjiri uchataraqui, cunjämtï Diosajj jupar arscäna lurañataqui wali ch'amani tucuyañataqui uqhamaru; ucatsti Diosajj Hemán chacharojja tunca pusini yokall wawanacwa churäna, quimsa imill wawanacaraqui.

6Take jupanacarusti awquipawa sarayäna jupanacajj templona sirviñana k'ochupcäna ucqhajja, platillonacampi, salterionacampi, uqhamarac citaranacampi tocasina.

Ucatsti Asaf, Jedutún, Hemán uca chachanacajja reyin arsutaparjama phokhasaraquiw sarnakapjjäna.

7Take suma musiconacajja, Tatitutaqui k'ochuri yakha masinacapamppachajja, pä pataca quimsakallk tunca quimsakallkonïpjjänwa.

8Ucatjja sirviñataquejja sorteasisinwa lurañanacapjja laquinokasipjjäna takeni, jach'anacäpasa jisc'anacäpasa, yatichirïpjjpasa yatikerïpjjpasa.

9-31Sorteasisinsti lurañanacajja aqhamaruwa wact'äna, mayata pä tunca pusincama:

José,

Gedalías,

Zacur,

Izri,

Netanías,

Buquías,

Jesarela,

Jesahías,

Matanías,

Simei,

Azareel,

Hasabías,

Subael,

Matatías,

Jeremot,

Hananías,

Josbecasa,

Hanani,

Maloti,

Eliata,

Huter,

Gidalti,

Mahaziot,

Romanti-ezer.

Sapa mayni jupanacatjja jilanacapampi, uqhamarac wawanacapampejja tunca payanïpjjänwa.