1Tatitojj wasitatwa Jonás chacharojj parläna, saraquïnwa:
2“Sartam, ucatsti Nínive jach'a marcaru saram, cuntejj siscäma uca arunac yatiyiri” sasa.
3-4Jonasasti sartasinjja Nínive marcaruw saräna, Tatitun aruparjam lurañataqui. Nínive marcasti sinti jach'apunïnwa; quimsa uru sararaquïnwa. Jonasasti marcarojj mantawayänwa, mä uru jornalaraquiw sarnakäna jach'at arnakasisa: “¡Acat pusi tunca ururojj Nínive marcajj k'ala tucjatäniwa!”, sasa.
5Uca marcanquiri jakenacasti jach'at jisc'acamaw Diosaru iyawsapjjäna. Ayunaña amtapjjäna, llaquisiñatsa chhanqha isinacampiw isthapisipjjaraquïna.
6Cunapachatï Nínive marcan reyiparu uca yatiyäwinacajj purïna ucqhajj, jupajj konuñapat sartasinjja, suma isinacap apsusisinjja, llaqui isimpiw isintasiraquïna, ucatsti khelljjaruw kont'asiraquïna.
7Ucatsti, reyejja jilïrinacapampi take marcpacharuw mä leyi yatiyäna, aqham sasa: “Janiw qhitis cunsa mank'añapäquïti, ni uywanacasa, ovejanacapasa, vacapasa, janipuniwa mank'añapäquiti ni umañapäquisa.
8Ucatsipana, takenis chhanqha isinacampi isintasipjjpan, take ch'amapampi Diosat art'asipjjpan, sapa maynirac jan wali sarnakäwipjja jaytjjapjjpan, jan walinac luras sarnakcchi ucanacasa.
9Inach Diosajj perdonistani, jach'a colerapsa apartayasjjaraquispa, uqhamat jani jiwarañasataqui” sasa.
10Diosasti uñjänwa Nínive marcanquir jakenacarojj uqham lurasquiri, jan wali sarnakäwinacapsa apanucusquiri, uqham uñjasinwa Diosajj jupanacat qhuyapt'ayasjjäna, janiraquiw cuna castigotejj jutañapäcana ucsa apayancjjänti.
Who We AreWhat We EelieveWhat We Do
2025 by iamachristian.org,Inc All rights reserved.
